JERMI 29 - Tupuri Bible

Jermi ɓoʼ leeder wo ne jar ma ti daŋgayn wo no

¹ Mokay diŋ leeder maga Jermi je ndar nen wããre Baan yern wo ne jar kluuri maga gwaʼ wo ga à hay hoo ra wo go ti daŋgay mono, ne jar siɗ jagn wo, ne jar ndar nen wããre Baan wo de jar ma ɓuy maga Nebukadnesar hay hoo ra wo Jerusalem la day raw wo de ɓaara ti daŋgay Babilon mono.

² Á hay yern nà blam maga waŋ Yekoniya, man ɓe, jar joŋre ma liŋ ni waŋn wo, minisdir ma Judan wo de ma Jerusalem wo, jar ceɗ kooren wo de jar ʼwũy jag tiŋn laa wo go men wo Jerusalem go mono.

³ Á hay hãn wo ne hara doo Eleyasa je ni Safann wo de Gemariya je ni Hilkiya maga Sedesiyas waŋ Juda hay laa ra wo Babilon see Nebukadnesar waŋ Babilon mono. Á hay de yerge ɓil leedern ga :

⁴ Ndi Manwur Pantway, Baa ma Israyeln ndi wãã wo ne jar maga ndi hay hoo ra wo Jerusalem la day ndi raw go de ɓaara ti daŋgay Babilon wo ɓuy ga :

⁵ Bor we tiŋ wo day lag we ɓil ɓaara, peɗ we koore day ni nday re we leʼge ɓaara wo.

⁶ Kaŋ we kããra day biŋ we weere wo de mayre wo. Da we naare ne weere ɓay wo, hã we mayre ɓay wo ne werpiiri. Hay we tesge ti ngel maga nday ni mono day men we ngaɓa ɓayn go ferge gesiŋ wa.

⁷ Kiɗ we diŋ jam ɓi leege maga nday ɓil ɓe ga ndi hay hoo nday wo go ni mono, tos we Manwur ti ɓe werga jam ɓayn á ge le nà see jam ɓe no.

⁸ Werga Manwur Pantway, Baa ma Israyeln wãã ga : Men we see ɓay go sãʼge wer jar ndar nen wããre ne ndayn maga wo yoo ɓay noga jar kaŋ halge ma yoo ɓayn wo wa. Kaŋ we ti ti lwaʼge maga nday lwaɗ ra mo wa.

⁹ Werga, fen maga á ndar wo nen ɓe ne nday de ɗúu ɓi mono bay diŋ cwãy wa, ndi hay laa ra gà. Kay diŋ jag Manwuri.

¹⁰ Ane mokay diŋ fen maga Manwur wããn mono : De maga kiŋgi ma doo renam maŋ ge wo jag we go ti Babilon no, ndi ur gi yaŋ wo wer ɓay day ndi bag ge jag wããre ɓi ma de eln yaŋ go ti maga ndi fer ge nday le ti ngeln mo taʼ lam no.

¹¹ Ndi yaŋ mbi de ko fen maga ndi le go de ʼwũygi ɓe ɓil ɓi wer ɓay mono, á diŋ ɗiggi ma woo nday bay ma kaŋ re ne nday ti wa nen maga ɗiggi ɓay mo hay de kaŋge gorge wo pel diŋ fen ma de ele.

¹² Mo so no nday ɗe ge ndi yaŋ, day nday see ge yaŋ. Nday tos ge ndi yaŋ, day ndi laa ge jag ɓay yaŋ.

¹³ Nday kiɗ gi ndi yaŋ day nday daʼge ndi yaŋ werga nday kiɗ gi ndi go de jiili ɓay ɓuy.

¹⁴ Ndi men ge see ɓi yaŋ go daʼge ne nday. Kay diŋ jag Manwuri. Ndi fer ge jar ɓay maga wo wo go de hooge ti daŋgay wo yaŋ le. Ndi tay ge nday yaŋ le yoo wer jar wo, le ti ngel maga ndi hay dus nday wo go ni mo ɓuy no day ndi fer ge yaŋ le de ɓay ti ngel maga ndi hay hoo nday wo go la ni mono.

¹⁵ Day nday ɓayn gana : Baa yaŋ de laa jar ndar nen wããre ɓen wo ne wùr yoo Babilon la!

¹⁶ Manwur fer wããre ne waŋ maga de hayle ti paale waŋ mani Dafid no, ne jar maga wo de tiŋ ɓi leegen lam no, ne hẽẽre ɓay maga bay wo wo go de rawge ti daŋgay wer ɓay wa,

¹⁷ day Manwur Pantway wãã ga : Ko we ga ndi kaŋ ge moslam, koŋne wo de bulfũŋ wo yaŋ ne hara ti day ndi kol ge ra yaŋ go doo leʼge hõõ ma de buugi maga à kãã ma re rage gà wer maga á wo go de ɓlagge has nono.

¹⁸ Ndi nii gi ra yaŋ de moslam, de koŋne wo de bulfũŋ day ndi kol ge ra yaŋ go diŋ fen caa hẽẽne sir waŋre ma ti tamsir wo ɓuy, diŋ fen faɗge, fen ngil jare, fen feg ti, fen mbuɗ foo yoo wer jar maga ndi yee ge nen ɓaara wo go ni mono

¹⁹ sen nà wer maga á hay coʼ wo sug wããre ɓin gà mono. Kay diŋ jag Manwuri. Á wo diŋ jar maga ndi hay lag weere jõõre ɓi jar ndar nen wããre ɓin wo see ɓaara, ndi hay laa ra wo de jag toŋ hãã, nday laa dayge laage ɓe gà. Kay jag Manwuri.

²⁰ Ama nday ɓay jar maga wo go de hooge ti daŋgay ga ndi hay hoo we wo Jerusalem la day ndi raw wo go de ɓay Babilon mono, coʼ we sug wããre Manwuri!

²¹ Manwur Pantway, Baa ma Israyeln wãã ne Akab je ni Kolayan wo de Sedesiyas je ni Maaseya maga ndar wo nen wããre geteʼ ne nday ti ɗúu ɓi mono ga : Ko we, ndi hã ra go ne Nebukadnesar waŋ Babilon ɓi coo doo, day se id ra yaŋ go nen ɓay poɗage.

²² Á kol wo yaŋ jag jar diŋ faɗge yoo jar Juda maga wo wo go de hooge Babilon mo ɓuy gana : Daga Manwur mo joŋ mo doo maga á joŋ Sedesiyas wo de Akab maga waŋ Babilon haɓ ra go ti wùu nono!

²³ Werga á joŋ wo fen yoo yoo jar Israyel wo ti maga á joŋ wo figliw de naare kããra ɓaara wo day raw wo car geteʼ ti ɗúu ɓi, ni paga ndi hay fer jag ɓi ne hara meʼ gà has ɓuy mono. Ndi de koge ɓe day ndi diŋ je sedewa re seno. Kay diŋ jag Manwuri.

²⁴ Ndo riŋ gi Semayahu ma Nehelam ga :

²⁵ Manwur Pantway, Baa ma Israyeln wãã ga : Ndo yer leeder wo le de ɗúu ɓo ne jar maga wo Jerusalem lam ɓuy, ne Sofoni je ni je siɗ jag Maaseya no, ne jar siɗ jagn wo ɓuy day ɓil leeder ɓon wo ndo wãã ni ga :

²⁶ Manwur de hay ndo Sofoni ti ngel Yehoyada je siɗ jagn nen maga nen ɓo mo hay ti tiŋ mani Manwurn ti wosela ɓuy maga wãɗ jag dog jag day riŋ ga se diŋ je ndar nen wããre Baa go mono, ndo mo maʼ geyam ne je ma doo kay nono day ndo mo ɓoʼn ti paglam.

²⁷ Day wer mayse ga patala ndo laa jar ne Jermi je Anatodn maga kol see ɓe je ndar nen wããre Baa go yoo ɓay ti gà la? À yer bà le go ne wùr Babilon la draʼ lay gana :

²⁸ Daŋgayn ig yaŋ ɗa! Bor we tiŋ wo day lag we ɓil ɓaara! Peɗ we koore wo day re we leʼge ɓaara wo!

²⁹ Sofoni je siɗ jagn raw kee kefder sen go pel Jermi je ndar nen wããre Baa no.

³⁰ Day Manwur raw wãã wããre ne Jermi doo kay nono ga :

³¹ Ɓoʼ jobo riŋ jar maga wo wo go de hooge daŋgay mo ɓuy ga : Manwur wãã ti Semaya ma Nehelamn wo de wer mani ɓen ga : Wer maga Semaya yaʼ ndar nen wããre ne nday ni paga ndi ɓoʼn gà day yaʼ kaŋ ɗiggi ɓay ti fen maga bay cwãy wa mono,

³² mokay diŋ fen maga Manwur wãã mono : Ko we ga ndi ur gi yaŋ wo de Semaya ma Nehelam wo de wer mani ɓen wo. Je ɓe po joŋ ge de tiŋ yeʼ yoo jar sen wo lam gà hase, day á ko ge de el maga ndi joŋn ge see jar ɓin wo de nen ɓe gà werga wããre ɓen wo diŋ ma joŋ ti graŋ jar go see Manwuri. Kay diŋ jag Manwuri.