JERMI 19 - Tupuri Bible

Jermi mbug temnee go ti jag Baa

¹ Manwur hay wãã ga : See wo ni je booge ni ndo yee temnee pãy ma de jiigi. Hoo jar kluuri ma yoo jarn wo de jar kluuri jar siɗ jagn wo wer ɓo.

² Kal wo go nen ɓil log Ben-Hinom maga wo ti jag tiŋ ngel boogen mono ni ndo ngar jag wo ni de wããre maga ndi wããn ge mo mono.

³ Ndo wãã ge ga : Coʼ we sug wããre Manwuri, nday waŋre ma Judan wo de jar Jerusalemn wo! Manwur Pantway, Baa ma Israyeln wãã ga : Ndi, ndi de a ge de re ne ngeln mo taʼ la ti, diŋ re maga jobo laan ge we mono, sug ɓe ndiŋ gi go.

⁴ Werga á tob wo ndi go day kol wo ngeln mo taʼ la go de glubgi. Á raw wo roɗ fen fõõre ne baa ma tigriŋ maga saara, pããre ɓaara wo noga waŋre ma Judan bay wo de ko rage wa mono. Á kaa wo cíi jar go de koɗ koɗ ti ngel mo taʼ la debaŋ.

⁵ Á bor wo ngel siɗ jag ma ti ngel ma de farge ciŋ wo ne Baale, ma roɗ weere ɓaara wo go ti wùu doo siɗgi jag maga à roɗ mo ɓen go ɓuy nono ne Baale. Sen nà diŋ fen maga ndi hay fern de jag ɓi gà ndi hay wããn gà day se a ne ndi ti meʼ nen ɗiggi ɓi draʼ gà lay.

⁶ Doo kay nono wur yaŋ wo le age. Kay diŋ jag Manwuri. Ti wur sen wo mono, à ɗe ge ngel sen mo taʼ la ga Tofed noga log Ben-Hinom gà so hase, ama, ga : Por idgi húulí no.

⁷ Ndi ɓlag ge koge re ma ti Judan wo de ma Jerusalemn wo yaŋ go ti ngel mo taʼ la no. Ndi sraʼ ge ra yaŋ go gesiŋ de moslam pel jar hee ɓaaran wo, doo jar maga da wo taw rage go bag ge wo ra yaŋ go. Ndi hã ge húulí ɓaara wo yaŋ go ma rege ne dweere ma ciŋ wo de nàyre ma ti tamsir wo.

⁸ Ndi kol ge ɓi leegen la yaŋ go fen ngil jar wo, diŋ fen feg ti. Jar maga hee ge wo ti jeŋ ɓe mo ɓuy ngil wo yaŋ day feg ge wo yaŋ ti ɓe wer re maga caan wo mo ɓuy no.

⁹ Ndi hã ge này weere ɓaara wo de mayre ɓaara wo yaŋ ne hara ma rege day wosela ɓuy re ge này kan ɓe yaŋ nen gaɓri wo de re maga jar hee ɓaaran wo de jar maga da wo taw rage go kaŋn ge wo ne hara ti mono.

¹⁰ Blam ɓe ni ndo mbug gi temneen go nen jar maga wo ge wo wer ɓo mono day ndo riŋ gi ra ga :

¹¹ Manwur Pantway wãã ga : Ndi mbug gi jar sen la wo go de ɓi leege sen la nà doosen nono, go doo maga à mbug pãy mani je boogen go day se fer sããge gà so nono. À ter ge húulí yaŋ wo go Tofed doo maga ngel ter rage joŋ ge ti ngel tigriŋ gà so mono.

¹² Ndi joŋ ge ngeln mo taʼ la de jar ma ɓil ɓen wo ge nà doo kay no so no, day ndi kol ge ɓi leegen la yaŋ go doo Tofed nono. Kay diŋ jag Manwuri.

¹³ Tiŋ ma Jerusalemn wo de tiŋ waŋre ma Judan joŋ wo yaŋ go diŋ ngel jããre doo ngel ma Tofed nono tiŋ maga à hay roɗ fen fõõre ti ɓaara mo ɓuy ne fẽẽre ma nen ngel ma ciŋ wo, day à hay kag yii ma siɗ jag ti ɓaara ne baa ma tigriŋ wo mo ɓuy kol ge wo go doosen no lay.

À baa Jermi ti daŋgay

¹⁴ Jermi men Tofed ngel maga Manwur hay ɓoʼn wo ndar nen wããre ni le go, blam ɓe se raw age ooge ɓi feele tiŋ mani Manwur wo day se riŋ jar ɓuy ga :

¹⁵ Manwur Pantway, Baa ma Israyeln wãã ga : Ko we ga ndi a ge yaŋ de re maga ndi hay wãã go ti ɓe yaŋ ne ɓi leegen la wo de ɓi leege maga se wãã wããre ɓaara mo ɓuy ti, wer maga á deŋ wo gor ɓaara go ga saara mo laa wããre ɓin wo wa mono.