JERMI 21 - Tupuri Bible

Wããre ne Sedesiyas waŋ Juda

¹ Wããre maga Manwur wããn ne Jermi de maga Sedesiyas laa Pakhur je ni Malkiyan wo wo see ɓe de Sofoni je ni Maaseya je siɗ jagn mono. Á hay laa ra wo ma riŋgi ɓe ga :

² Wii jag Manwur ne naa ɗala werga Nebukadnesar waŋ Babilon de dur naa mono, tiga Manwur joŋ mopo yaŋ doo fen mbuɗgi see naa maga á mo maŋ ɓil wo go see naa layblaʼ no.

³ Jermi kal ferge ne hara ga : Nday wo ge wii Sedesiyas ga :

⁴ Manwuri, Baa ma Israyel wãã ga : Ko we ga ndi laa ge fẽẽre durgi ma doo ɓayn wo yaŋ go ne nday gesiŋ doo, fẽẽre durgi se ga nday de dur waŋ Babilon wo de jar Kalde maga wo de kaŋge ne nday jag le go faale korn wo mono, day ndi laa ge ra yaŋ le ɓi leegen lam no.

⁵ Ndi dur gi nday yaŋ de see ɓi, ndi maŋ ge doo ɓi ma de egren yaŋ ciŋ see ɓay nen bagge põõ, nen ɓil sõõge, nen caage jiili ma debaŋ ne nday ti.

⁶ Ndi hã ge pũũri yaŋ ne jar ma ɓi leegen wo la, ne jar téebeeren wo de horogren wo. Á huɗ gi wo go doo bulfũŋ ma kluu.

⁷ Kay diŋ jag Manwur so : Blam sen mono, ndi kaŋ ge Sedesiyas waŋ Juda wo de weere jõõre ɓen wo, jar sirn wo de jar ma ɓi leegen la ga gwaʼ ge wo jag bulfũŋ wo yaŋ go ne moslam wo de koŋne jage. Ndi hã ge ra go ne Nebukadnesar waŋ Babilon doo, go ne jar hee ɓaaran wo doo, go ne jar maga da wo taw rage go doo, day saara car ge ra yaŋ go de moslam. Á ko ge wo decoo ɓaara meʼ gà lay, baa ge wo doo ɓaara see ɓaara meʼ gà lay.

⁸ Ma jar ma ɓuy mono, ndo wii gi ra ga : Manwur wãã doo kay nono ga : Ko we, ndi laa faage tenen wo de faage húulì ne nday pele.

⁹ Je maga hay ge we ɓi leegen la moslam, koŋne wo de bulfũŋ tawn ge go, ama je maga kal we go ma hã see ɓe go ne jar Kalden maga wo de kaŋge ne nday jag mono, je sen joŋ ge yaŋ tenen caw, tenen ɓen joŋ ge diŋ daʼge ɓen tuu.

¹⁰ Werga ndi mbuɗ nen go patala de ɓi leege sen la ma joŋge ɓe de ɓlagge bay de el wa so. Kay diŋ jag Manwuri. Ndi hã ge ɓi leegen la go ne waŋ Babilon doo, day se hee ge wùu go ne hẽne.

¹¹ Ndo riŋ gi jar ma liŋ ni waŋ Juda wo ga : Laa we wããre Manwur no!

¹² Nday tiŋ mani Dafid no, Manwur wãã ga : Cag we kiidan ti ngel ɓe le hãã de jag toŋ tuu, day yãã we je maga à de ma joŋ nen ɓe go doo je joŋ bon kããra no, day la sõõge ɓil ɓin doʼ wùu day giŋ go hãã je ii jag ɓe joŋ ge gà á joŋ ge nono nà wer debaycõõre ma nen joŋre ɓayn wo.

¹³ Ndi ur nà de ɓo so, ndo ma de hayle ɓil log no, ndo ma de hayge ti húulì ma ɓil ful no. Kay diŋ jag Manwuri. Ndi ur nà de ɓay so nday maga nday wãɗ ga wose ur gi le dur nday noga wose kal ge wo ɓi tuu wer ɓay la mono.

¹⁴ Ndi ur gi le de ɓay nà wer leʼge joŋre ɓayn wo. Kay diŋ jag Manwuri. Ndi doʼ ge wùu yaŋ yooway ɓay no day se roɗ ge ti ɓay yaŋ go kara ɓuy.