JERMI 11 - Tupuri Bible

À ɓlag tayge jagn go

¹ Manwur kal wãã wããre ne Jermi doo kay nono ga :

² Coʼ we sug wããre tayge jag sen lam no day ni nday siin we ne jar Juda wo de jar Jerusalem wo!

³ Ndo wii gi ra ga : Manwuri, Baa ma Israyeln wãã doo kay nono ga : Je maga day we coʼ sug wããre tayge jag sen lam gà mo hay go de faɗge.

⁴ Á diŋ tayge jag maga ndi hay tayn de pããre ɓay wo ti wur maga ndi hay laa ra le go ɓil sir Ejipte, le go nen wùu ma jiɗ boo mono, day ndi hay riŋ ra gana : Laa we jag ɓi day joŋ we diŋ fen maga ndi ɓod ge faage ɓe go ne nday mono, ni nday joŋ ge yaŋ diŋ jar ɓi day ndi joŋ ge yaŋ diŋ Baa ɓay lay.

⁵ Doo kay nono, ndi baa ge jag haʼge maga ndi hay haʼn go ne pããre ɓay wo gà ndi hã sir maga pãã wo de noo yõõre yuu wo ni yaŋ go ne hara doo maga nday de koge ɓe wara nono. Ndi raw yiŋ jag ga : Amen, Manwuri!

⁶ Manwur raw riŋ ndi ga : Ngar jag go de wããre sen wo la ɓuy ɓi leege ma ti sir Judan wo, go ti blam faage ma Jerusalem wo ga : Laa we wããre tayge jag sen lam no day ni nday joŋ we joŋre de ɓe!

⁷ A kidolgi cwãy ga ndi hay le diŋ je sedewa see pããre ɓay wo, le hãã ti wur maga ndi laa ra le go ɓil sir Ejipte mono hãã go wara. Le ni ɓaa tuu ndi wãã wããre sedewa ne pããre ɓay wo ga : Laa we jag ɓi.

⁸ Ama saara day laage ɓe gà day wo coʼ sug gà kal wo maŋge diŋ ti ɗiggi ɓaara ma ɓil ɓaara ma de ɓlagge no. Mo so no ndi raw bag jag wããre tayge jag se maga jag ɓi hay fern ne hara ga á mo lag wo ti ɓaara day saara joŋ joŋre de ɓaara gà go ti ɓaara ɓuy.

⁹ Manwur kal riŋ ndi ga : Jar Juda wo de jar Jerusalem yaŋ wo de ɓoʼ ti wããre ti holaŋ ɓaara.

¹⁰ Á fer wo go ti debaycõõre ma taŋgu mani pããre ɓaara maga hay day wo coʼ sug wããre ɓin wo gà mono. Á tay wo go de baa ma tigriŋ wo ma goŋ rage. Tiŋ mani Israyeln wo de mani Judan ɓlag wo tayge jag ɓi maga ndi hay tayn de pããre ɓaara wo go.

¹¹ Diŋ wersen Manwur wãã so ga : Ko we ga ndi a ge de re ne hara ti day saara yãã ge go jag ɓe gà. Á rage wo yaŋ ne ndi ti ama ndi day ge coʼ sug ɓaara gà.

¹² Jar Juda wo de jar Jerusalem raw ge wo yaŋ tos baa maga á roɗ wo fen fõõre wo ne hara mono, ama saara yãã ge ra go ti wur re maga caa ge ra mo gà hase.

¹³ Juda, baa ɓon wo ngaɓa doo ɓi leege ɓon wo no lay no. Jerusalem ngel siɗ jag ma kaŋ sõõre mo tin wo ngaɓa doo faage ma ɓil ɓon wo lay no, kidolgi diŋ ngel siɗ jag ma roɗ fen fõõre ne Baaln wo no.

¹⁴ Ma ɓo Jermi mono, tos ti jar sen wo wa, ra noga bul jag tosge ti ɓaara wa hase werga ndi bay coʼ sug ɓaara de maga á ɗe wo ndi doo reen mo wa.

¹⁵ Je ɓi ma dagen joŋ baa ɓil tiŋ mani ɓin nà diŋ mayse pa la? A joŋ wo diŋ yoo sagsage! Daga à mo hoo này ma bay ɗagn mani ɓon wo go werga ndo joŋ fruygi nà de maga ndo joŋ ɓlagge mono.

¹⁶ Manwur hay kaŋ ɗúu ne ndo ga koo Olifiye ma de goɗ sug maga à kon mbe go tuu wer leʼge ɓen mono. Ama patalam se caa põõ no kay hee wùu go ne hẽne, jag doo ɓe kol wo bay ma mopo wa so.

¹⁷ Manwur Pantway maga hay peɗ ndo ɗe re le mo ti wer ɓlagge ɓay maga nday tiŋ mani Israyeln wo de tiŋ mani Juda nday joŋn see see ɓay tuu ma car jiili ɓi go diŋ de roɗge fẽẽre fõõre no wo ne Baal mono.

À kiɗ ʼwar Jermi go

¹⁸ Manwur hay naa nen ɓe go me day ndi kal koge ɓe go. Doo kay no so no ndo kaŋ nen ɓi go ti joŋre ɓaaran wo.

¹⁹ Ndi hay doo wesam ma de yõõ ti maga à wo de ɓe ti ngel ngaɗ này nono, ndi hay bay de ko fen maga á hay wo le ɗiggi ɓe ti ɓi mo wa. Á ɗig wo gana : Naa ɓlag koon wo go de leʼge ɓen ɓog ɓuy! Naa yee nen ɓe go ti sir jar ma tenenn wo nen maga à mo fer ɗig ti ti ɗúu ɓe wa so hase!

²⁰ Ama Manwur Pantway diŋ je cag re ma ti ngel ɓe ga go de daʼ wer ne ɗiggi jar wo de fen ma ɓil ɓaaran mono. Nen ɓi ko ge maga ndo saʼ ge hee ɓi go de ɓaara yaŋ werga ndi de men re ɓin nà ne ndo doo.

²¹ Wersen Manwur wãã ti jar Anatod maga da wo taw naw ɓo go day wãɗ wo ga ndo mo fer jag Manwur ne saara wa, hayga ndo joŋn we ni saara ʼwar ndo gon wo.

²² Diŋ wersen Manwur Pantway wãã so ga : Ko ga ndi ur gi yaŋ de ɓaara. Moslam taw ge ma jõõre ɓaaran wo go, weere ɓaaran wo de mayre ɓaaran laɓ ge wo go doo koŋne.

²³ Je ɓaara gwaʼ ge boŋ gà hase werga ndi a ge de re ne jar Anatod wo ti, nen kiŋgi maga ndi ur gi le de re ɓaara mono.