JERMI 26 - Tupuri Bible

Wããre ti ɓlagge Jerusalem wo go de tiŋ Baa no

¹ Ti tĩĩgi wer waŋ mani Yehoyakim je ni Josiyas waŋ Judan mono, Manwur raw wãã wããre ne Jermi ga :

² Manwur wãã ga : Wo ooge ɓi feele tiŋ mani Manwur no day ni ndo fer wããre maga ndi wãã ra ne ndo mo ɓuy ga ndo mo wããn go ne jar maga a wo le ɓi leege ma Judan wo mo ɓuy leɗ monɗra ɓil tiŋ mani Manwurn go ne hara, naa mopo go see ɓe meʼ wa hase.

³ Tiga á coʼ ge wo sug sen yaŋ day wosela ɓuy men faage ɓe ma de ɓlagge yaŋ go layblaʼ no. Doo kay nono ndi fer yaŋ go jwag jag ɓi ti ɓlagge maga ndi hay ɗig ga ndi joŋ ra de ɓe wer debaycõõre ma nen joŋre ɓaaran wo mono.

⁴ Ndo wii gi ra ga : Manwur wãã ga : Hayga nday laa jag ɓi we ma seege ti jag liŋgi ɓi maga ndi hay ɓoʼ ne nday pel we gà

⁵ nday coʼ sug wããre maga weere jõõre ɓi jar ndar nen wããre ɓi maga ndi wo de lag rage noga ndi hay lag ra wo see ɓay de toŋ hãã we gà nday day coʼ sug ɓaara gà wããre ɓaara we gà pa no,

⁶ doo kay nono ndi joŋ ge tiŋ sen la doo maga ndi hay joŋ Silo nono, ndi kol ge ɓi leegen la yaŋ go diŋ fen faɗge jag wer jar ma ti tamsir wo ɓuy.

A kos Jermi go ma ʼwarge

⁷ Jar siɗ jagn wo, jar ndar nen wããre Baa gon wo de jarn ɓuy laa wo wããre maga Jermi hay wãɗ rage ɓil tiŋ mani Manwurn mono.

⁸ Day de maga Jermi hay go ɓoʼ jag wãã fen maga Manwur hay fer ne hẽn jag ga á mo wããn go ɓuy ne jarn wo ɓuy mono, jar siɗ jagn wo, jar ndar nen wããren wo de jarn wo ɓuy raw wo bagge ɓe day wo ga : ʼWarn go! ʼWarn go!

⁹ Wer mayse ga ndo wãã wããre ti jag Manwur ga tiŋn la kol ge go doo Silo nono day ɓi leegen la kol ge go diŋ tabul bay jar ɓil la? Jarn wo ɓuy raw wo le tayge ti Jermi ɓil tiŋ mani Manwur no.

¹⁰ De maga minisdir ma Judan wo wo laa fẽẽre sen wo mono, saara raw wo hooge le liŋ ni waŋ, wo wo ɓil tiŋ mani Manwur no day lag wo ti jag faage ma defay ma ti tiŋ mani Manwur no.

¹¹ Mo so no jar siɗ jagn wo de jar ndar nen wããren raw wo riŋ minisdirn wo de jar ma ɓuy wo ga : Bloo sen la go ma ʼwarge! Werga, a wãã ti ɓi leegen la doo maga nday laan de sug ɓay de see ɓay nono.

¹² Jermi day wii minisdirn wo de jarn ɓuy gana : Manwur hay ɓoʼ ndi le ndar nen wããre maga nday laa ra de sug ɓay mo ɓuy ti tiŋ sen wo de ɓi leegen lam no.

¹³ Patala mono, coo we faage ɓayn wo de joŋre ɓayn wo, laa we jag Manwuri, Baa ɓay no, ni Manwur fer yaŋ go jwag jag ɓe ti ɓlagge maga see hay wããn ti ɓay mono.

¹⁴ Ma ɓi ndi go mokay ɓi coo doo ɓay no, joŋ mbay ndi de fen maga nday kon de el nen ɓay mono.

¹⁵ Ane, ko we go ga nday ʼwar ndi we go no, nday kaŋ ti ɓay diŋ re cíi je ma bay re ti, nday lay, ɓi leegen la de jar ma ɓil ɓen wo lay. Werga, Manwur hay ɓoʼ ndi le kidolgi see ɓay ma wãã wããre se maga nday laa ra de sug ɓay la mo ɓuy no.

¹⁶ Minisdirn raw wo riŋ jar siɗ jagn wo de jar ndar nen wããren wo ga : À ʼwar bloo sen la go gà hase! A wãã wããre ne naa nà ti jag Manwuri.

¹⁷ Jar kluuri ma ɓil sir ni wo mbag kal wo hooge ciŋ day riŋ wo ngaɓa ma de taygen ga :

¹⁸ Mise ma Moresed hay wãã we ti kal mani Esekiyas waŋ Juda no day se hay riŋ jar sir Juda wo ɓuy ga : Manwur Pantway wãã ga : À jee ge Siyoŋ go doo pay nono, Jerusalem kol ge yaŋ go diŋ húulì de cor ɗugul ne kããra ti day húulì maga tiŋ mani Manwur ti ɓe kol ge yaŋ go diŋ ngel ma de gẽẽre ma de yooway ma ɗilig ti.

¹⁹ Day Esekiyas waŋ Juda wo de jar Juda wo ɓuy ʼwarn wo mbaara we go yawla? Esekiyas joŋ hẽẽne doo Manwur ga yawla? Á hay kam Manwuri gà yawla? Day doo kay no mono Manwur fer go jwag jag ɓe ti ɓlagge maga se hay wããn ti ɓaara mono. Naa de see naa, naa jãã ɓlagge ma kluu doosen no kay le ti naa wa!

²⁰ Bloo po hay yaŋ ndar nen wããre ti jag Manwur pa diŋ Uriyahu je ni Semayahu ma Kiryad-Yearim. Á hay ndar nen wããre ti ɓi leegen wo de sirn la diŋ de te wããre mani Jermi la taw taw pa.

²¹ Waŋ Yehoyakim de jar ɓe ma de egren wo ɓuy wo de minisdir ɓen wo ɓuy raw wo laa wããre sen wo day waŋ kal kiɗ faage maga se ʼwarn go. Uriyahu raw laage ɓe go, hẽẽne kal caage ɓe, se raw daŋge wo go Ejipte.

²² Waŋ Yehoyakim raw laa jar wer ɓe wo Ejipte, diŋ Elnatan je ni Akborn de jar ma tigriŋ wo wer ɓe wo Ejipte.

²³ Saara baa Uriyahu le Ejipte, a wo de ɓe ne waŋ Yehoyakim. Yehoyakim carn go de moslam day raw ɓoʼ húulí ɓe wo go ti tipaale ma ter jar ma ti sirn wo.

²⁴ Ane ma Jermi mono, Ahikam je ni Safan oo go ne hẽn ti, maŋ jag jar go nen maga à mo hãn go ne ngaɓan ɓi coo doo ma ʼwarge ɓe go wa.