JERMI 23 - Tupuri Bible

Re ti jar koɗ jar ma bay tin wo no

¹ Re ti jar koɗge maga yeɗ wo horog ma ɓil kaw ɓin wo go day dus wo ɓil ɓaara go mono! Kay diŋ jag Manwuri.

² Diŋ wersen Manwuri, Baa ma Israyeln wãã ti jar koɗge maga wo de koɗ jar mani ɓin wo ga : Nday dus sããre ɓin wo go, nday niɗ ra wo go day nday ko ngar ɓaara gà. Ko we ga ndi ur gi yaŋ de ɓay wer debaycõõre ma nen joŋre ɓayn wo. Kay diŋ jag Manwuri.

³ Ndi fer ge yaŋ le tay ti sããre ɓi maga sen gwaʼ ge wo yaŋ le ɓil sir maga ndi hay niɗ ra wo go ni mo ɓuy no. Ndi fer ge ra yaŋ le ɓi glaŋ ɓaara no, á biŋ gi wo yaŋ day tes ge wo yaŋ.

⁴ Ndi lag ge jar koɗge ma koɗ rage wo yaŋ jag ɓaara, hẽẽne joŋ ge ra gà so. Á daɗ ge wo ge gà so hase, day maapo boŋ yoo ɓaara gwaʼ ge le go gà. Wããn diŋ Manwuri.

⁵ Wur yaŋ wo le age, kay diŋ jag Manwuri, ti wursen mono, ndi jaw ge kããge ma ti ngel ɓen yaŋ ne Dafidi, á joŋ ge yaŋ diŋ waŋ, day se gẽẽ ge yaŋ ciŋ. A joŋ ge mo ma de deele wo de fen ma keɗedn yaŋ ɓil sir no.

⁶ Ti kal mani ɓen mono, Juda yãã wo yaŋ go, Israyel lag ge wo yaŋ go de yõõ ti liŋ ni ɓaara. Mokay diŋ ɗúu maga à ɗen ge de ɓe mono : Manwur diŋ keɗed wùr no.

⁷ Diŋ wersen so wur yaŋ wo le age, kay diŋ jag Manwuri, ti wur sen mono à wãã ge ga : Manwur yaŋ tenene, hay laa jar Israyel wo le go ɓil sir Ejipte nà diŋ se gà so.

⁸ A wãã ge ga : Manwur yaŋ tenene! Hay laa wer mani Israyeln wo le go ɓil sir ma nen ɓaŋ gloŋhweden wo de sir maga ndi hay nii ra wo go ni mo ɓuy day fer ra le nà diŋ se! Day saara laa ge tiŋ yaŋ go ɓi sir ɓaara no.

Re ti jar ndar nen wããre Baa gon wo no

⁹ Jiili ɓi caa go, hm ɓi wo ɓuy daɗ wo ndi ti re jar ndar nen wããre Baa gon wo. Ndi go doo jobo ma de taage nono, doo jobo maga yii go de raw egre ɓe nono, wer Manwur wo de wããre ɓe ma bay ɗagn wo no.

¹⁰ Werga sirn go de bà ɓil de figliw, sir go nen lawge wer jar ɓen wo. Ngel koɗge ma ɓil puulin hig wo go. À ɗee nà wer ɓlagge no, egre jar bay hooge wa nà ti joŋge hram boŋ tuu.

¹¹ Jar ndar nen wããre Baa gon wo de jar siɗ jagn wo go de glubgi, ɓil tiŋ mani ɓin draʼ ndi hay daʼ debaycõõre ɓaaran go ni. Kay diŋ jag Manwuri.

¹² Diŋ werseno, faage ɓaara ndar ge ndarda yaŋ de ɓaara, á joŋ ge yaŋ go nen suŋgu. À srog ge ra yaŋ day saara leɗ ge yaŋ. Werga ndi a ge yaŋ de re ne hara ti ti kal maga ndi ur gi le de ɓaara mono. Kay diŋ jag Manwuri.

¹³ Ndi hay ko fen mbar ɓaale jar wo see jar ndar nen wããre Baa ma Samarin wo. Á ndar wo nen wããre ti jag Baale, day saara yeɗ Israyel jar mani ɓin wo go.

¹⁴ Ama see jar ndar nen wããre ma Jerusalemn wo mono, ndi hay ko fẽẽre ma horge see wo ni. Á wo diŋ jar figliw, á see wo diŋ ti geteʼe. A far wo doo jar ma joŋ ɓlaggen wo ciŋ nen maga jobo yoo ɓaara mo fer ɓod jag go ti hãyhãy ɓen wa. Á wo nen ɓi doo Sodom nono, jar ma ɓi leege Jerusalem wo doo jar Gomor wo nono.

¹⁵ Diŋ wersen Manwur Pantway wãã ti jar ndar nen wããren Baa gon wo ga : Ndi hã ge gur geɓer yaŋ go ne hara ma rege, ndi hã ge bii yaŋ go ne hara de mopo nene werga glubgin yãã sirn go ɓuy nà wer jar ndar nen wããre Baa ma Jerusalemn wo.

¹⁶ Manwur Pantway wãã ga : Laa we wããre jar ndar nen wããre Baa maga ndar wo nen wããre ne nday mo wa! A jãɗ wo nday, á sii wo diŋ lwaʼge ma ti ɗiggi ɓaara, bay diŋ fen maga a le jag Manwur wa.

¹⁷ Á yor wo bà ma wiɗ jar ma mbuɗ foo ɓin wo pa yaw gana : Manwur wãã ga nday daʼ ge jam yaŋ. A wãã wo ne je maga sen da seege doo ga ɓil ɓe da nono gana : Re po caa ge ndo gà hase!

¹⁸ Wose hay tay wo we ɓoʼ ti wããre de Manwur ma ko wããre ɓe no noga ma laa ge ɓe le go la? Wose hay hay we coʼ sug wããre ɓe no day laan le go de sug ɓe la?

¹⁹ Gur-leege mani Manwur le de urgi, sõõge ɓil ɓen go de ur ti á diŋ leege baa, a de kiigi ti jar hãyhãy wo.

²⁰ Baage põõ mani Manwur taw ge go gà say se joŋ noga baa jag ɗiggi ɓe ma ɓil ɓen wo go ɗa. Day ge go ti tawge nawn wo mono, nday joŋ ge yaŋ de ti ngel werseno.

²¹ Ndi hay laa jar ndar nen wããre sen wo gà á hoo mbaara ɗeere tuu. Ndi hay wãã mopo ne hara gà á raw mbaara ndar nen wããre Baa tuu.

²² Á de hay tay wo we ɓoʼ ti wããre de ɓi no, á de fer wo wããre ɓin wo yaŋ ne jar ɓin wo day de fer wo ra yaŋ le maga á mo men wo seele ɓaara ma de ɓlaggen wo go de debaycõõre ma nen joŋre ɓaaran wo.

²³ Ndi diŋ Baa nà de maga ndi mbaŋ see jar mo tawa yawla? Kay diŋ jag Manwuri. Ndi bay diŋ Baa de maga ndi le go hãã mo wa an yawla?

²⁴ Jobo yoŋ yaŋ mbe go ti ngel ma de yoŋre nen maga ndi kon gà yawla? Kay diŋ jag Manwuri. Ndi bay go de baa ngel ma ciŋ wo de ma gesiŋ wa yawla? Kay diŋ jag Manwuri.

²⁵ Ndi hay laa wããre ma jag jar ndar nen wããre ma ndar nen wããre ti ɗúu ɓin de carge geteʼ nen ga : Ndi hay lwaʼ we! Ndi hay lwaʼ we!

²⁶ Jar ndar nen wããre sen joŋ ge wo ndar nen wããre de geteʼ ma ɓil ɓaara noga de hila ma ɓil ɓaara nà hãã hun mo so la?

²⁷ A ɗig wo nà ga saara kaŋ wer jar mani ɓin wo go yõõ ti ɗúu ɓi de lwaʼge ɓaara maga saara lag ferge ɓe ne kããra doo ga pããre ɓaara hay yõõ wo ti go ti ɗúu ɓi wer Baal no lay no.

²⁸ Daga je ndar nen wããre maga hay lwaʼ we mo sii jag lwaʼge ɓen go, day je maga de wããre ɓin jag mo homn go ti ngel ɓe keɗede. Á á bay nen tay hoolen go nen cooren wa. Kay diŋ jag Manwuri.

²⁹ Wããre ɓin bay doo wùu no wa yawla? Kay diŋ jag Manwuri. Á nà bay doo big maga mbug húulì no wa yawla?

³⁰ Diŋ wersen so ga ndi bay de sãy jar ndar nen wããre se ga joŋ wo freŋ wããre ɓin wo se kããra mo wa mono! Kay diŋ jag Manwuri.

³¹ Ndi bay de sãy jar ndar nen wããre se maga car wo wããre jag ɓaara ga saara de naa nen wããre Baa po ne jar mo wa! Kay diŋ jag Manwuri.

³² Ndi bay de sãy jar maga ndar wo nen wããre maga siɗ wo diŋ jag lwaʼge geteʼ wo, wãɗ wo ra day yeɗ wo jar ɓin wo go de geteʼ ɓaaran wo de jag tawgi ɓaaran wo mo wa. Ma ɓi mono, ndi bay de laa rage wa, ndi hay fer jag ɓi ne hara gà lay day saara bay diŋ jar ma kay jar ɓin wo ti mopo meʼ wa hase. Kay diŋ jag Manwuri.

³³ Hayga jar sen wo la noga je ndar nen wããre po, noga je siɗ jag po wii ndo we ga re maga Manwur kaŋn ge ne jar ti nà diŋ mayse la no, ni ndo kaŋ nen ɓaara ti re sen gana : Ndi tob ge nday go. Wããn diŋ Manwuri.

³⁴ Day je ndar nen wããre po, je siɗ jag po noga jobo ma yoo jar po wãã ge we ga re maga Manwur kaŋn ge ne jar ti diŋ ma kay no no, ndi joŋ ge je sen yaŋ go de gùr de tiŋ mani ɓe no.

³⁵ Nday wãɗ ge mbay yaŋ, wosela ɓuy ne kan ɓe, wosela ɓuy ne hẽn ɓe gana : Manwur hay wãã re nà gahãyla? Manwur hay wãã nà gahãyla?

³⁶ Ane nday tĩĩ ge ɗe ɗúu re mani Manwurn jag ɓay gà hase werga re mani Manwur maga leʼ ge ne wosela ti nà diŋ wããre ma jag wosela ɓuy de see ɓe tuu. Nday dĩɗ wããre Baa ma tenenn go, wããre mani Manwur Pantway, Baa naan go.

³⁷ Ndo wii gi je ndar nen wããren ga : Manwur fer wããre ne ndo gahãyla? Manwur wãã mayse mo la?

³⁸ Day hayga nday wãã we pa ga : Re mani Manwurn no, ni mokay diŋ fen maga Manwur wããn mono : Wer maga nday wãɗ doo kay nono ga : Re mani Manwur no, ni paga ndi hay ɓoʼ jobo mbe wo go riŋ nday ga nday mo wãɗ ga : Re mani Manwurn gà lay mono,

³⁹ Wersen so, ko we go ga ndi ndar ge doo yaŋ go see ɓay has hase, ndi kaŋ ge doo yaŋ wo go ne nday hãã see ɓi, nday de ɓi leege maga ndi hay hãn go ne nday de pããre ɓayn wo mono.

⁴⁰ Ndi kaŋ ge sõõre ma tum yaŋ ne nday ti, diŋ lasge ma kluu ma tum maga yõõ ge ti jobo go gà hase mono.