JERMI 16 - Tupuri Bible

Baa ga Jermi mo da wãy wa

¹ Manwur raw wãã wããre ne ndi ga :

² Ndo da ge wãy gà ndo biŋ gi weere noga mayre ti ngel mo taʼ la gà.

³ Werga, Manwur wãã ti weere wo de mayre maga biŋ gi wo ti ngel mo taʼ la, ti maare ɓaara maga biŋ gi wo ra, ti pããre ɓaara maga biŋ gi wo ra ɓil sirn la ga :

⁴ A huɗ gi wo go doo cege, jobo rage ra gà lay, tee ge ra gà lay. Á joŋ ge wo go deŋ ciŋ ti sir doo mo rum ngel nono. Moslam wo de koŋne dog ge wo ra yaŋ go, day húulí ɓaara joŋ ge wo yaŋ go diŋ rege dweere ma ciŋ wo de nàyre ma yoofíi wo.

⁵ Werga Manwur wãã ga : Kal ɓil tiŋ húulí po wa, wo ti roo húulí po wa lay, law ra wa lay werga ndi go de naa jam ɓin wo de koge decoo ɓin wo de ɓil de el ɓi ma ti jar sen wo la go. Kay diŋ jag Manwuri.

⁶ Jar kluuri de weere kleere huɗ gi wo yaŋ ɓil sirn la : À tee ge ra gà lay, à rage ra gà lay day jobo ngaɗ ge see ɓe noga cẽẽ ge ti ɓe go ti re ɓaara gà lay.

⁷ À caa ge nen hoole ti ɓaara ma teŋ nen je maga de lawge ti re húulí mo gà lay, day jobo hã ge yii ti re ɓaara ma teŋ nen pããbe noga maabe po gà lay.

⁸ Kal wo ɓil tiŋ few po ma woge hayge de ɓaara rege noga joge wa.

⁹ Werga, Manwur Pantway, Baa ma Israyel wãã ga : Ndi, ndi caa ge wer siŋ fewn wo de siŋ fruygi no, siŋ ma jag je ma de yãã wãyn wo de may maga à go de yããge ɓe wo yaŋ go ti ngel mo taʼ la de nen ɓay ti kal mani ɓayn la.

¹⁰ De maga ndo fer ge wããre sen wo we go ɓuy ne jarn wo day saara riŋ ndo we ga : Wer mayse ga Manwur wãã go ne wùr ɓuy ti re ma kluu ma caa wùrn no la, debaycõõre wùr noga ɓlagge wùrn diŋ ma honla, day wùr hay joŋ mayse de ɓlagge see Manwuri, Baa wùrn la no,

¹¹ ni ndo fer ne hara ga : A nà diŋ ga pããre ɓay hay tob wo ndi go. Kay diŋ jag Manwuri. Á raw wo tayge de baa ma tigriŋ wo, raw wo joŋ peele ne hara day leɗ wo monɗra pel ɓaara. Ma ɓi mono, saara raw tob ndi go, day ɗaw wo jag liŋgi ɓin gà.

¹² Day nday ma ɓay nday joŋ ɓlagge de daŋ pããre ɓay wo pa yaw. Koɗa, wosela ɓuy yoo ɓay see diŋ ti ɗiggi ɓe ma de ɓlagge ma ɓil ɓe no, nday bay laa jag ɓi wa.

¹³ Ndi ɓod ge nday yaŋ wo go faale sirn mo tiʼ la no, wo go ti sir maga nday noga pããre ɓay draʼ nday hay bay de koge ɓe wa. Nday wo ge wo ni mono, nday joŋ ge peele yaŋ de cege, de suŋ ne baa ma tigriŋ wo werga ndi fug gi ɓil go ne nday ti gà so.

¹⁴ Diŋ werseno, ko we ga wur yaŋ wo le age. Kay diŋ jag Manwuri. Ti wur sen wo mono, à wãã ge ga : Manwur yaŋ mbe tenen noga á diŋ je maga hay laa jar Israyel wo le go ɓil sir Ejipte mo gà so hase.

¹⁵ Ama à riŋ gi ga : Manwur yaŋ mbe tenene! Á diŋ je maga hay hoo jar Israyel wo le go ɓil sir ma nen ɓaŋ gloŋhweden wo de sir maga se hay yee nen ɓaara wo go ni mo ɓuy no! Ndi fer ge yaŋ le tay rage ɓil sir maga ndi hay hãn go ne pããre ɓaara wo mono.

¹⁶ Ko we, ndi wo de laa jar bag cẽẽ wo ngaɓa! Kay diŋ jag Manwuri. Jar sen la wo wo yaŋ le bag rage. Day blam ɓe ndi laa ge jar flegge wo ngaɓa, saara wo ge yaŋ le fleg rage ti húulìn wo ɓuy de ngel ma de farge ciŋn wo ɓuy, le ti rum húulì wo lay.

¹⁷ Werga, nen ɓi wo de kaŋge ti faage ɓaaran wo, á bay wo de yoŋre nen ɓi wa day debaycõõre ɓaaran bay de yee nen ɓi wa lay.

¹⁸ Ndi poɗ ge ra yaŋ go ɓaale ɓog ti debaycõõre ɓaaran wo de ɓlagge ɓaaran wo ɗa wer maga á glub wo sirn go, wer maga á bag wo ɓil tway ɓin go de húulí fẽẽre yeɗe ɓaaran wo de fẽẽre horge see ɓaaran wo mono.

¹⁹ Manwuri, egre ɓi no, kor ma de egre kiŋkiŋ ma ti ɓi no, ngel yoŋre ɓi ti wur re no! Jar dehãy a ge wo yaŋ le hãã ti jag sir tawge see ɓo day wãã ge wo yaŋ ga : Nen mo mani pããre wùrn hay nà diŋ geteʼe, diŋ mo de koɗ maga kay ti mopo gà has mono.

²⁰ Je táabay kãã mbe we maga se joŋ baa ɓe po wo ga bay mbaara diŋ baa cwãy wa pa mbe yawla?

²¹ Diŋ wersen so ndi kaŋ nen ɓaara de sen la ti doo ɓi wo de egre ɓin so, day saara ko ge yaŋ so ga ɗúu ɓi ga Manwuri.