JERMI 25 - Tupuri Bible

Daŋgay ma kiŋgi doo renam no

¹ Wããre maga Manwur wããn ne Jermi ti jar Juda wo ɓuy nen kiŋgi ma de naa maga Yehoyakim je ni Josiyas waŋ Judan hay ti waŋ mono, se hay nà diŋ kiŋgi ma taŋgu maga Nebukadnesar waŋ Babilon kol ti waŋ mo lay.

² Á diŋ wããre maga Jermi wããn ti jar Juda wo ɓuy, go pel jar ma de tiŋ Jerusalemn wo ɓuy. Se day ga :

³ Le nen kiŋgi ma de hwal ti swaʼ maga Josiyas je ni Amoŋ, waŋ Judan hay ti waŋ hãã go wara mono, kiŋgi joŋ go doo ɓog ti swaʼ maga Manwur hay wãã wããre ne ndi mono. Ndi fer mbi dogge ɓe ne nday pa gana : Hãã le de jag toŋ tuu ndi de wãã wããre ne nday day nday bay dayge laage ɓe wa.

⁴ Manwur hay lag weere jõõre ɓe jar ndar nen wããre ɓen wo wo see ɓay, á hay laa ra wo go de jag toŋ tuu, day nday laa laage ɓe gà nday day coʼ sug ma laage ɓe gà.

⁵ Á hay wãɗge ga : Wosela ɓuy mo fer le, mo men faage ɓe ma de ɓlaggen go, mo men debaycõõre ma nen joŋre ɓen wo go day ni nday mo lag ti tway maga Manwur hay hãn go ne nday de pããre ɓay wo ma tum mono.

⁶ Tay we de baa ma tigriŋ wo ma goŋ rage, ma leɗ monɗra pel ɓaara wa. Car we jiili ɓi go de joŋre ma doo ɓayn wo wa ni ndi joŋ ge nday de mopo gà lay.

⁷ Ama nday day coʼ sug ɓi gà maga nday mo car jiili ɓi go de joŋre ma doo ɓayn wo, ma kaŋ re ne see ɓay ti. Kay diŋ jag Manwuri.

⁸ Diŋ wersen Manwur Pantway wãã ga : Wer maga nday laa dayge coʼ sug wããre ɓin wo gà mono, ndi,

⁹ ndi ɓoʼ ge soole yaŋ wo wer moobe ma nen ɓaŋ gloŋhweden wo, ne Nebukadnesar waŋ Babilon wejõõ ɓi no. Kay diŋ jag Manwuri. Ndi hoo ge ra yaŋ le ne sirn la de jar ma ɓil ɓen wo ti, ne wer jar maga wo ti ɓe kara la ɓuy ti, nen maga á mo taw wo ra go, mo kol wo ra go diŋ fen ngil jare, diŋ fen feg ti, go diŋ tabul ma tum wo.

¹⁰ Ndi caa ge wer siŋ fruygin go ti yoo ɓaara de siŋ fruygi ma jag je ma de yãã wãyn wo de ma jag may maga à go de yããge ɓe mono. Á a laa ge sug roo niini gà lay, à ko ge poɗag lampa po gà lay.

¹¹ Sirn la kol ge yaŋ go diŋ tabuli, go diŋ ngel ma poɗag poɗage day wer jar sen wo la kol ge wo yaŋ go gebeere waŋ Babilon nen kiŋgi doo renam.

Baa ga se fer ge jar ɓen wo yaŋ le liŋ

¹² Ama, de maga kiŋgi ma doo renam bag ge wo jag we go no, ndi ur gi yaŋ le ti re waŋ Babilon wo de wer jar sen wo wer debaycõõre ɓaaran wo, ti re sir mani jar Kalden wo day ndi kol ge sir ɓaaran go diŋ ngel ma poɗag poɗag go ma tum.

¹³ Ndi a ge de fẽẽre maga ndi hay naa nen ɓaara go mo ɓuy ti sirn go ne hẽn ti, de fen po ɓuy maga go de yerge ɓil kefdern wo de fen maga Jermi hay naa nen ɓe go ti wer jar sen wo mo ɓuy go ne hẽn ti.

¹⁴ Werga, wer jar ma de egre wo de waŋre ma kluuri joŋ ge wo gebeere jar Kalde wo yaŋ lay day ndi poɗ ge ra ti joŋre ɓaaran wo, de ngaɓge degaʼ de joŋre ma doo ɓaara no.

¹⁵ Manwuri, Baa ma Israyel hay wãã ne ndi ga : Yãã kob yii sõõge ɓiln go ne ndi doo, hãn go ne wer jar maga ndi ɓoʼ ndo wo see ɓaara mo ɓuy ga á mo jo wo ne.

¹⁶ Daga á mo jo wo ne, mo ɓaʼ wo day mo loɗ wo go de maga á ko ge wo moslam maga ndi kaŋn ge ne hara ti we mono.

¹⁷ Ndi raw yãã kobn le go doo Manwuri day ndi raw hãge ɓe go ne wer jar maga Manwur hay ɓoʼ me wo see ɓaara mo ɓuy maga á mo jo wo ne.

¹⁸ Ndi hãn joge ne Jerusalem wo de ɓi leege ma Judan wo ɓuy, ne waŋre ɓen wo de minisdir ɓen wo, ma kol rage go diŋ tabuli, diŋ fen ngil jare, diŋ fen feg ti, diŋ fen faɗge doo maga á wara nono.

¹⁹ Ndi hãn ne Farawoŋ waŋ Ejipte, ne weere jõõre ɓen wo, ne minisdir ɓen wo de jar sir ɓen wo,

²⁰ ne sir ma nen wur bolawn ɓuy, ne waŋre ma ɓil sir Utsn wo ɓuy, ne waŋre ma ti sir Filistẽẽn wo ɓuy, ne Askaloŋ, ne Gasa, ne Ekron de jar maga gwaʼ wo Asdod mono,

²¹ ne Edom, ne Mohab wo de jar Amoŋ wo

²² ne waŋre ma Tirn wo ɓuy, ne waŋre ma Sidoŋn wo ɓuy de waŋre ma ti kaali maga wo wo go hãã nen maarog mono

²³ ne Dedan, ne Tema, ne Bus wo de jar maga har wo jeŋ piŋ ɓaara go mo ɓuy no

²⁴ ne waŋre ma ti sir Arabin wo ɓuy de waŋre ma nen wur bolaw maga wo wo de tiŋ ɓil puuli mono

²⁵ ne waŋre ma Simrin wo ɓuy, ne waŋre ma Elamn wo ɓuy de waŋre ma ti sir Medin wo ɓuy

²⁶ ne waŋre ma nen ɓaŋ gloŋhweden wo ɓuy, ma see kããra hãã hãã noga mbaŋ mbaŋn wo, ne sir waŋre ma ti tamsirn ciŋ ti sirn lan wo ɓuy, day waŋ Sesag jo ge blam ɓaara ɓuy.

²⁷ Ndi wii gi ra ga : Manwur Pantway, Baa ma Israyel wãã ga : Jo we, taɗ we go day dug we go duggi! Leɗ we go gesiŋ ni nday hoo go ciŋ de maga nday ko ge moslam we le age ne nday ti mo wa!

²⁸ Day hayga á day wo we yãã kobn go mo doo ma joge gà no, ndo riŋ gi ra ga : Manwur Pantway wãã ga : Jo we! Jo we!

²⁹ Werga, ndi caa ge jag kaŋ reen nà ne ɓi leege maga à tos ndi ne hẽn ti mono day nday, nday gwaʼ ge go bay re ti so yawla? Nday joŋ ge go bay re ti gà gà! Ndi kaŋ ge moslam nà diŋ ne jar ma ti tamsir wo ti ɓuy. Kay diŋ jag Manwur Pantway no.

³⁰ Ma ɓon mono, ndo ndar ge nen fẽẽre sen wo ge go ne hara ɓuy day ndo riŋ gi ra ga : Manwur le de bũũgi ciŋ, a le de ngar jag le ti ngel hayle ɓe ma bay ɗagn hãã. A bũũ le see jar maga wo ɓi tway ɓen mono, á ngar jag doo jar maga wo ti ngel yuɗ yii nono ti jar ma ti tamsir wo ɓuy.

³¹ À laa ngarge jag ɓen wo go ti jag sir tawge ɓuy werga Manwur de yiŋ kiida de wer jar wo ra, á de cag re de jar téebeere wo ɓuy. Á kaŋ jar hãyhãy wo jag moslam. Kay diŋ jag Manwuri.

³² Manwur Pantway wãã ga : Ko we ga re po yaŋ seege. A yaʼ ti wer jar ma la, yaʼ ti wer jar ma la. Gur-leege ma kluu yaŋ le de urgi le ti jag sir tawge!

³³ Jar maga Manwur ʼwar ge ra go ti wur sen go ti tamsir ɓuy joŋ ge mbaara go deŋ koɗe, je joŋ húulí ɓaara joŋ ge gà à hoo ge ra gà jobo tee ge ra gà. Á kol ge wo yaŋ diŋ fen rum ngele.

³⁴ Hrag we ware, nday jar koɗge no, ʼwad we ware! Blul we go gesiŋ nday jar seege pel kaw horogn wo no! Werga wur a go maga à ngaɗ nday go, à dus nday go, nday leɗ ge yaŋ go gesiŋ debaywoore doo mopo ma de woore maga ɓoʼ foo go gesiŋ nono.

³⁵ Ngel yãã waŋ jar koɗgen bay wa! Ngel yoŋre jar seege pel kaw horog bay wa!

³⁶ Laa we roo jar koɗgen wo de war jar seege pel horogn wo no! Werga Manwur glab ngel koɗ horog ɓaaran go.

³⁷ Ngel mbar ti horog ma flãyflãy wo go seɗemɗem doo bagge põõ ma de hãã mani Manwur no.

³⁸ A tob tiŋ ɓen go doo wel mingir men tuu ɓen go mono, werga sirn kol go diŋ ngel ma poɗag poɗage wer ɓil sõõge mani je ɓlag jar no, doo bagge põõ ɓe ma de hãã no.