JERMI 3 - Tupuri Bible

¹ De maga jobo bus wãy ɓe go, wãy sen menn go day kol go wãy je tigriŋ mono, bloo ma busgi ɓen go la wo mbe yaŋ see ɓe pa yawla? Sir sen joŋ ge go de glubgi ɓuy tuu gà yawla? Ndo maga ndo joŋ figliw le go de ndeere ɓo wo ngaɓa mo deŋ ndo fer yaŋ mbo le see ɓi pa yawla? Kay diŋ jag Manwuri.

² Maŋ nen ɓo wo ciŋ ko ti pẽẽgeti fẽẽre wo day ko nen wo ɗala! Ngel ma hon ga ndo hã see ɓo go joŋ re sõõre ni gà la? Ndo hay go de hayle yeʼ gor rage ti faage doo je Arab ɓil puuli nono. Ndo raw glub sirn go de joŋge figliw ɓon wo de seele ɓo ma bay ngar no.

³ Doo kay nono, ndi raw dig bii ma ciŋn go, baa ma jag tobn laa rage gà. Ama paga pel ɓo hay nà doo mangawlaŋ nono, sõõre hay bay joŋ moge wa.

⁴ Day patala ɗa so ndo ko so, day ndo yaʼ ɗe mege ga Pan ɓi, ga je maga ndi hay de kaŋ ɗiggi ɓi le ti ɓe ti jõõ ɓi mo so gà yawla!

⁵ Ndo hay wãɗ ga : Day á joŋ ge mbe wo tum de baa põõ so yawla? Á ɗaw ge mbe ndi wo tum ɓil ɓe so yawla? Ndo hay wããge nono ni ndo mbo swẽd joŋ mo ɓo ma de ɓlagge doo ga ɓil ɓo da nono.

Israyel wo de Juda wo diŋ gawlaŋre wo

⁶ Manwur kal riŋ mege ti kal mani Josiyasn ga : Ndo yaŋ mbo de ko fen maga Israyel maga bay hayge wer war yeʼ wa joŋn mo we yawla? Á raw wo leɗ monɗra ciŋ ti húulì ma honla ɓuy, wer koo ma de sug ti ma honla ɓuy, day joŋ figliw ɓen wo go ni.

⁷ Ndi raw ɗiggi le ɓil ɓi gana : Blam maga á joŋ fẽẽre sen wo we go ɓuy no, á fer yaŋ le see ɓi ama se fer le see ɓi gà. Day maygeman ɓe Juda ma bay tin kon mbe lay.

⁸ Bà mbe de maga ndi bus Israyel maga bay hayge yeʼ wan go wer figliw ɓen wo mo ɓuy, day ndi hã mbi kefder busgin go ne hẽn doo mo ɓuy no, ndi raw koge ga maygeman ɓe Juda ma bay tin joŋ hẽẽne gà lay, raw mbe rawge joŋ figliw jag ɓe lay.

⁹ Diŋ de seele ɓe se ma bay ngar ga go tinoo poɗag mono, Israyel raw glub sirn go, joŋ figliw go de húulì wo de koo.

¹⁰ Bà mbe de sen ɓuy mo deŋ no, maygeman ɓe Juda ma bay tin fer le see ɓi go de ɓil ɓe sog boŋ gà ferge ɓen le bay cwãy wa. Kay diŋ jag Manwuri.

Baa daga á mo fer wo le

¹¹ Manwur day riŋ me ga : Israyel maga bay hayge yeʼ wan keɗed de daŋ Juda ma bay ti no.

¹² See, wo ngar jag de wããre sen wo wo nen ɓaŋ gloŋhwede day ni ndo wãã ga : Fer le, ndo Israyel maga bay hayge yeʼ wa no! Wãã diŋ Manwuri. Ndi joŋ ge de waŋ see ɓay gà so werga ɓil ɓi de ele. Kay diŋ jag Manwuri. Ndi bay baa põõ go see jar ma tum wa.

¹³ Ko mbo debaycõõre ɓon tawa werga ndo hay joŋ ti graŋ go nà diŋ see Manwuri, Baa ɓo no. Ndo hay see seele ma bay ngar go de tabge de waare wo wer koo ma de sug ti ma honla ɓuy day nday laa dayge yãã jag ɓi gà. Kay diŋ jag Manwuri.

¹⁴ Fer we le, nday weere ma ti graŋ no! Kay diŋ jag Manwuri. Werga, je wãã re ɓayn nà diŋ ndi. Ndi hoo ge nday yaŋ le, ndi baa boŋ le ɓi leege po, ndi hoo le ɓog ti moobe maapo day ndi fer ge nday yaŋ le Siyoŋ.

¹⁵ Ndi hã ge jar koɗ nday ma ti ɗiggi ɓi wo yaŋ ne nday day saara koɗ ge nday yaŋ ti ngel ɓe lay, de ɗeŋ lay.

¹⁶ De maga nday tes ge we, nday dus ge we ngaɓa ɓil sirn no, ti wur sen wo mono, à wãã ge ti komrom tayge jag mani Manwurn gà so hase. Kay diŋ jag Manwuri. Jobo ɗig gi ti ti ɓe gà hase, à wãã ge ti ɓe gà hase, jobo riŋ gi bà ga á bay wa nà ẽla gà has lay day à joŋ ge ma tigriŋ ni gà so lay.

¹⁷ Ti wur sen ni à ɗe ge Jerusalem yaŋ ga paale waŋ mani Manwur no. Wer jar wo ɓuy naa wo jag yaŋ wo ni, naa wo wo Jerusalem wer ɗúu Manwuri, day saara see ge doo maga ɗiggi ɓaara ma de ɓlagge ma ɓil ɓaara dan no gà so.

¹⁸ Ti wur sen wo mono, jar ma liŋ ni Judan see ge wo yaŋ wer kããra de jar ma Israyeln wo. A a ge wo yaŋ le jag taʼ boŋ le ti sir ma nen ɓaŋ gloŋhwede no, ma age ɓil sir maga ndi hay hãn go ne pããre ɓay wo tway ɓaara mono.

¹⁹ Ndi hay wãã le ɓil ɓi gana : Ndi joŋ ge nà joŋge ma ɓoʼ ndo go yoo weere ɓin wo, ndi hã sir ma de woore ga diŋ tway maga hay woo wer jar wo ɓuy go ne ndo nà hãge la? Ndi hay wãã pa gana : Ndo ɗe ge ndi yaŋ ga : Pan ɓi day ndo mbuɗ gi faale ne ndi gà.

²⁰ Kidolgi, doo wãy maga kaŋ tew war ɓe nono, nday jar ni Israyel nday hay cer ndi lay. Kay diŋ jag Manwuri.

²¹ À laa gẽẽge le ciŋ ti pẽẽgeti fẽẽre wo, diŋ roo wo, diŋ lawge mani jar ni Israyeln wo. Werga á glub wo seele ɓaaran go, yõõ wo ti go ti Manwuri, Baa ɓaara no.

²² Fer we le, nday weere ma ti graŋ no, ni ndi pẽẽ nday yaŋ go jag ndarge gog ɓayn wo no. Ko wùri, wùr de woge nà see ɓo werga ndo diŋ Manwuri, Baa wùr no.

²³ Kidolgi ngel ma de farge ciŋn wo de ngarge jag maga a le ti húulìn wo diŋ geteʼe. Kidolgi pẽẽge ma Israyel nà see Manwuri, Baa wùr no.

²⁴ Joŋge peele ne Baal ma kaŋ sõõre ne jar tin taw mo maga pããre wùr hay daʼn wo de joŋre go ɓuy, hãã le ti jõõ wùri taw fǐirin wo de deeren wo de weere ɓaaran wo de mayre ɓaaran wo go ne hara doo ɓuy.

²⁵ Sõõre kol go joŋ wùr ti ngel suuli wùr wo, sõõre go de wùu ti ne wùr ɓuy doo õõbe de laage ti wùr nono. Werga, wùr de pããre wùr wo, wùr hay joŋ ɓlagge see Manwuri, Baa wùrn le hãã ti jõõ wùri hãã go patala. Wùr day laa jag Manwuri, Baa wùrn gà.