JERMI 32 - Tupuri Bible

Jermi yee pay

¹ Wããre maga Manwur wããn ne Jermi nen kiŋgi ma de hwal maga Sedesiyas waŋ Juda ti waŋ mono, se hay nà diŋ nen kiŋgi ma de hwal ti nenmaʼ maga Nebukadnesar ti waŋ mono.

² Soode mani waŋ Babilon hay wo de sen ni nà de kaŋge jag Jerusalem go de cir ti ɓe day Jermi hay nà de maʼ jag ɓi feele tiŋ daŋgay maga wo liŋ ni waŋ Juda mono.

³ Sedesiyas waŋ Juda hay maʼ jag ɓe day riŋn gana : Wer mayse ga ndo wãã ga Manwur wãã ga se hã ɓi leegen la go ne waŋ Babilon doo day se yããn ge go la?

⁴ Wer mayse ga ndo wãɗ ga Sedesiyas waŋ Juda yãã ge go jag waŋ jar Kalde wo gà day à hãn ge mbe go kidolgi cwãy ne waŋ Babilone, day á wãã ge wo wããre go ne kãã lag pel kããra la?

⁵ Wer mayse ga ndo ga waŋ Babilon raw ge wo go de Sedesiyas Babilone day á joŋ ge wo go ni hãã wur maga Manwur ko ge decoo ɓe ɗa la? Wer mayse ga ndo fer jag Manwur ga hayga nday dur jar Kalde wo we nday sii gi ti gà la?

⁶ Jermi day ga : Manwur hay wãã wããre ne ndi doo kay no no gana :

⁷ Ko ga Hanameel je ni pan ɓo ma klee Salum a ge yaŋ see ɓo riŋ moge ga : Yee pay ɓi maga wo Anatod mono werga faage ti ɓo ma yeege ɓe.

⁸ Hanameel je ni pan ɓi ma kleen raw age see ɓi ɓi feele tiŋ daŋgayn doo maga Manwur wããn nono day riŋ me ga : Yee pay ɓi maga wo Anatod ti sir Benjame mono werga faage ti ɓo ma yeege ɓe day yee ne! Ndi raw koge ga sen diŋ wããre ma jag Baa.

⁹ Ndi raw yee pay maga wo Anatod doo Hanameel je ni pan ɓi ma klee no, day ndi raw kee suŋgu ne hẽn boo solay hwal ti renam.

¹⁰ Ndi raw yerge ɓe go ɓil kefdere day ndi raw kaŋ doo ɓil ɓe ndi hoo jar sedewa wo day ndi kal ko põõre solay go ti klew.

¹¹ Ndi raw maŋ kefder yoo ma se ma de kaŋ doo ɓil no, de wããre ma ti ɓen wo de jag liŋgi ɓe no de kefder maga hay go de blarge mo lay.

¹² Ndi kal hã kefder yoo sen ne Barug je ni Neriya je ni Mahseyan go de nen Hanameel je ni pan ɓi ma klee no, de nen jar sedewa maga hay kaŋ wo doo ɓil kefder yoon mo mono day go de nen jar Jwif maga hay wo ɓi feele tiŋ daŋgayn ni mo ɓuy lay.

¹³ Ndi raw fer jag ɓi go ne Barug nen ɓaara ni tuu ga :

¹⁴ Manwur Pantway, Baa ma Israyeln wãã ga : Hoo kefder yoo sen wo, diŋ kefder yoo ma de kaŋ doo ɓiln wo de kefder yoo ma de blarge no, ni ndo wo laa rage ɓi temnee pãy nen maga á mo hay wo ni lag ma nawn puri.

¹⁵ Werga, Manwur Pantway, Baa ma Israyeln wãã doo kay nono ga : À yeɗ ge tiŋ wo, payre wo de payre tlalum wo yaŋ ge ɓil sirn la pa.

¹⁶ Blam maga ndi hã kefder yoo sen go ne Barug je ni Neriyan doo mono, ndi kal tos Manwur ga :

¹⁷ Waŋkluu Manwuri, joŋ ngel ma ciŋ wo de tamsir nà diŋ ndo de egre ɓo ma kluun wo de doo ɓo ma de pããge no, fen maga waare see ɓo bay wa.

¹⁸ Ndo ko decoo jar hã wo go ti jar ma ti ɓaale ɓaara ma ndar wo. Fen maga à hay nen kaŋge ɓe ne pããre ɓaara wo ti wer debaycõõre ɓaaran wo mono, ndo kaŋ go ne weere ɓaara wo ti blam ɓaara. Ndo diŋ Baa ma kluun no, je egre maga à ɗe mo ga Manwur Pantway mono.

¹⁹ Ndo kluu wer yaŋ maga ndo bagn mono, ndo de egre wer joŋre ɓon wo. Nen ɓo go de bulgi ma ko faage seele jar téebeere wo ɓuy, maapoɗ wosela ɓuy de ngaɓge de seele ɓe no, de ngaɓge de leʼge joŋre ɓen wo.

²⁰ Ndo hay ndar nen fẽẽre ma kaŋ nen jar wo de fẽẽre mbuɗgi wo le hãã ɓil sir Ejipte hãã go wara, ɓil sir Israyel lay, yoo jar téebeere wo lay day ndo ra ɗúu see ɓe doo ga á wara nono.

²¹ Ndo hay laa jar ɓo jar Israyel wo le go ɓil sir Ejipte de joŋge fẽẽre kaŋ nen wo de fẽẽre mbuɗgi wo, de doo ɓo ma de egre ma de pããge no, de kaŋge hẽẽne ne jar ti.

²² Ndo raw hã sirn la go ne hara doo maga ndo hay hãʼ go ga ndo hãn ne pããre ɓaara wo nono, diŋ sir se maga pãã wo de noo yõõre yuu wo ni mono.

²³ Á hay a wo, raw wo yããge ɓe. Ama saara day yãã jag ɓo gà. Á hay see wo ti jag liŋgi ɓon gà á joŋ wo fen maga ndo hay fer jag ɓo ne hara ti ɓe mo ɓuy gà. Diŋ wer sen so ga ndo a de re ne hara ti, re se ga de caa rage wara mo so no!

²⁴ Ko ga, à go de horge a le sir cir ma kaŋ gǔu n ɓi leegen ma yããge ɓe, A joŋ ge go ɓi coo doo jar Kalde maga wo de durgi ɓe mono Moslam, koŋne wo de bulfũŋ wo go de raw egre ɓi leege no. Wããre maga ndo hay wããn leɗ jag go day ndo de koge ɓe de nen ɓo.

²⁵ Bà de sen ɓuy ndo Waŋkluu Manwur ndo kal riŋ ndi ga ndi mo yee pay de solay, ndi mo hoo jar sedewa ɓe ni paga ɓi leege go doo jar Kalde wo!

²⁶ Manwur kal fer wããre ne Jermi doo kay nono ga :

²⁷ Ko nen ɓo, ndi diŋ Manwuri, Baa je táabay ma hon la ɓuy no fen po ma waare see ɓi yaŋ mbe yawla?

²⁸ Diŋ wersen Manwur wãã so ga : Ko we, ndi hã ɓi leegen la go ne jar Kalde wo doo, go ne Nebukadnesar waŋ Babilon doo day se yããn ge go.

²⁹ Jar Kalde maga wo de dur ɓi leegen la laa ge wo yaŋ le, hee ge wo wùu go ne ɓi leegen la day roɗn ge wo go de tiŋ maga á hay roɗ fen fõõre ne Baal ni, à hay mee yii ma siɗ jag ne baa ma tigriŋ wo ciŋ ti ɓaara ma car jiili ɓi go mo ɓuy no.

³⁰ Werga jar ni Israyel wo de jar ni Juda joŋ wo le hãã ti jõõ ɓaara diŋ fen maga sen de ɓlagge nen ɓi mono, jar ni Israyel joŋ wo le ɓaa tuu diŋ ga saara mo car jiili ɓi go de joŋre ma doo ɓaaran wo tawa tuu. Kay diŋ jag Manwuri.

³¹ Werga ɓi leegen la diŋ fen car jiili ɓi go, diŋ fen sõɗ ɓil ne ndi, hãã le ti wur maga à laan mono hãã go wara. Diŋ wersen so ga ndi da yee nen ɓe go pel ɓi

³² wer ɓlagge maga jar ni Israyel wo de jar ni Juda joŋn wo mo ɓuy ma car jiili ɓi go mono, diŋ saara, diŋ waŋre ɓaaran wo, minisdir ɓaaran wo, jar siɗ jag ɓaaran wo de jar ndar nen wããre ne haran wo, jar Juda wo de jar maga wo de tiŋ Jerusalem mono.

³³ A mbuɗ wo ne ndi diŋ faale bay diŋ nen ɓaara wa. Á á hay had ra, à hay had ra le de jag toŋ ɓaa tuu ama saara laa dayge coʼ sug ma laa mopo see ɓaaran ni gà.

³⁴ Á raw wo lag fẽẽre horge see ɓaaran ɓil tiŋ maga à tos ndi ne hẽn ti mono ma kaŋ ɗag go ne hẽn see.

³⁵ Á bor wo ngel cor sõõre ma de gẽẽre ciŋ ne Baal wo ɓil log ma Ben-Hinom ma roɗ weere ɓaara wo de mayre ɓaara wo go ne Mologe. Sen nà diŋ fen maga ndi hã faage ɓe ne hara gà has mo yaw, sen hay a me ti meʼ gà has lay; á joŋ wo mo horge see sen nà ma kaŋ wer Juda wo joŋ ɓlagge.

³⁶ Mo so no diŋ fen maga kaŋ wer Manwuri, Baa ma Israyeln wããge ti ɓi leege se maga nday wãɗ ti ɓe ga à hãn ge go ne waŋ Babilon ɓi coo doo, moslam, koŋne wo de bulfũŋ raw wo egre ɓe go gana :

³⁷ Ndi fer ge yaŋ le tay rage le ɓil sir maga ndi hay yee nen ɓaara wo go ni mo ɓuy nen bagge põõ ɓi no, nen sõõge ɓiln wo de cege ɓil ɓi ma kluun mono. Ndi fer ge yaŋ le de ɓaara ti ngeln mo taʼ la no, day ndi lag ge ra yaŋ go flãy.

³⁸ A joŋ ge wo yaŋ diŋ jar ɓi day ndi joŋ ge yaŋ diŋ Baa ɓaara lay.

³⁹ Ndi hã ge jiili ma boŋ yaŋ ne hara, ndi kol ge seele ɓaara yaŋ go diŋ sen boŋ nen maga á mo joŋ wo hẽẽne doo ɓi tum, mo hay wo de fruygi, saara de weere ɓaara wo blam ɓaara.

⁴⁰ Ndi tay ge jag yaŋ de ɓaara ma tum, ndi mbuɗ gi faale ne hara gà so hase. Ndi joŋ ge ra de ele day ndi kaŋ ge joŋge hẽẽne ɓi yaŋ ne hara ɓil nen maga á mo maŋ wo ɓil go see ɓi wa so.

⁴¹ Ɓil ɓi fruy yaŋ go ti ɓaara ma joŋ rage de ele, day ndi peɗ ge ra yaŋ go gesiŋ ɓil sirn la go de jiili ɓi ɓuy, go de maysee ɓi ɓuy lay.

⁴² Werga Manwur wãã ga : Doo maga ndi á de re ma kluu ne jar sen wo la ti nono, ndi a ge yaŋ de de el maga ndi de wããge ti ɓe ne hara ti lay.

⁴³ À yeɗ ge wo payre wo yaŋ ɓil sir se maga nday wãɗ ti ɓe ga á kol go diŋ ngel ma poɗag poɗag bay jar téebeere wo de nàyre ɓili, ga à hãn go ne jar Kalde wo ɓi coo doo mono.

⁴⁴ À yeɗ ge payre wo yaŋ de solay, à yer ge kefder yoo wo yaŋ, à kaŋ ge doo yaŋ ɓil ɓaara day à horge ge jar sedewa ɓe wo yaŋ ɓil sir Benjame wo de sir ma ti Jerusalemn wo, ɓi leege ma ti sir Judan wo, ɓi leege ma ti húulìn wo, ɓi leege ma ɓil Sefelan wo de ɓi leege ma ɓil Negefn wo werga ndi fer ge jar ɓaara maga wo wo go de hooge daŋgay wo yaŋ le. Kay diŋ jag Manwuri.