JERMI 12 - Tupuri Bible

Re caa je ɓlaggen tuu gà ga le la?

¹ Manwuri, ndo raw keɗed debaŋ, bay nen maga ndi yiŋ kiida de ɓo wa, day ane ndi wãã mbi ne ndo ti kiida ɓo maga ndo cag ra mono. Wer mayse ga jar debaycõõren sii wo ti ti faage ɓaaran la? Wer mayse ga jar cogob ma lag cogob mbaara tenen tiʼ go de yõõ ti la?

² Ndo peɗ ra day saara laa cẽw go draʼa, mbaara de gẽẽge day leʼ mbaara mbeere. Ndo see jag ɓaara mbaŋ, ane ndo go hãã see jiili ɓaara.

³ Day ndo Manwur ndo de ko mege, nen ɓo de ko ndi day ndo go de daʼ wer ne ndi ga ndi nà wer ɓo. Hor ra go doo sããre maga à wo go de ɓaara ti ngel ngaɗ này nono day gel ra go ma wur maga à id jar go mono!

⁴ Sen joŋ ge wo nà hãã hun so ga sirn la mbe nen lawge day fíi ma ɓil pay mbe go tum de higgi mo la? Wer debaycõõre jar ma ɓil ɓen wo, nàyre wo de dweere yee wo nen go werga á hay wãã wo gana : Manwur bay de ko fen maga naa wo ge leʼ ti de ɓe mo wa.

⁵ Hayga ndo ɗee de jar ɓaale wo saara gay ndo go, joŋge joŋge ga ndo kãã ge ma ngafge de piiri wo la? Hayga ndo go de yõõ ti nà ɓil sir ma jam tawa no, ndo joŋge joŋge de maga bii ma ɓil Jurdẽẽ dug gi le go mo la?

⁶ Werga hẽẽre ɓon wo de see ɓaara tuu wo de tiŋ mani pan ɓon wo go de re ti ɓo, á wo de see ɓaara tuu ʼwad wo war ne ndo ti. Hã ɓil ne hara de maga á a ge wo we de wããre ma de cõõre ne ndo mo wa hase.

Baa tob tway ɓen go

⁷ Ndi tob tiŋ mani ɓin go, ndi men tway mani ɓin go, ndi hã wãy maga maysee ɓi dan go ne jar hee ɓin wo doo.

⁸ Tway mani ɓin hay kol go see ɓi doo mingir ma yooway nono, á ra ti ɓi ga se baa ndi go, diŋ wersen so ndi kal caa hee go de ɓe.

⁹ Tway mani ɓin kol go see ɓi diŋ wedwee ma bag này maga go de grud cíi see yawla? Weere dweere ma bag này wo go de cir ti ɓe so yawla? See we, wo we tay nàyre ma yoofíi wo le ɓuy, á mo a wo le ti rege ma kluu no!

¹⁰ Jar koɗge wo debaŋ ɓlag wo pay tlalum ɓin go, á dag wo pay ɓin go. Á kol wo pay ma ti nen ɓin go diŋ ngel ma poɗag poɗage, go diŋ tabuli.

¹¹ À koln go diŋ tabuli, á go nen re, á kol go nen coocoo nen ɓi. Sirn go ɓuy nen coocoo werga jobo boŋ bay ɗig reen wa hase.

¹² Jar frum jarn a wo le go ti ngel ma de maŋge ciŋ ma ɓil puulin wo ɓuy werga moslam mani Manwurn go de re sirn go ti haagu ɓe leŋleŋ ɓuy, jobo boŋ bay go jam wa.

¹³ Á hay joʼ wo diŋ coore ble day saara de weege diŋ ɗewseŋ, á hay gay wo see ɓaara de koɗ koɗe. Sõõre mo joŋ nday ti fẽẽre maga nday we ra ni geŋ gà mono, kaŋn ne nday ti diŋ bagge põõ ma de hãã mani Manwur no.

¹⁴ Manwur wãã ti jar leege ɓe ma de ɓlagge maga bag wo doo ti tway maga se hay hãn ne Israyel jar mani ɓen wo ga : Ko we ga ndi ndar ge ra yaŋ le go ti sir ɓaara no, ndi naa ge tiŋ mani Judan yaŋ le go yoo ɓaara.

¹⁵ Ama blam maga ndi ndar ge ra we le go yoo ɓaara no, ndi ko ge decoo ɓaara yaŋ pa day ndi fer ge ra yaŋ le, wosela ɓuy ɓil tway ɓe, wosela ɓuy ɓil sir ɓe.

¹⁶ Day hayga á had wo we ti faage mani jar ɓin wo, day haʼ wo we de ɗúu ɓi ga : Manwur yaŋ tenen doo ga á hay had wo jar mani ɓin wo ga á mo haʼ wo de Baal nono, ni saara lag ge yaŋ yoo jar mani ɓin wo.

¹⁷ Ama hayga á day wo we laa mopo meʼ gà no, ndi caa ge wer jar ma doosen no kayn wo go, ndi yee ge nen ɓaara go day ndi taw ge ra go. Kay diŋ jag Manwuri.