JERMI 13 - Tupuri Bible

Mblaaga saale lẽẽ no

¹ Manwur hay wãã wããre ne ndi ga : See, wo yee mblaaga saale lẽẽ ni ndo saʼn sag ɓo. Á ne, ndo baa ge bii ɓe gà.

² Ndi raw yee mblaaga sen ti jag Manwuri day ndi kal saʼ ge ɓe sag ɓi.

³ Manwur raw wãã wããre ne ndi ma de ɓog pa ga :

⁴ Hoo mblaaga maga ndo hay yee ne day de saʼ ge sag ɓo mono. Ur go ciŋ, raw wo nen jag maarog Efrade day ni ndo yoŋn wo go ni ti rum húulì po.

⁵ Ndi kal rawge day ndi raw yoŋge ɓe wo go ti jeŋ Efrade doo maga Manwur hay riŋ ndi nono.

⁶ Day ge mbe go naw blam sen pur so Manwur raw riŋ mege ga : Ur go ciŋ, raw wo nen jag Efrade, day ni ndo wo hoo mblaaga maga ndi hay riŋ mo ga ndo mo yoŋn wo go ni mono.

⁷ Ndi raw woge jag Efrad, ndi kiɗ ngele day ndi raw hoo mblaagan le go ti ngel maga ndi hay yoŋn ni mono, ane ndi daʼn go de sõʼge, se hay bay ma joŋ mopo wa so.

⁸ Manwur raw wãã wããre ne ndi doo kay nono ga :

⁹ Manwur wãã ga : Ndi taw ge maʼge jag jiili mani Judan wo de maŋge ti ciŋ ma kluu ma Jerusalem ge go nà doosen no taw taw lay.

¹⁰ Á wo diŋ jar debaycõõre maga laa wo dayge coʼ sug wããre ɓin wo gà. Á see wo diŋ ti dage ma ɓil ɓaara day raw wo tayge de baa ma tigriŋ wo ma goŋ rage, ma leɗ monɗra pel ɓaara. Daga á mo kol wo go doo mblaaga se kayn ga bay ma joŋ mopo wa so no lay!

¹¹ Kidolgi, doo maga à saʼ mblaaga ne jobo sag nono, ndi hay saʼ see ɓi see tiŋ mani Israyeln ɓuy, de tiŋ mani Judan ɓuy nen maga á mo hay wo diŋ jar ɓi, ma ra ɗúu ɓi, diŋ mo kee ndi, diŋ mo woore ɓi ama saara laa dayge laa sug gà. Kay diŋ jag Manwuri.

¹² Ndo riŋ gi ra de wããre ma kay ga : Manwuri, Baa ma Israyel wãã ga : À go nen bag ɓil daŋre wo go de yii ɓuy. Day saara riŋ gi ndo yaŋ gana : Wùr bay de koge gà à go nen bag daŋren wo go de yii wa yawla?

¹³ Mo so no ni ndo riŋ gi ra gana : Manwur wãã ga : Ko we, ndi taa ge jar ma ɓil sirn la wo yaŋ go ɓuy. Waŋre maga wo de lagge ti paale waŋ mani Dafidn wo, jar siɗ jagn wo, jar ndar nen wããre Baa gon wo de jar ma ɓi leege Jerusalemn wo ɓuy taa ge wo yaŋ go.

¹⁴ Ndi ndreɗ ge, pããreben wo de weeren yaŋ wo go ti kããra jag taʼ boŋ. Ndi ɗaw ge see ɓi gà lay, ndi ko ge decoo ɓaara gà lay, á ko ge wo decoo nen ɓi gà lay day fen po maŋ ge jag ɓi go ma taw rage go gà hase.

Baa ruu ra ti seele ɓaara wo

¹⁵ Laa wedày ni nday coʼ we sugi! Far we ti see ɓay ciŋ wa werga Manwur de wãã wããre!

¹⁶ Hã we togoɗge ne Manwuri, Baa ɓayn taŋgu maga á a de suŋgu ne nday ti, go taŋgu maga ɓaale ɓay mbar wo ti húulì ma nen ngel daymola no. Nday gor ge poɗag yaŋ day se kol ge yaŋ go diŋ nencee húulí, go diŋ suŋgu ma ɗiligi.

¹⁷ Hayga nday laa fen se kayn we gà no, ndi raage yaŋ go freŋ ti maŋge ti ciŋ ɓay no, mberbe leɗ ge yaŋ le go nen ɓi day nen ɓi laa ge mberbe yaŋ wer maga à hoo ge horog mani Manwur wo ge wo go ti daŋgay mono.

¹⁸ See, wo riŋ waŋ wo de wãy ma de egren ga : Lag we go nen siri! Werga, gawraŋ waŋ ma woo weege ma ti ɓayn leʼ we go gesiŋ.

¹⁹ À tẽɗ jag ɓi leege ma ɓil Negefn wo we go day je ma bul rage go bay boŋ wa so hase. À hoo jar Juda wo we go ɓuy, à hoo ra wo go ɓuy ti daŋgay.

²⁰ Maŋ nen ɓo ciŋ day ni ndo ko jar maga wo le de age nen gloŋhwede mono. Kaw horog maga à hay hã ra mo doo nà gen de fǐiri maga hay wo wooge ɓe mo la?

²¹ Ndo wãã ge nà ga hãy de maga à nduu gi we leʼ moge mo la? Ndo de see ɓo tuu ndo had ra ga á mo kol wo go ciŋ ti ɓo doo waŋre wo nono. See ɓo leʼ ge bà ndo go cege doo wãy maga de biŋgi no gà has yawla?

²² Hayga ndo wãã ge we le jiili ɓo ga re sen caa mo le la no, á diŋ wer ngaɓa seele ɓo ma bay blam no. Á hoo jag õõbe ɓon go ne ndo wer ciŋ day diŋriŋ ɓaale ɓo fad wo nà diŋ werseno.

²³ Je Etiyopin coo mbe hõõgese ɓe go noga jwarga coo mbe yerge see ɓe yaŋ yawla? Doosen no taw taw no, nday kãã ma joŋ de el gà nday maga nday go de had see ɓay de ma joŋ ɓlagge mono.

²⁴ Ndi dwas ge ra yaŋ go doo fíi maga leege ma ti puuli hoon wer nono.

²⁵ Mokay nà diŋ re maga de gor ndo mono, diŋ fen maga ndi ngaɓn go ne ndo mono werga ndo hay yõõ ti go ti ɓi, day ndo kaŋ ɗiggi ɓo go diŋ ti geteʼn mono. Kay diŋ jag Manwuri.

²⁶ Ndi hoo ge jag rob ɓon yaŋ go mo pele nen maga à mo ko ngel sõõre ɓon go.

²⁷ Ndi de ko figliw ɓon wo de bũygi ɓon wo, ndi de ko yoo ɓo maga ndo joŋ ra wo ti ngel ma de farge ciŋn wo de yoofíi wo mono. Ndi de ko fẽẽre horge see ɓon wo. Jerusalem, ndo taw we go jag ɓo, ndo maga ndo bay go fãã see ɓo wa mono! Ndo gor ge nà hãã hun ɗala?