JERMI 30 - Tupuri Bible

DE EL MA BLAM DAŊGAY NO Baa fer yaŋ ko decoo Israyel wo

¹ Manwur raw wãã wããre ne Jermi doo kay nono ga :

² Manwuri, Baa ma Israyel wãã ga : Yer wããre maga ndi hay wãã ra ne ndo mo ɓuy wo go ɓil kefdere.

³ Ko ga wur yaŋ le age day ndi fer ge jar Israyel wo de jar Juda, jar ɓi maga wo wo go ti daŋgay wo yaŋ le, wããn diŋ Manwuri. Ndi fer ge ra yaŋ le ɓil sir maga ndi hay hãn go ne pããre ɓaara wo mono, day saara yããn ge yaŋ go.

⁴ Mokay diŋ wããre maga Manwur wããn ti Israyel wo de Juda mono :

⁵ Manwur wãã ga : Wùr de laa sug war re wo. Á diŋ hẽẽne de caa jare, bay diŋ jam wa.

⁶ Wiɗ we jag jare, day ko we ɗala, je twar biŋ mbe yawla? Day wer mayse ga werpiiri wo go de laa doo sag ɓuy doo wãy maga ɓil ɓe de leʼge ɓe no lay la? Wer mayse ga nen jar ɓuy baɗ wo go la?

⁷ Á diŋ re! Wur sen diŋ wur ma kluu, ma tigriŋ bay doosen no wa so hase! Á diŋ wur lawge mani Jakob no, ama á yãã yaŋ mbe go.

⁸ Ti wur sen mono, ndi hrag ge jug ɓe ma de ɓoʼge mo soolen yaŋ go, ndi weʼ ge geyam ma de mbarge ne ndon wo yaŋ go day waaren kol ge wo ndo go gebee ɓaara gà so hase. Kay diŋ jag Manwuri.

⁹ A joŋ ge wo peele yaŋ ne Manwuri, Baa ɓaara no, ne Dafid waŋ ɓaara maga ndi baan ge ne hara mono.

¹⁰ Day ndo Jakob wejõõ ɓin mono, joŋ hẽẽne wa. Kay diŋ jag Manwuri. Israyele, daɗ wa! Werga ndi yãã ge ndo yaŋ le go doo sir ma hãã no, ndi yãã ge wer mani ɓon wo yaŋ go doo jar sir maga á wo wo go de hoo ge ni mono. Jakob fer ge wo yaŋ le. Ɓil ɓaara joŋ ge yaŋ go feh ti iggi wo de lagge go flãy no, day je ma age duɗ rage joŋ ge gà so hase.

¹¹ Werga ndi yaŋ de ɓo ma yãã ndo go. Kay diŋ jag Manwuri. Ndi taw ge wer jar maga ndi hay dus nday wo go yoo ɓaara wo go ɓuy, ama ma ɓay ndi taw ge nday go gà. Ndi liŋ gi ndo yaŋ ti faage ɓe ndi men ge mbe ndo go doo je ma bay re ti tuu gà.

¹² Manwur wãã ga : Re ma de caa mogen diŋ ma taw ndo go, wããge ɓon kol joŋre go.

¹³ Jobo bay yãã re ɓo see ɓe ma saʼ wããge ɓon wa, saŋgu noga guur-koo ma ruggi ɓe bay wa lay.

¹⁴ Jar maga hay wo da ndo yõõ wo ti go ti ɓo, á bay wo kiɗ ndo wa so hase werga ndi hay mbar ndo go doo je hee ɓo nono, ndi hay raw wùu liŋ ndo wer ngaɓa seele ɓo ma bay blam wo no, wer kluu ɓlagge ɓon wo.

¹⁵ Wer mayse ga ndo law see ɓo ti re ma de caa ndon noga ti cege ɓo maga bay go men ndo wa la? Ndi joŋ ndo doo kay no nà wer ngaɓa seele ɓo ma bay blamn wo, wer kluu ɓlagge ɓo no.

¹⁶ Diŋ wersen so ga jar maga lor wo ndo mo ɓuy no, à lor ge ra yaŋ go lay jar hee ɓon wo ɓuy raw ge wo yaŋ ti daŋgay lay. Jar maga ɓoʼ wo coo ɓo go mono, à ɓoʼ ge coo ɓaara go lay. Jar maga frum wo ndo go mono, ndi hã ge ra yaŋ go ma frumgi lay.

¹⁷ Werga, ndi pẽẽ ge ndo yaŋ go, ndi rug gi wããge ɓon wo yaŋ go. Kay diŋ jag Manwuri. Wer maga á ɗe wo ndo ga wãy maga à nii go, ga Siyoŋ maga jobo bay de re ɓe wa so has mono,

¹⁸ Manwur wãã ga : Ko we ga ndi le de fer jar daŋgay ma ti wer mani Jakobn wo le liŋ, ngel hayle ɓen ko wo decoo nen ɓi. À fer yaŋ boo ɓi leegen ti tabul ɓe, à fer yaŋ bor tiŋ ma de wooren wo ti ngel ɓaara doo maga á hay wo nono.

¹⁹ Jar ʼwad ge wo siŋ ma joŋ suseʼ yaŋ yoo ɓaara, ʼwad ge wo siŋ few wo yaŋ. Ndi tes ge ra yaŋ, day ngaɓa ɓaara fer ge go gesiŋ gà so hase. Ndi woo ge ra yaŋ day jobo mbuɗ gi fuy ɓaara gà so has lay.

²⁰ Jar ma ti wer mani Jakob joŋ ge wo doo ma ti wurpon nono, tayge ɓaara joŋ ge yaŋ tum ɗeged pel ɓi day ndi ur gi yaŋ de jar joŋ bon ɓaara wo.

²¹ Waŋ ɓaaran naa ge nà yoo ɓaara ni tuu, je wãã re ɓaaran kal ge mbe le go nà yoo ɓaara tuu. Ndi yaʼn ge yaŋ le day se raw ge yaŋ le see ɓi. Werga wose sen ge yoo ɓay ga hã see ɓe de see ɓe tuu ga se yaʼ le see ɓi nà diŋ wosela? Kay diŋ jag Manwuri.

²² Nday joŋ ge diŋ jar ɓi, day ndi joŋ ge diŋ Baa ɓay no.

²³ Ko we sõõge ɓil mani Manwur ma doo degurleegen le de urgi, leege baan le go de tog egre ɓe, á de fidgi, de kii ti jar debaycõõren wo.

²⁴ Baage põõ ma de hãã mani Manwurn ham ge jag gà say se á jag ɗiggi ɓe go, tawn go ɗa. Ti wur ma blam mono, nday joŋ ge yaŋ de ti ngel ma laa wer ɓe.