JERMI 18 - Tupuri Bible

Jag jõõ je booge no

¹ Wããre maga Manwur wããn ne Jermi doo kay nono :

² Ur go ciŋ, wo liŋ ni je booge no day ndi wãã ge wããre ɓin yaŋ wo ne ndo ni.

³ Ndi raw woge liŋ ni je booge no, day se hay ɓoʼ pãy ma de kadge jag fen maga se de booge ɓe mono.

⁴ Pãy maga hay doo je boogen raw pẽẽge, se kal hoyobge ɓe go fer boo fen tigriŋ de ɓe doo maga se kon nen ɓe de el ma joŋge nono.

⁵ Mo so no Manwur kal wãã wããre ne ndi ga :

⁶ Ndi bay maga ndi joŋ nday doo je boogen no wa an yawla nday tiŋ mani Israyel no? Kay diŋ jag Manwuri. Koɗa, doo pãy ma doo je booge nono, nday tiŋ mani Israyeln doo ɓi nà doosen no lay.

⁷ Ma po ndi wii ti wer jar po wo noga ti sir waŋ po ga à mo naa ra go, á mo ham jag ɓaara go gesiŋ day á mo taw ra go.

⁸ Ama, hayga wer jar se maga ndi wãã ti ɓaara la fer wo we le day men wo debaycõõre ɓaaran we go no, ndi men joŋ rage go de ɓlagge maga ndi hay ɗign le go ti ɓaara go lay.

⁹ Day maapo ndi wãã ti wer jar po wo noga ti sir waŋ po ga à mo boo ra noga á mo lag wo wer go gesiŋ de ele.

¹⁰ Ama hayga wer jar sen wo la joŋ wo fen ma de ɓlagge we nen ɓi, day wo we laa jag ɓi gà no, ndi fer go naa jag ɓi ti joŋge de el maga ndi hay ɗig go ga ndi joŋn see ɓaara mono.

¹¹ Riŋ jar Juda wo de jar Jerusalem wo ga : Manwur wãã ga : Ko we ga ndi de ʼwũy re po see ɓay, ndi de ɗig mopo ti ɓay. Wosela ɓuy mo fer le, mo men faage ɓen go. Coo we faage ɓayn wo de joŋre ɓayn wo!

¹² Ama saara ga : Sen bà ma mayse pa la! Wùr see ge nà ti ɗiggi wùr wo, wosela ɓuy yoo wùr joŋ ge mbe nà doo maga jiili wùr ma de ɓlaggen da nono.

¹³ Diŋ wersen so Manwur wãã ga : Wo we wiɗgi yoo wer jar dehãy wo ɗala, wose laa re ma doo kayn wo we ti boŋ la? Maytigli ma Israyeln joŋ fen yoo ma de raw wùun go.

¹⁴ Meebe ma ti húulì ma Libaŋ yaŋ mbe go men leɗge ti húulì ma yoofíin yawla? Bii yuuri ma de wooge maga a wo le ti sir ma hãã õg mbaara go yawla?

¹⁵ Bà mbe no gà ɓuy mono, jar mani ɓin yõõ wo ti go ti ɓi, á raw wo roɗ fen fõõre ne sõõre wo. À kog ra ga á mo wo wo maʼ ɓaale, mo cel wo go ti faage ɓaara no, mo men wo faage ɓaara ma ɓaaɓaan wo go day mo hoo wo diŋ blam faage, diŋ faage maga à bay de ɓod rage ɓodge wa mono.

¹⁶ Á kol wo sir ɓaaran go diŋ fen frumgi, go diŋ fen feg ti ma tum. Jar maga hee wo mo ɓuy ngil wo day glad wo ti ti ɓaara.

¹⁷ Doo maga leege maga naa le nen wur botoŋ joŋ nono, ndi dus gi ra yaŋ go ne je heen pele. Ti wur gaɓri maga daʼ ge ra mono, ndi koge ra yaŋ de faale bay de nen wa.

À ɓoʼ jag go ti Jermi

¹⁸ A wãã wo ga : A we le, naa ɗig mopo see Jermi sen ɗa! Werga coo jar siɗ jag bay de leʼge maga jag liŋgin taw ge go wa, bagge yaŋn taw go doo coo jar ko re wo gà wããre taw go doo coo jar ndar nen wããre Baa wo gà. Á we le, naa frãy nen wããre go ne hẽn jage, naa kaŋ ɗiggi ti wããre ɓen wo wa!

¹⁹ Coʼ sug ɓi Manwuri! Laa mbo wããre ma jag jar ngiŋ ndin wo ɗala!

²⁰ À poɗ mbe de el yaŋ de ɓlagge yawla? A tee wo tuu ne ndi pel ma taw naw ɓi go. Ɗig mbo ti ti maga ndi hay koɗ see ɓi pel ɓo ma wãã wããre wer ɓaara, ma fug ɓil ɓo go ne hara ti mono.

²¹ Diŋ wersen kaŋ koŋne ne weere ɓaara wo ti, srog wer ɓaara wo jag moslam no. Daga naare ɓaaran mo gwaʼ wo go bay weere, mo gwaʼ wo go dewuri day húulí mo bag werpiiri ɓaaran wo go! Daga moslam mo raw go ne weere ma jõõre ɓaaran wo jag jaw!

²² Daga à mo laa sug roo le liŋ ni ɓaara de maga ndo á ge de jar hãyhãy wo ne hara ti rus tuu mono! Werga, á tee wo tuu me pel ma baa ndi, á laa wo bay ne ndi freŋ ɓaale.

²³ Day ndo Manwur ndo de ko ɓoʼge jag maga á wo le go de ɓoʼge ti ɓi ma taw ndi go mono. Yãã siigi jag ma por ɓlagge po go ti debaycõõre ɓaaran wa, ɓlagge ɓaaran mo yee nen ɓo go wa! Daga á mo hay wo mbaara tum leɗge pel ɓo! Joŋ ra go de gùr ti wur bagge põõ ɓo no.