JERMI 24 - Tupuri Bible

Kerge ma ɓogn wo

¹ Manwur raw mbuɗ nen ɓi de kerge wo ɓog de leʼge hõõ wo ɓili, wo de laage lag jag tiŋ mani Manwur no. Sen nà blam maga Nebukadnesar waŋ Babilon wo go de hoo Yekoniyahu je ni Yehoyakim waŋ Juda no, minisdir ma Judan wo, jar ceɗ kooren wo de jar ʼwũy jag tiŋ wo wo go Jerusalem la day raw wo go de ɓaara Babilon mono.

² Kerge ma boŋn de leʼge hõõ ma de el debaŋ wo ɓil doo leʼge hõõ maga leʼ wo go taŋgu ti wur ɓe mono. Kerge ma lan de leʼge hõõ ma de ɓlagge has wo ɓili, go diŋ leʼge hõõ ma de ɓlagge go has tuu bay maga jobo baa jag ni wa hase.

³ Manwur kal riŋ ndi ga : Jermi, nen ɓo de ko mayse la? Ndi raw ferge ga : Diŋ leʼge hõõ wo. Diŋ leʼge hõõ ma de el ma de eln wo tuu lay, lan diŋ leʼge hõõ ma de ɓlagge wo go has tuu ga à kãã ma baa jag ti ɓaara gà wer maga á wo go de ɓlagge has tuu mo lay.

⁴ Manwur raw fer wããre ne ndi doo kay nono ga :

⁵ Manwuri, Baa ma Israyel wãã ga : Doo maga à joŋ leʼge hõõ ma de eln wo nono, ndi kaŋ ge nen ɓi yaŋ de el ti jar Juda maga ndi hoo ra wo go ti ngel mo taʼ la day ndi laa ra wo go ɓil sir mani jar Kalden wo mono.

⁶ Ndi kaŋ ge nen ɓi yaŋ ti ɓaara de ele, day ndi fer ge ra yaŋ le ɓil sirn la. Ndi gẽẽ ge ra yaŋ ciŋ day ndi ɓlag ge ra go gà so hase. Ndi tõɗ ge kããge ɓaara yaŋ go gesiŋ day ndi ndar ge ra go gà so hase.

⁷ Ndi hã ge jiili yaŋ ne hara maga á mo ko wo ndi ga ndi diŋ Manwuri. Hayga á fer wo we le see ɓi go de jiili ɓaara ɓuy no, á joŋ ge wo yaŋ diŋ jar ɓi day ndi joŋ ge yaŋ diŋ Baa ɓaara lay.

⁸ Doo maga à joŋ leʼge hõõ ma de ɓlaggen wo ga jobo baa jag ti ɓaara gà has werga á wo go de ɓlagge has no mono, Manwur wãã lay ga : Ndi joŋ ge Sedesiyas waŋ Juda, minisdir ɓen wo de te jar Jerusalem ma lan wo, jar maga gwaʼ wo ɓil sir la de maga wo wo go de tiŋ ɓil sir Ejipte wo nà doosen no lay.

⁹ Ndi kol ge ra yaŋ go diŋ jar joŋ hẽẽne, jar kaŋ re ne sir waŋre ma ti tamsir wo la ti ɓuy, ndi kol ge ra go diŋ fen sõõre, diŋ fen mbuɗ foo, diŋ fen feg ti, diŋ fen faɗge ti ngel maga ndi kaŋ ge doo wo go ne hara ni mo ɓuy no.

¹⁰ Ndi kaŋ ge moslam, koŋne wo de bulfũŋ wo yaŋ ne hara ti hãã saara yee nen go ti tway maga ndi hay hãn ne hara de pããre ɓaara wo mono.