JERMI 20 - Tupuri Bible

¹ Je ni Imer, Pakhur je siɗ jag maga diŋ waŋ jar wãã re tiŋ mani Manwurn raw laa wããre maga Jermi hay ndar nen ɓe ti fẽẽre sen wo mono.

² Pakhur raw maʼ Jermi je ndar nen wããre Baa go no, raw ɓoʼge ɓe ti paglam ti jag tiŋ ma nen ciŋ mani Benjamen wo ɓil tiŋ mani Manwur no.

³ Ama go toŋ ɓe mono, Pakhur raw naa Jermi le go jag paglam no, Jermi kal riŋgi ɓe ga : Ɗúu maga Manwur kaŋ ne ndo bay diŋ Pakhur wa so ama diŋ Magor-Masabib.

⁴ Werga, Manwur wãã ga : Ko so ga ndi kaŋ ge hẽẽne ne nday ti de bar ɓon wo. Moslam ma doo jar hee ɓaaran sraʼ ge wo ra yaŋ go gesiŋ day nen ɓo kon ge yaŋ. Ndi hã ge sir Juda go ɓuy ne waŋ Babilon ɓi coo doo, se hoo ge ra yaŋ wo go Babilone day car ge ra yaŋ go de moslam.

⁵ Ndi hã ge fẽẽre ma de tayge ɓi leegen la ɓuy wo yaŋ go ne hara de fen maga á daʼn wo le de joŋre ɓaaran mo ɓuy, de fen ɓe ma de eln ɓuy. Ndi hã nen horog waŋre ma Judan wo yaŋ go ne jar hee ɓaaran wo doo, saara frum ra yaŋ go, horge ge wo ra yaŋ go day soɗ ge wo ra yaŋ wo go Babilone.

⁶ Day ndo ma ɓo Pakhur mono, nday de jar ma liŋ ni ɓon wo mo ɓuy nday raw ge yaŋ wo go ti daŋgay. Ndo raw ge wo go Babilone, ndo huu gi wo go ni day à tee ge ndo wo go ni, ndo lay bar ɓo maga ndo hay ndar nen wããre maga bay cwãy wa ne hara mo lay.

Jermi yaʼ ngrum jage

⁷ Manwuri, ndo hay jãã jag ɓi day ndi men see ɓi jãã jage. Ndo hay baa ndi day ndo naa blum ɓi go. Tum de jag toŋ ndi de lasge, jar ɓuy de fegge ti ɓi.

⁸ Werga, tum de maga ndi wãã wããre mono, ndi ngar jage, day ndi wãã go kloŋ ga : Hãyhãy no, ɓlagge fẽẽre no! Day wããre Manwurn kol go see ɓi diŋ fen maga à las ndi wer ɓe, à sii fegge ti ɓi hẽẽ.

⁹ Ndi mo riŋ bà ga ndi ɗen de jag ɓi gà so, ndi wãã wããre ti ɗúu ɓe gà so, a le ɓil ɓi doo wùu maga de roɗge nen hm ɓi wo nono. Ndi gay ga ndi ɓeg jag ti ɓe ama ndi kãã gà.

¹⁰ Werga ndi de laa wããre ma de ɓlagge ma ti ɓin wo jag jar ngaɓa ga : A ga hẽẽne go ti ngel ɓuy bla! Frãy we nen ɓe go! Naa ɓoʼ wer geteʼ ɓen go! Jar maga wùr hay go jam de kããra mo ɓuy wo de gorge ga ndi leʼ nà hunla lay. A kiɗ wo ɓaaran ga saara mo hãy ndi go, saara mo naa blum ɓi go ni saara mo saʼ hee see saara go!

¹¹ Ama Manwur yaŋ mbe see ɓi doo blum durgi ma de egre nono, diŋ wersen jar joŋ bon ɓin leɗ ge wo go gesiŋ, á naa ge wo blum ɓi gà. Sõõre joŋ ge ra yaŋ ti maga á leʼ ti doo ɓaaran no gà mono, á joŋ ge diŋ sõõre ma tum maga à yõõ ge ti ɓe go gà has mono.

¹² Manwur go de lam ɗiggi je ma keɗedn de ele, á ko ɗiggi jar wo de jiili jare. Ndi ko ge saʼge hee ɓon yaŋ go see ɓaara werga ndi hay men re ɓin nà ne ndo doo.

¹³ ʼWaa we siŋ ne Manwuri! Togoɗ we Manwuri! Werga á yãã tenen je coon go doo jar joŋ debaycõõren wo.

¹⁴ Daga wur maga ndi biŋ ti wur sen mo hay go de faɗge! Daga wur maga man ɓi biŋ me go wur sen mo hay de bosaʼ ti wa!

¹⁵ Daga je maga hay nduu riŋ pan ɓi de wããre ma de cõõre sen ga à biŋ wel ma twar we ne hẽne day fruy ɓil ɓe go debaŋ mo hay go de faɗge!

¹⁶ Daga je sen mo hay go doo ɓi leege maga Manwur ɓlag ra go bay coo ɗiggi ɓe nono! Daga á mo laa diŋ sug roo de jag toŋ, de ceg diŋ war re wo!

¹⁷ Faɗge go ti je se maga hay nen ʼwar ndi le go ɓil man ɓi day man ɓi de hay go diŋ tipaale ɓi ma tum, mo hay hay mbe tum de ɓiili mono!

¹⁸ Wer mayse ga ndi kal le go ɓil man ɓi ma joge diŋ bon wo de lawge, ma taw naw ɓin wo go nen sõõre ɓuy tuu la?