JERMI 28 - Tupuri Bible

Jermi dur de Hanani je geteʼ no

¹ Nen kiŋgi se boŋ ti tĩĩgi wer waŋ mani Sedesiyas waŋ Judan ti few ma de dwee nen kiŋgi ma de naan mono, Hananiya je ni Asur je ndar nen wããre Baa ma Gabawoŋn raw riŋ ndi ɓil tiŋ mani Manwur pel jar siɗ jagn wo de jarn wo ɓuy gana :

² Manwur Pantway, Baa ma Israyeln wãã ga : Ndi haw jug maga waŋ Babilon ɓod ne jar soole we go!

³ Kiŋgi gwaʼ ɓoge, ndi fer ge fẽẽre joŋre ma ɓil tiŋ mani Manwurn wo yaŋ le ti ngel mo taʼ la no, diŋ fẽẽre maga Nebukadnesar waŋ Babilon hay hoo ra wo go ti ngel la, day raw wo go de ɓaara Babilon mono.

⁴ Ndi fer ge Yekoniya je ni Yehoyakim waŋ Juda wo yaŋ le de jar Juda maga à hoo ra, à raw wo go de ɓaara Babilon mono werga ndi haw ge jug maga waŋ Babilon ɓoʼ ne jar soole yaŋ go.

⁵ Jermi je ndar nen wããre Baan raw fer wããre ne je ndar nen wããre Baa Hananiya nen jar siɗ jag wo de jar ma ɓuy maga hay wo ɓil tiŋ mani Manwur ni mono.

⁶ Jermi je ndar nen wããre Baan day ga : Amen! Daga Manwur mo joŋ doosen nono! Daga Manwur mo bag jag wããre maga ndo ndar nen ɓaara mono go, day mo fer fẽẽre joŋre ma ɓil tiŋ Manwurn wo de jar maga à hoo ra wo go Babilon wo le ti ngel la mbe!

⁷ Ane coʼ sug wããre maga ndi day wããge ɓe ne nday de jar ma ɓuyn de sug ɓo lay, jar lan mo laan wo de sug ɓaara lay.

⁸ Jar ndar nen wããre Baa maga hay joŋ wo le go taŋgu ɓi lay taŋgu ɓo lay le mo hãã ɓaa tuu hay ndar wo nen wããre Baa ti sir wo ngaɓa de sir waŋre ma kluuri wo ga durgi, re wo de bulfũŋ taw ge wo ra go.

⁹ Ama hayga je ndar nen wããre Baa po wãã we ti jam no, à ko ge ga á diŋ je maga Manwur ɓoʼn le cwãy nà ti maga wããre ɓe maga á naa nen ɓe baa jag go mono.

¹⁰ Mo so no je ndar nen wããre Baa Hananiya raw maŋ jug ma soole Jermi je ndar nen wããre Baan go no, raw hawge ɓe go.

¹¹ Hananiya raw wããge go nen jarn ni ɓuy tuu ga : Manwur wãã ga : Kiŋgi maŋ ge la ɓog mono, ndi haw ge jug maga Nebukadnesar waŋ Babilon de ɓoʼge ɓe ne wer jar wo ɓuy soole yaŋ go doo kay no lay no. Jermi je ndar nen wããre Baan raw maŋ faage jag ɓe.

¹² Blam maga Hananiya je ndar nen wããre Baan haw jug ma soole Jermi je ndar nen wããre Baan go mono, Manwur kal wãã wããre ne Jermi ga :

¹³ See, wo riŋ Hananiya ga : Manwur wãã ga : Ndo kãã mbo we ma hrag koore wo go, ane ndo kol ge boore wo yaŋ ti ngel ɓaara.

¹⁴ Werga, Manwur Pantway, Baa ma Israyeln wãã doo kay nono ga : Ndi ɓoʼ jug boo ne wer jar wo ɓuy soole maga á mo joŋ wo peele ne Nebukadnesar waŋ Babilone, day saara joŋ ge peele ne hẽne. Ndi go de hã nàyre ma yoofíi wo ne hẽn doo lay.

¹⁵ Jermi je ndar nen wããre Baan raw riŋ Hananiya je ndar nen wããren ga : Coʼ sug ɓo Hananiya! Manwur bay de ɓoʼ ndo wa, ndo joŋ ga jar mo kaŋ wo ɗiggi ɓaara ti fen maga bay cwãy wa le la.

¹⁶ Diŋ wersen so Manwur wãã ga : Ko ndi, ndi yee nen ɓo go ti sirn la, ndo huu go tagla werga wããre ɓon wo diŋ wããre ma kaŋ wer jar go joŋ ti graŋ see Manwuri.

¹⁷ Day Hananiya je ndar nen wããre Baa gon raw huugi go ti kal sen ni tuu, nen few ma de renam no.