JERMI 31 - Tupuri Bible

Israyel fer ge wo ti sir ɓaara no

¹ Ti wur sen mono, ndi joŋ ge diŋ Baa ma ɓĩĩni ma Israyeln wo ɓuy, day saara joŋ ge diŋ jar mani ɓin wo. Kay diŋ jag Manwuri.

² Manwur wãã ga : Jar maga gwaʼ wo jag moslam daʼ wo see ɓaara we ɓil puuli no. Israyel de woge patala ti ngel iggi no.

³ Manwur hay naa nen see ɓe ne ndi day ga : Ndi da mo diŋ de dage ma tum diŋ wersen ga ndi mbi tum ko decoo ɓo mono.

⁴ Ndo may ma tigli ma Israyel no, ndi fer yaŋ boo ndo day ndo fer ge yaŋ go ti ngel ɓon de booge! Ndo her ge tembal wo yaŋ yoo doo fẽẽre woore wo no pa no ndo kal ge yaŋ le go ti jõõ yoo jar ma joŋ fruygin wo.

⁵ Ndo peɗ ge tlalum wo yaŋ ti húulì ma Samarin wo pa, jar peɗ fẽẽren peɗ ge wo ra yaŋ day hãã ge wo leʼge ɓaara wo yaŋ.

⁶ Werga wur joŋ ge yaŋ boŋ maga jar gor ngel ma ciŋ ti húulì ma Efrayim ʼwad ge wo ɓay yaŋ ga : Hoo we go ciŋ, naa see wo Siyoŋ see Manwuri, Baa naa no!

⁷ Werga Manwur wãã ga : ʼWad we war ne Jakob ti de fruygi, joŋ we fruygi ti wãy ma pel wer jarn wo maŋ we gẽẽge ɓay go ciŋ kloŋ de togoɗge ga : Manwuri, yãã jar ɓo jar Israyel maga gwaʼ wo go!

⁸ Ko we ga ndi le de fer rage le ti sir ma ɓaŋ gloŋhwede no, ndi tay ge ra yaŋ le ti jag sir tawge. Je rewn wo de je ma leŋ no, wãy de ɓiilin wo de wãy maga ɓil ɓe de leʼge ɓe ma biŋgi wo yoo ɓaara ni lay, saara de kããra ɓuy. Jar maga fer ge wo le mono, joŋ ge wo ngaɓa debaŋ.

⁹ Á fer wo le ti roo day ndi koɗ ge ra yaŋ mbi nen lawge ɓaara no. Ndi wo ge de ɓaara jag bii yuuri wo ti faage maga á mbar wo ɓaale ni gà mono. Werga, ndi diŋ Pan Israyele, day Efrayim diŋ jag mbarga ɓi no.

¹⁰ Nday jar dehãy no, laa we wããre Manwuri day ni nday wo go ʼwad ɓay ɓe ti kaali ma hãã hãã wo! Wãɗ we ga : Je maga dus Israyel wo go tay ge ra yaŋ le, á koɗ ge ra yaŋ doo ga je koɗge ko ngar horog ɓe wo nono.

¹¹ Werga, Manwur pog Jakob we go, á yããn we le go doo je ma de egre de daŋge ɓe no.

¹² Á fer ge wo yaŋ le day joŋ ge wo blumri yaŋ ti tipẽẽge ti Siyoŋ no. A lwaʼ ge wo yaŋ le ne fẽẽre ma de el mani Manwurn wo ti, diŋ coore ble no, diŋ yii ma defay no, noo no, fǐirin wo de deeren wo. Maysee ɓaara joŋ ge yaŋ doo pay sugnee maga à kag bii ne hẽn ti nono, hẽẽne po caa ge ra meʼ gà so hase.

¹³ Mo so no, may ma tiglin dag ge jõõ yaŋ de fruygi, weere ma jõõren wo de jar ma de tããreben wo lay. Ndi kol ge lawge ɓaaran yaŋ go diŋ fruygi day ndi teŋ ge nen ɓaara yaŋ. Ndi hã ge feg yaŋ ne hara jag blam bon ɓaaran wo.

¹⁴ Noo này kaŋ ge fõõre no yaŋ go ne jar siɗ jagn wo day jar mani ɓin wùu gi wo yaŋ go de fẽẽre ɓi ma de eln wo. Kay diŋ jag Manwuri.

¹⁵ Manwur wãã ga : À le de laa sug roo le Rama, de laa war lawge wo de roo ma debaŋ. Rasel de ra weere ɓen wo, day se bay de sãy maga teŋ nen se ti re weere ɓen wo wa werga á bay wo wa so has mono.

¹⁶ Manwur wãã ga : Hem mbo jag roo ɓon so, tag mberbe ma nen ɓon go werga à poɗ ge ndo yaŋ ti joŋre ɓon wo. Kay diŋ jag Manwuri. Á men ge wo sir je heen yaŋ le go, fer ge wo yaŋ le liŋ.

¹⁷ Fen ma de el yaŋ mbe gor ndo nen wur ma peln wo ɗa, weere ɓon fer ge wo yaŋ le ti tway ɓaaran wo.

¹⁸ Ndi de laa sug roo lawge maga Efrayim de law see ɓe mono. A riŋ ga : Ndo hay liŋ ndi day ndi liŋ we doo wedày maga hay bay de balge wa nono. Haw nen ɓi le day ni ndi fer yaŋ le werga ndo Manwur ndo diŋ Baa ɓi no.

¹⁹ Ndi go de mbuɗ faale mo, ndi ɓod jag ɓi go so. De maga ndi daʼ wer go ne see ɓi so mono, ndi grag doo go ti, ndi hee ti go gesiŋ. Sõõre go de baa ndi werga ndi de sõõre fen maga ndi joŋ le ti jõõ ɓi ti.

²⁰ Efrayim nà diŋ mbarga maga ndi da ne noga wel maga ndi senaʼ mo yawla? Tum de maga ndi ɗe ɗúu ɓe mono, ndi fer ɗig ti ti ɓe debaŋ debaŋ. Day pa mono, ɓil ɓi re ndi tum ti re ɓe, ndi ko ge decoo ɓe yaŋ debaŋ. Kay diŋ jag Manwuri.

²¹ Cor fẽẽre ɗag ngel ɓon wo, cor gefay ɓon wo, Ɗig faage noga blam faage maga ndo de seege ni go de ele. Fer le, ndo maytigli ma Israyel no, fer le ɓi leege maga wo diŋ ɓo mono!

²² Ndo joŋ ge mbo wo go de dawge caw nà hãã hun mo la, ndo may ma ti graŋ no! Manwur de ma joŋ fen ma defay ti tamsiri. Wãyn de kiɗ je twar no!

²³ Manwur Pantway, Baa ma Israyeln wãã ga : De maga ndi fer ge jar ɓaara maga wo wo go de hooge daŋgay wo we le no, à wãɗ ge yaŋ ɓil sir Juda wo de ɓi leege ɓen wo pa ga : Daga Manwur mo kaŋ bosaʼ mo ti, ndo ngel maga keɗedn ɓil ɓo, ndo húulì ma bay ɗag no!

²⁴ Jar sir Juda wo de jar ma ɓi leege ɓen laa ge wo tiŋ yaŋ go ni, jar jeege wo de jar yaɗge koɗ horogn wo lay.

²⁵ Ndi fer ge yaŋ taŋ kiŋ jar maga gay wo go mono, ndi wùu gi je maga go de sealge yaŋ go.

²⁶ Ti sen mo hãʼ ndi raw pũygi go day ndi raw koge ga naa maga ndi hay leʼn de ele.

²⁷ Ko we, wur yaŋ wo le age, ndi joʼ ge mbèere jar téebeere wo de mbèere nàyre wo yaŋ ti sir Israyel wo de sir Juda. Kay diŋ jag Manwuri.

²⁸ Doo maga ndi grag see ɓi go ma ndar rage go, ma car rage go, ma ɓlag rage go, ma taw rage go, ma joŋ rage de ɓlagge nono, ndi grag ge yaŋ go ma boo rage, ma peɗ rage lay. Kay diŋ jag Manwuri.

²⁹ Ti wur sen ni à wãã ge jag jõõ maga pããreben hay re wo leʼge tlalum ma gwagu wo day saŋ weeren hoo wo go mo gà so hase.

³⁰ Ama wosela ɓuy huu gi diŋ wer debaycõõre ɓe de see ɓe. Je ma honla ɓuy maga re ge leʼge tlalum ma gwagu wo we no, saŋ ɓe hoo ge go.

Tayge jag ma defay no

³¹ Ko we, wur yaŋ wo le age, ndi tay ge tayge jag ma defay yaŋ de tiŋ mani Israyeln wo de tiŋ mani Juda no. Kay diŋ jag Manwuri.

³² A joŋ ge diŋ te tayge jag maga ndi hay tayn de pããre ɓaara wo ti wur maga ndi hay ɗaw doo ɓaara le ma laa rage le go ɓil sir Ejipte mo gà so. Á hay ɓlag wo tayge jag sen go, bà mbe de maga ndi mbi diŋ je wããre ɓaara mo ɓuy no. Kay diŋ jag Manwuri.

³³ Mokay diŋ tayge jag maga ndi tayn ge de tiŋ mani Israyeln blam naw sen wo mono : Ndi hee ge jag liŋgi ɓin yaŋ ne hara ɓili, ndi yern ge yaŋ ne hara jiili. Ndi joŋ ge diŋ Baa ɓaara day saara joŋ ge diŋ jar ɓi wo. Kay diŋ jag Manwuri.

³⁴ Jobo had ge kan ɓe noga je lan had ge hẽn ɓe ga : Ko we wer go ne Manwur! Gà so werga á ko ge wo ndi yaŋ go ɓuy, tĩĩ le ti ma kleen hãã leʼ go ti je ma kluu de daŋ kããra no. Kay diŋ jag Manwuri. Ndi fug gi ɓil yaŋ go ne ra ti debaycõõre ɓaara no day ndi fer ge ɗig ti ti ɓlagge ɓaaran gà so hase.

³⁵ Manwur maga hã wur ma tee ngel go, kol few le ciŋ de gér wo ma ler ngel suŋ go, horge maarog ciŋ day far kaŋngaw wo ciŋ day ɗúu ɓe ga Manwur Pantway wãã ga :

³⁶ Hayga jag liŋgi ma ti wur wo de few wo de gér wo mo hãʼ caa wo wer we go pel ɓi no, wer mani Israyel car ge wer yaŋ go day joŋ ge go diŋ wer jar po wo taʼ gà kway so. Kay diŋ jag Manwuri.

³⁷ Manwur wãã ga : Hayga à kãã mbe we ma ngaɓ kluu ngel ma ciŋ wo noga ma daʼ wer go ga tamsir de ɓoʼ wer nà ɓoʼ ge la no, ni ndi tob wer mani Israyel wo yaŋ go ɓuy wer fen maga á hay joŋn wo mo ɓuy go kway so. Kay diŋ jag Manwuri.

³⁸ Ko we, wur yaŋ le age day à fer ge yaŋ boo ɓi leegen ne Manwuri, le ti tiŋ ma de gẽẽre mani Hananeeln kaʼ wo go ti jag tiŋ ma ti hlug no.

³⁹ À mbeɗ ge saale ma ngaɓ fẽẽre yaŋ wo hãã wo go ti húulì ma Gareb no, day à kol ge yaŋ go nen Goad no kay no.

⁴⁰ Por maga à lag húulí fẽẽre wo wo go ni de sããge mo lay, tiŋ ma de law tin wo ɓuy hãã wo go ɓil log ma Sedroŋ no hãã wo go ti hlug ma jag tiŋ Piirin wo nen wur boo toŋ wo mo lay, ngel sen wo ɓuy joŋ ge wo yaŋ go sagsag ma Manwuri day à mbug gi ra go noga à ɓlag ge ra go gà so has hase.