JERMI 15 - Tupuri Bible

¹ Manwur kal riŋ ndi ga : Moyis wo de Samyel mo a bà wo pel ɓi la tosge ti ɓaara layblaʼ no, maysee ɓi joŋ ge go feh see jar sen wo la gà. Nii ra wo go hãã see ɓi day á mo raw wo wo go!

² Day hayga á riŋ wo ndo we ga : Wùr wo ge nà genla no, ni ndo fer ge ne hara ga : Manwur wãã ga : Je maga hay go ma húulí, huu go! Je maga hay go ma leʼge go jag maslam, leʼ go jag moslam! Je maga hay ma laɓge go doo koŋne, laɓ go doo koŋne! Je maga hay go ma baa ge ti daŋgay, à baa ge sen ti daŋgay lay.

³ Ndi ur gi yaŋ le ti re ɓaara day ndi kaŋ ge re wo ne ra ti naa. Kay diŋ jag Manwuri. Ndi kaŋ ge moslam ne hara ti ma id rage go, ndi laa ge wayre wo ne hara ti ma lor rage go, weere dweere ma ciŋ wo de nàyre ma yoofíi wo ne hara ti ma bag rage go, ma taw rage go.

⁴ Ndi kol ge ra yaŋ diŋ fen caa hẽẽne go ne sir waŋre ma ti tamsir wo la ɓuy wer fen maga Manase je ni Esekiyas waŋ Juda hay joŋn ɓi leege Jerusalem mo ɓuy no.

⁵ Wose ko ge bà decoo ɓo mo so la Jerusalem? Wose law ge bà ndo la? Wose mbuɗ gi bà nen yaŋ wii wer ɓo ga ndo bà ẽ so la?

⁶ Ndo tob ndi go. Kay diŋ jag Manwuri. Ndo fer mbuɗ nen blam. Wersen so, ndi raw maŋ doo ɓi ciŋ see ɓo, ndi kal ɓlag ndo go. Ndi gay we doo soɗ ndo maʼa.

⁷ Ndi faʼ nday wo go jag leege sir no, ndi men ra go bay weere. Ndi taw jar mani ɓi maga men wo faage ɓaaran wo go.

⁸ Ndi joŋ ge yaŋ ga naare dewur ɓaara mo hay wo ngaɓa doo duguɗgi ma jag maarog nono. Ndi le de age kaŋ je frum jar ne hara ti, ne man wejõõ ti de ceg kãge. Ndi kaŋ ge daɗge see wo de hẽẽne ne hẽn ti nà doo no rus kay tuu.

⁹ Wãy maga hay biŋ weere renam go de sealge, á go de huugi. Wur ɓen leʼ go gesiŋ de maga ngel de ceg ɗa mono. Sõõre wùu ti go ne hẽne, se cog ti go gesiŋ. Jar maga gwaʼ wo yoo ɓaara mono, ndi kaŋ moslam go ne hara ti pel jar hee ɓaaran wo. Kay diŋ jag Manwuri.

Jermi law see ɓe

¹⁰ Maga ndi taw we go! Jar ma ɓil sirn wo ɓuy wo de kiɗ ndi lay, kiɗ wo jag ɓi lay. Ndi bay mbi taa mopo jobo wa lay, ndi bay taa mopo ne jobo wa lay ama de sen ɓuy jar ɓuy go de faɗ ndi.

¹¹ Manwur day ga : Kidolgi ndi hay men ndo nà maga ndo mo daʼ see ɓo, kidolgi ndi joŋ ge yaŋ ga je heen mo a kam ndo ti wur reen wo de wur lawge no.

¹² Boo maga a le nen ɓaŋ gloŋhwede mono, boo sen wo de boo dob hrag mbaara go yawla?

¹³ Nday jar ɓi no, ndi hã horog ɓayn wo de nen fẽẽre ɓayn wo go ma frumgi wer ɓlagge ɓay maga nday joŋ ti sir ɓay mo ɓuy no.

¹⁴ Nday kol ge yaŋ wo go gebeere je hee ɓayn ti sir maga nday bay de koge ɓe wa mono, werga bagge põõ ɓin doʼ wùu go day se de roɗ weege.

¹⁵ O Manwuri, fer mbo ɗig ti ti ɓi! Caa mbo war ɓi le ma yãã ndi go doo jar las ndi wo! Raw go de ɓi wa, ndo maga bay sõõ ɓil gus wa mono! Ko mbo ga ndi yãã ɗargen ti ɓi ɓuy nà diŋ wer ɓo.

¹⁶ De maga ndi daʼ wããre ɓon wo pel ɓi no kay ndi yãã ra doo ɓog ɓuy. Wããre ɓo raw wo coge jag ɓi lay, joŋ wo ɓil ɓi go feh lay werga ndi de maŋ ɗúu ɓon jag ɓi, ndo Manwur Pantway no!

¹⁷ Ndi hay tab sag ɓi de jar fegge ti jarn wo ma joŋ fruygi de ɓaara gà. Wer doo ɓo ma de egre no, ndi hay go boŋ de see ɓi werga ndo hay joŋ ga ɓil ɓi mo sõõ.

¹⁸ Wer mayse ga re ma see ɓin bay go tawge wa la? Wer mayse ga wããge ɓin kol go diŋ joŋre see ɓi day bay go ruggi wa la? Ndo kol go see ɓi doo gedel maga jãɗ jar nono noga doo bii maga à de mbrawge see ɓe nà kolge la?

¹⁹ Diŋ wersen Manwur wãã so ga : Hayga ndo fer we le see ɓi no, ndi fer ge ndo yaŋ le ti ngel joŋre ɓon pel ɓi la. Hayga ndo caa ɓil fen ma de wooren we go de fen ma de ɓoʼ foon no, ndo joŋ ge yaŋ doo jag ɓi nono. Á wo nen ferge le see ɓo yaw bay ga ndo fer wo see ɓaara wa.

²⁰ Ndi kol ge ndo yaŋ pel jar sen wo la diŋ glig boo dobe ma graŋ debaŋ. A dur gi wo ndo yaŋ ama saara raw ge egre ɓo gà werga ndi joŋ ge yaŋ see ɓo ma gor ti ɓo, ma yãã ndo go.

²¹ Ndi yãã ge ndo yaŋ go doo jar ma de ɓlaggen wo, ndi pog ge saale jar joŋ bon jarn wo yaŋ go mo ti.