JERMI 22 - Tupuri Bible

Wããre ne tiŋ mani waŋ Juda no

¹ Manwur wãã ga : Wo liŋ ni waŋ Juda ni ndo wãã wããre ma kay la wo ni.

² Ndo wãã ge ga : Laa wããre Manwuri, ndo waŋ Juda maga de hayle ti paale waŋ mani Dafidn mono, nday de weere jõõre ɓon wo de jar sir ɓon wo, nday maga nday laa le ti jag tiŋ sen wo lam no!

³ Manwur wãã ga : Joŋ we diŋ fen ma ti faage ɓen wo de mo ma keɗed no, yãã we je maga à de ma joŋ nen ɓe go doo je joŋ bon jar no, joŋ we bon je maga bay diŋ wel biŋni wa wo de wel holgen wo de wãy dewurn wo wa. Yãɗ we fẽẽre jar de waŋ wa, kaa we cíi jobo go de koɗ ti ngel mo taʼ la wa.

⁴ Werga, hayga nday lag we ti jag wããre sen wo no, waŋre ma lagge ti paale waŋ mani Dafidn laa ge wo yaŋ le ti jag tiŋ se kaʼ la no, wo de ɗidgi ti pus durgi wo de piiri wo, saara de weere jõõre ɓaaran wo de jar sir ɓaaran wo.

⁵ Ama hayga nday coʼ sug wããre sen wo we gà no, ndi hãʼ go de see ɓi tuu ga tiŋ se kaʼn la kol ge yaŋ go diŋ tabuli. Kay diŋ jag Manwuri.

⁶ Werga, Manwur wãã ti tiŋ mani waŋ Judan ga : Ndo nen ɓi doo sir Galaad nono, doo tipẽẽge ti húulì Libaŋ nono, day cwãy kidolgi ndi kol ge ndo yaŋ go diŋ ngel ma poɗag poɗage, go diŋ ɓi leege ma bay jar ɓili.

⁷ Ndi le go de hoo jar frum jar wo le go sagsag ne ndo ti, wosela ɓuy de fẽẽre durgi ɓe wo doo. Á car ge wo koore Seder ɓo ma de daŋ kããra wooren wo yaŋ go, ɓod ge wo ra yaŋ go gesiŋ de wùu.

⁸ Wer jar wo debaŋ hee ge wo yaŋ ti jeŋ ɓi leegen la day wiɗ wo kããra yaŋ gana : Wer mayse ga Manwur joŋ ɓi leege se ma kluun go de gùr doosen no la?

⁹ Day à fer ge yaŋ ga : Wer maga á blaw wo tayge jag de Manwuri, Baa ɓaaran go, wer maga á hay leɗ wo monɗra pel baa ma tigriŋ wo day goŋ wo ra mono.

¹⁰ Ra we je maga huu go mo wa, lawn we wa lay. Ra we, ra we diŋ je maga raw mono, werga á fer ge le gà so hase. Á ko ge sir maga se biŋ ni ge de nen ɓe gà so hase.

¹¹ Werga, Manwur wãã ti Salum je ni Josiyas waŋ Juda maga hay joŋ waŋ ti ngel pan ɓe Josiyas day men ngel ma taʼ la go mono ga : Á fer ge le la gà so hase.

¹² A huu gi wo go ti ngel maga à baan wo go ti daŋgay ni mono day se ko ge sirn la de nen ɓe gà so hase.

¹³ Re ti je maga boo tiŋ ɓen diŋ de fen hram day gẽɗ tiŋ ɓen wo ciŋ de faage ma bay blam mono! Re ti je maga baa kan ɓen ti joŋre de koɗ koɗe day hã poɗge ɓen ne hẽn gà mono!

¹⁴ Re ti je maga wãã ga : Ndi boo ge tiŋ ɓin kluu debaŋ, ndi car ge jag ɓen wo go kluuri, ndi car ge feneder wo ti ɓe, ndi her ge koore seder wo ti ɓe day ndi kor ge mo ma de sẽẽ go ne hẽn see mono!

¹⁵ Ndo de hayle ti waŋn nà diŋ werga ndo da koo seder mo yawla? Pan ɓo hay bay rege noga joge wa yawla? Ane á hay joŋge diŋ mo ma ti faage ɓe no, diŋ fen ma keɗed no day fẽẽren ɓuy hay wo seege doo ɓe de ele.

¹⁶ Á hay cag re je gayre wo de je coon wo go ne hara day fẽẽren ɓuy hay wo seege doo ɓe de ele. Mokay diŋ maga jobo de ko ndi mo tuu gà yawla. Kay diŋ jag Manwuri.

¹⁷ Ma ɓo ndo de nen ti, ndo de jiili nà diŋ ma kiɗgi jag ɓo, ma kaa cíi je maga bay re tin go, ma joŋ bon jar de hãã doo kay nono.

¹⁸ Diŋ wersen Manwur wãã ti Yoyakim je ni Josiyas waŋ Judan ga : À raa ge húulí ɓe gà jobo riŋ gi ga yaya wegema, yaya mayregema gà. À raag e húulí ɓe gà jobo riŋ gi ga yaya waŋ, yaya je kluu no gà.

¹⁹ Húulí ɓe joŋ ge doo húulí gerhẽẽ nono, à kogn ge yaŋ wo go day à ɓoʼn ge yaŋ wo go faale kor ma Jerusalem no.

²⁰ Ɗii ti húulì Libaŋ ni ndo ra! Wo ʼwad war wo ti húulì Basan! Wo rage ti tipẽẽge ti húulì Abarim! Werga jar maga hay wo da ndo mo ɓuy à taw ra we go.

²¹ Ndi hay riŋ ndo ti wur maga ndo yõõ ti go mono, ndo kal ga ndo coʼ sug gà hase. Seele ɓo le hãã ti jõõ ɓo nà doosen nono, ndo bay laa jag ɓi wa.

²² Leege raw ge yaŋ de jar koɗ ndon wo day jar maga hay wo da ndo raw ge wo yaŋ ti daŋgay. Sõõre joŋ ge ndo yaŋ day ndo cog ge ti yaŋ go gesiŋ wer hãyhãy ɓon wo ɓuy ge nà de sen so.

²³ Ndo maga ndo le go de laa tiŋ ciŋ ti húulì Libaŋ day peŋ ɓon le ciŋ ti koore seder wo mono, ndo ndum gi bà nà ndumgi de maga cegè seen wo de horge cuɓcuɓ a ge wo we ne ndo ti doo wãy maga de biŋgi mo so la!

²⁴ Ndi yaŋ tenene! Kay diŋ jag Manwuri. De maga Koniyahu je ni Yehoyakim, waŋ Judan mo hay bà diŋ boo ma de heege ti wedoo ɓi ma warn layblaʼ no, ndi naan ge mbi go.

²⁵ Ndi hã ge ndo go ne jar maga da wo taw naw ɓo go doo, go ne jar maga ndo daɗ doo ɓaara doo, go ne Nebukadnesar waŋ Babilon doo, go ne jar Kalde wo doo.

²⁶ Ndi laa ge nday yaŋ wo go de man ɓo maga hay biŋ mo wo go ɓil sir se ma tigriŋ ga nday biŋ le ni gà mono, day nday huɗ gi wo go ni.

²⁷ Ama ma sir maga á joŋ ge wo de sãy ferge le ni mono, á fer ge wo le ni gà so.

²⁸ Ɓa Koniyahu sen nà diŋ fodo mopo maga go de mbuɗ foo noga go de hrag nen yawla? A nà diŋ fen po maga à bay keege ɓe meʼ wa so has yawla? Wer mayse ga à lag ra wo go de jar ni ɓe, à ɓod ra wo go ɓil sir maga á bay wo de koge ɓe wa la?

²⁹ Tamsiri, tamsiri, tamsiri, laa wããre Manwur no!

³⁰ Manwur wãã ga : Yer we bloo sen la go yoo jar ma bay weeren wo, go doo je maga sii ti ti boŋ nen tenen ɓe gà nono, werga yoo jar ni ɓe wo mono jobo boŋ sii gi ti ma hayge ti paale waŋ mani Dafidn noga hay wãã wããre sir Juda gà.