JERMI 27 - Tupuri Bible

Ɗawa diŋ yããge jag waŋ Babilone

¹ Ti tĩĩgi wer waŋ mani Yehoyakim je ni Josiyas waŋ Judan mono, Manwur raw wãã wããre ne Jermi doo kay nono ga :

² Manwur hay riŋ me ga : Dee saale wo, ceɗ koo ma soole wo, ni ndo laa ra soole ɓo.

³ Hã ra wo ne waŋ Edom, ne waŋ Mohab, ne waŋ jar Amoŋ wo, ne waŋ Tir wo de waŋ Sidoŋ doo jar maga á lag wo ra le Jerusalem la see Sedesiyas waŋ Juda mono.

⁴ Ndo fer ge jag ɓi maga ndi wããn wo ne jar wãã re ɓaaran wo day ndo riŋ ra ga : Manwur Pantway, Baa ma Israyel wãã ga : Mokay diŋ fen maga nday wo ge wãɗge ɓe ne jar wãã re ɓayn wo mono :

⁵ Joŋ tamsiri, jar téebeere wo de nàyre maga wo ciŋ ti tamsir mo nà diŋ ndi de egre ɓi ma kluun wo de doo ɓi ma de pããge no, day ndi hã tamsir ne wosela maga ndi daga ndi hãn ne hẽn mono.

⁶ Patala ndi hã sir sen wo mo ɓuy go ne wejõõ ɓi Nebukadnesar waŋ Babilon ɓi coo doo, ndi hã nàyre ma yoofíi wo go ne hẽn nen maga á mo joŋ wo peele ne hẽn lay.

⁷ Wer jar wo ɓuy joŋ ge wo peele ne hẽne, ne wel ɓe, ne moo ɓe hãã wo go ti wur maga sir ɓen maŋ jag go day wer jar ma ngaɓa wo de waŋre ma kluuri koln wo go gebeere ɓaara ɗa lay.

⁸ Hayga wer jar po wo noga sir waŋ po day we joŋ peele ne Nebukadnesar waŋ Babilon ga day hã soole ɓe we heege ti jug mani waŋ Babilon gà no, ndi ur gi yaŋ de wer jar sen wo, ndi kaŋ ge moslam, koŋne wo de bulfũŋ ne hara ti hãã ndi taw ra go ɗa. Kay diŋ jag Manwuri.

⁹ Jar ndar nen wããre go ne ndayn wo, jar kaŋ halge ne ndayn wo, jar lwaʼge ne ndayn wo, jar ndar wer ngel ma pel ne ndayn wo de jar sogway ɓayn maga riŋ wo nday ga nday joŋ ge peele waŋ Babilon gà. Á ma, nday ma ɓayn mono, laa we jag ɓaara wa.

¹⁰ Werga á car wo ne nday diŋ geteʼ ti ndarge nen wããre ɓaara no, sen nà ma kaŋ wer ɓay wo go maŋ ɓil hãã see tway ɓay no, nen maga ndi mo yee nen ɓay go day nday mo taw go.

¹¹ Ama wer jar maga hã wo soole ɓaara we ne jug mani waŋ Babilon no, day joŋ wo peele we ne hẽn no, ndi hã ge iggi yaŋ ne sir ɓaara no nen maga á mo jee wo ne day mo lag wo ni. Kay diŋ jag Manwuri.

¹² Ndi hay wãã te wããre sen la taw taw we ne Sedesiyas waŋ Juda pa ga : Hã we soole ɓay ne jug mani waŋ Babilon no, joŋ we peele ne hara de jar sir ɓen wo ni nday joŋ ge yaŋ tenen tiʼ i.

¹³ Wer mayse ga nday de jar sir ɓon nday taw go nen doo moslam, koŋne wo de bulfũŋ doo maga Manwur hay wããn ne wer jar maga day wo we joŋ peele ne waŋ Babilon gà no la?

¹⁴ Coʼ we sug jar ndar nen wããre Baa maga riŋ wo nday ga à joŋ ge peele ne waŋ Babilon gàn wo wa. Fen maga á ndar wo nen ɓe ne nday diŋ geteʼe.

¹⁵ Ndi hay laa ra wo gà. Kay diŋ jag Manwuri. Á ndar wo nen wããre geteʼ ga ti jag ɓi maga ndi mo yee nen ɓay go day ni nday mo taw go, nday lay, jar ndar nen wããre Baa maga ndar wo nen wããre ne nday mo lay.

¹⁶ Ndi hay wãã wããre ne jar siɗ jagn wo de jar ma ɓuyn gana : Manwur wãã ga : Coʼ we sug jar ndar nen wããre Baa ne nday ga ndar wo nen wããre ne nday day riŋ wo ga patala à fer ge yaŋ le de fẽẽre joŋre ma ɓil tiŋ mani Manwurn maga wo le go Babilon mono wo wa, werga fen maga á ndar wo nen ɓe ne nday diŋ geteʼe.

¹⁷ Laa we jag ɓaara wa, joŋ we peele ne waŋ Babilone ni nday joŋ ge yaŋ tenen tiʼ i. Wer mayse ga ɓi leegen la kol ge diŋ tabul la?

¹⁸ Hayga á yaŋ wo diŋ jar ndar nen wããre Baa noga wããre Manwur yaŋ jag ɓaara no, á mo tos wo Manwur Pantwayn nen maga fẽẽre joŋre maga gwaʼ wo ɓil tiŋ mani Manwur no, liŋ ni waŋ Juda, wo ɓi leege Jerusalem mono, à mo hoo ra wo go Babilon wa so.

¹⁹ Werga Manwur Pantway wãã ti dog tiŋ Baan wo, ti mangesããge no, ti ɓaale gesããgen wo de te fẽẽre maga wo de gwaʼge ɓi leegen la

²⁰ ga Nebukadnesar waŋ Babilon hay men ra la de maga se hoo Yekoniya je ni Yehoyakim waŋ Juda wo wo Jerusalem la wo go de ɓaara Babilon de jar kluuri ma Judan wo de ma Jerusalem wo ga :

²¹ Manwur Pantway, Baa ma Israyel wãã ti fẽẽre maga gwaʼ wo ɓil tiŋ mani Manwurn wo de maga gwaʼ wo liŋ ni waŋ Juda wo de ma ɓi leege Jerusalem ga :

²² À hoo ge ra wo go Babilone, day saara joŋ ge wo go ni hãã wo go ti wur maga ndi ur gi le ti re ɓaara, go ti wur maga ndi fer ge le hoo rage ma age de ɓaara ti ngel mo taʼ la no. Kay diŋ jag Manwuri.