JERMI 17 - Tupuri Bible

Baage põõ Baa ti jar hãyhãyn wo

¹ Ɓlagge mani jar Juda wo de yerge de sããne, á de kriggi de ponde jag jiili ɓaara, go ti cõõ ngel siɗ jag ɓaaran wo lay.

² Doo kay nono, jar ni ɓaara fer ge wo yaŋ ɗig ti ti ngel siɗ jag ɓaaran wo, ti koore maga à cor ra ne Asera ti jeŋ koore ma de sug ti wo noga ti ngel ma de farge ciŋn wo mono.

³ Húulì ɓi maga wo yoofíi mo lay, horog ɓon wo de nen fẽẽre ɓon wo ɓuy lay, ndi hã ra go de ngel cor sõõre ɓo ma de farge ciŋ wo ɓuy go ma frumgi wer ɓlagge ɓon wo, go ti jag sir ɓon leŋ leŋ ɓuy.

⁴ Ndo men ge tway maga ndi hay hãn ne ndo yaŋ go de see ɓo tuu. Ndi kol ge ndo yaŋ go diŋ gebee je hee ɓon wo ɓil sir maga ndo bay de koge ɓe wa mono, werga nday kaŋ wer bagge põõ ɓin doʼ wùu day se joŋ ge mbe tum yããge kaʼ so.

⁵ Manwur wãã ga : Faɗge ti je maga kaŋ ɗiggi ɓe diŋ ti je táabay no, deŋ see ɓe see je táabay day day hã jiili ɓe ne Manwur gà mono.

⁶ Á doo wekoo maga dreŋ go ti laale nono, nen ɓe ko fruygi po le age gà. Á de laa tiŋ ɓen nà nen ceg ma ti puuli ngel maga mopo joŋ ni gà lay, day jobo bay wo de tiŋ ni wa has lay mono.

⁷ Bosaʼ ti je maga kaŋ ɗiggi ɓe ti Manwuri, day Manwur diŋ dog ɓe mono.

⁸ Á doo koo ma de peɗge ti jeŋ bii day kããge ɓe raw wo nen yuuri biin nono. Á ko ceg de nen ɓe gà day sug ɓe mbe tum de goɗge. Nen kiŋgi maga kay baa mono, se ɗig mopo gà day se leʼ mbe ceɓ koɗe.

⁹ Jiili je táabay go de dĩĩgi daŋ fẽẽren wo ɓuy, á kãã ma ɗobge gà. Wose yaŋ de koge ɓe la?

¹⁰ Ndi Manwuri, ndi lam jiili jobo ndi daʼ wer go ne ɗiggi ma ɓil jar no maapoɗ wosela ɓuy ti faage ɓe maga á de hoo rage, doo maga joŋre ɓen leʼ mbèere nono.

¹¹ Doo kwee maga peg ti pããre maga se ɓodn gà nono, mono diŋ je maga daʼ horog le de hram mono. De maga naw ɓen wo de caa ɓil gegaʼ gegaʼ ɗa mono, se men ra go day ti wur húulí ɓe mokay se doo je ma bay ti nono.

¹² Pale waŋ ma de togoɗge yaŋ le go de kaŋge taʼa le go ti tĩĩgi were. Á diŋ ngel wùr ma bay ɗag no.

¹³ Ndo diŋ Manwur maga Israyel wo de gor doo ɓo mono! Jar maga tob wo ndo go mono, sõõre wùu ti yaŋ go ne hara. Jar maga maŋ wo ɓil go see ɓi mono, sen bas wo see ɓaara go werga á tob wo Manwuri, gedel bii ma tenenn go.

¹⁴ Manwuri, pẽẽ ndi go ni ndi pẽẽ yaŋ go, yãã ndi go ni ndi yãã yaŋ go werga je maga ndi keen nà diŋ ndo.

¹⁵ Koɗa, á wãɗ wo gana : Wããre Manwurn bà genla? Daga á mo joŋ doo maga á wããn no ɗa so la!

¹⁶ Ma ɓin ndi bay de riŋgi ga ndi day koɗ jar ti jag ɓo gà nà wa. Ndo de koge ga ndi daga wur bon mo a wa, fen maga kal le go jag ɓi ɓuy nà nen ɓo.

¹⁷ Kol see ɓo diŋ je ma daɗ ndi wa, ndo ngel yoŋre ɓi ti wur re no!

¹⁸ Daga sõõre mo joŋ jar joŋ coo ɓin wo day ndi ma ɓin sõõre mo joŋ ndi wa! Daga á mo daɗ wo day ndi ɓin ndi mo daɗ wa! Á de wur re ne hara ti, dog reen ne hara ti ɓaale ɓoge!

Wur Saba no

¹⁹ Manwur hay riŋ ndi ga : See wo ooge jag tiŋ mani weere biŋnin wo, jag tiŋ maga waŋre ma Juda laa wo wo go ni day fer wo le ni mo lay no, wo odge go jag tiŋ ma Jerusalemn wo ɓuy.

²⁰ Ndo wãã ge ne hara ga : Laa we wããre Manwur, waŋ Juda de jar Juda wo ɓuy, nday ɓuy maga nday de tiŋ Jerusalem ga nday laa ti jag tiŋ sen wo lam no!

²¹ Manwur wãã ga : Koɗ we maysee ɓay de ele, horge we fẽẽre soɗge wo ti ɓay wur Saba wa, laa we le de fẽẽre wo wur sen ɓi leege Jerusalem wa lay.

²² Laa we wo go liŋ ni ɓay de fẽẽre soɗge wo ti wur Saba wa, joŋ we joŋre po wur sen wa, ɓoʼ we wur Saban go ti nen doo maga ndi hay wããn le ne pããre ɓay wo nono.

²³ Á hay day wo laage ɓe gà day wo coʼ sug gà raw wo deŋ gor ɓaara go ga saara mo laan wa lay, saara mo ko mopo see ma saaran ni wa lay.

²⁴ Kay diŋ jag Manwuri : Hayga nday laa jag ɓi we doo maga á nono, hayga nday laa we le de fen soɗge po ti jag tiŋ ma ɓi leegen wo la wur Saba gà hayga nday ɓoʼ wur Saban we go ti nene day nday joŋ joŋre po we ti wur sen gà has no,

²⁵ Waŋre ɓayn wo de weere waŋre ma de lagge ti paale waŋ mani Dafidn laa ge wo yaŋ ti jag tiŋ ɓi leegen wo lam no, de ɗidgi ti pus durgi wo de piiri wo, saara de weere waŋren wo, jar Juda wo de jar Jerusalem wo day ɓi leegen la joŋ ge yaŋ de jar ɓil wo sagsage.

²⁶ Jar a ge wo yaŋ le ɓi leege ma ti sir Judan wo de sir ma kara ti Jerusalem wo, a ge wo le ɓil sir Benjame, le ɓil Kefela no, le ti húulìn wo de Negef de fẽẽre siɗ jag maga a roɗ mo ɓen go ɓuy wo de fẽẽre siɗgi jag wo, de fẽẽre hãge wo de fíi ma fõõge fãy fãy wo, de fẽẽre siɗgi jag ma joŋ suseʼ ne Manwur ɓil tiŋ mani Manwur no.

²⁷ Ama hayga nday day we yãã jag ɓi gà nday ɓoʼ wur Saban we go ti nen gà day nday laa mbay le de fẽẽre soɗge wo ti jag tiŋ ma Jerusalemn wo la ti wur Saban no, ndi hee ge wùu go ne jag tiŋ ɓi leegen wo la, se roɗ ge ngel lagge ma de woore ma Jerusalemn wo go day se huu gi jag go gà hase.