JERMI 14 - Tupuri Bible

Kay ma kluu no

¹ Wããre maga Manwur wããn ne Jermi de maga kay de bagge mono.

² Sir Juda go nen lawge, ɓi leege ɓen wo go de sealge, suŋgu de leʼge ne hara ti, á wo go de laage gesiŋ day war le de ragge Jerusalem deŋ.

³ Jar egren lag wo weere kleere wo kiɗ bii, saara kal woge jag gutug wo ama saara daʼ bii gà. Saara raw ferge le de hoolen wo ɓil koɗe. Doo sõõre maga wùu ti go ne hara debaŋ debaŋ mono, saara raw lag õõbe go nen ɓaara.

⁴ Kidolgi tamsir hig go kaŋkraŋ doo coo bii werga baa hay ra ɓil sirn gà. Doo kay nono jar jeɗge lag wo õõbe go nen ɓaara doo sõõre.

⁵ Meene ma ti mbásgan draʼ biŋ mokay tob mbarga ɓen go wer maga hõõ bay wa mono.

⁶ Gerhẽẽre ma yooway ɗid wo ti ngel ma de farge ciŋ, fõɗ wo hũy ɓaara ciŋ doo wé wo nono. Nen ɓaara baɗ go doo maga hõõ bay wa mono.

⁷ Á mo hay bà ga debaycõõre wùr wo de kaŋ re ne wùr ti layblaʼ no, O Manwuri, joŋ mbo mopo, diŋ wer ɗúu ɓo no! Werga ndarge gog wùrn raw wo ngaɓa day wùr de ma joŋ ɓlagge see ɓo.

⁸ Ndo diŋ je maga Israyel de gor doo ɓo mono, diŋ je yããge ɓe go ti wur reen no. Wer mayse ga ndo kol see ɓo go doo waare maga hee ɓil sirn la koɗe, noga doo je raŋge maga baa duuli ɓen kaʼ ma nage tawa tuu la?

⁹ Wer mayse ga ndo joŋ see ɓo go doo je maga ma nen ɓen yeɗ nen ɓe go noga doo blum durgi maga kãã ma yãã jar go gà so no la? O Manwuri, ndo mbo yoo wùr pa so mono, tob wùr go wa, wer ɗúu ɓo maga à ɗen ne wùr ti mono!

¹⁰ Manwur wãã ne jar sen wo la ga : Kidolgi á da wo diŋ seele ma de dawge no, á bay wo lagge ti ngel eŋ wa. Á bay wo de cõõre jag Manwur wa day se fer ɗig ti patala ti debaycõõre ɓaara no, a de ma joŋ bon ɓaara ti ɓlagge ɓaaran wo.

¹¹ Manwur day riŋ me ga : Tos ti jar sen wo la maga á mo daʼ wo see ɓaara wa.

¹² Á mo hẽẽ bà wo bii layblaʼ no, ndi laa ge roo re ɓaaran wo gà. Á mo siɗ bà wo siɗgi jag maga à roɗ mo ɓen go ɓuy noga mo hã bà wo fẽẽre wo ne ndi layblaʼ no, ndi yãã ge doo ɓaara de ɓaara gà. Werga ndi da taw rage go de moslam wo de koŋne wo de bulfũŋ.

¹³ Ndi day ga : Ẽla Waŋkluu Manwuri! Jar ndar nen wããren wãɗ wo ne hara gana : Nday ko ge moslam de nen ɓay gà koŋnen leʼ ge gà ama Baa hã ge jam yaŋ ne nday cwãy cwãy ti ngel mo taʼ la tuu no.

¹⁴ Manwur day riŋ me ga : Jar ndar nen wããre Baa gon car wo geteʼ de ɗúu ɓi de ndarge nen wããre ɓaara no. Ndi hay laa ra gà ndi hay fer jag ɓi ne hara gà ndi hay wãã wããre ne hara gà. Sen diŋ lwaʼge maga bay wo cwãy wa, diŋ jag halge, diŋ jag sõõre wo, diŋ ɗeŋ jãɗge jar ma ɓil ɓaara ga saara ndar nen ɓaara ne nday mono.

¹⁵ Diŋ wersen Manwur wãã ti jar ndar nen wããre maga ndar wo nen wããre ti ɗúu ɓe ni se bay de laa rage wa day wiɗ wo ga hayba moslam, hayba koŋne kal ge le ɓil sirn la gà mono gana : Jar ndar nen wããre sen taw ge wo go doo moslam wo de koŋne.

¹⁶ Jar ma yoo jar Israyel maga á ndar wo nen wããre Baa ne hara mono, à lag ge húulí ɓaara yaŋ go ti faage ma Jerusalem wo doo koŋne wo de moslam maga taw ge wo ra go mono. Je ma tee rage joŋ ge gà hase, saara de see ɓaara, naare ɓaara wo, weere ɓaara wo de mayre ɓaara wo. Ndi fer ge ɓlagge ɓaaran yaŋ ne hara ti.

¹⁷ Ndo wãã ge wããre se kayn la ne hara ga : Mberbe mbe tum de yuugi nen ɓi de suŋ de ceg werga re ma kluu debaŋ de caa maytigli, may mani jar ɓin wo mono á diŋ wããge maga cee debaŋ.

¹⁸ Ndi raw wo yoofíi kola jar go la deŋ de carge de moslam, ndi fer le ɓi leege, kola jar go deŋ de sealge doo koŋne. Je ndar nen wããre Baa gon wo de je siɗ jagn raŋ wo sir no, ama de bay koge go de baa rage doo lay.

¹⁹ Ndo tob mbo sir Juda go nà has so yawla? Siyoŋ ɓoʼ fõõre no go ne ndo has so yawla? Wer mayse ga ndo joŋ wùr go de gùr doosen no ga wùr daʼ see wùr gà has la? Wùr de gor jam, ama fen ma de el meʼ draʼ bay wa ɓuy. Wùr de gor wur pẽẽge no, ama wùr mbe tum ti ware!

²⁰ Manwuri, wùr ko mbe ti graŋ wùrn wo de debaycõõre mani pããre wùrn wo we werga wùr joŋ ɓlagge see ɓo.

²¹ Wer ɗúu ɓo no, las wùr wa, mbuɗ foo paale waŋ ma hã togoɗge ne ndon go wa! Fer ɗig ti day blaw tayge jag ɓo de wùrn go wa!

²² Yoo sõõre mani jar dehãy maga wo diŋ ngel de koɗ mono, maapo yaŋ mbe ni ga ra baa yawla? Ngel ma ciŋ cwaa mbe bii le de see ɓe tuu yawla? Joŋ ga baa mo ra nà diŋ ndo Manwuri, Baa wùr no. Wùr de gorge nà diŋ doo ɓo werga joŋ fẽẽre sen wo ɓuy nà diŋ ndo.