JERMI 10 - Tupuri Bible

Baa wo de sõõren wo

¹ Laa we wããre maga Manwur wããn ti ɓay mono, nday tiŋ mani Israyel no!

² Manwur wãã ga : Ko we see seele jar dehãyn wo wa. Joŋ we hẽẽne doo fẽẽre ngil jar maga joŋ wo nen ngel ma ciŋn mo wa, joŋ hẽẽne doo ɓaara diŋ jar dehãy wo.

³ Koɗge jar dehãy wo diŋ ngel de koɗ koɗe. À caa koo le yooway, je ceɗgen ʼwũyn go de klaɓe.

⁴ À ʼwũy see ɓe go de woore de boo solay wo de boo biŋni, à ɓal ponde wo ne hẽn see de big nen maga á mo nglaw go wa.

⁵ Baa sen wo doo gùr manhar kaʼ nono, á wãã wo wããre gà. À hoo ra ti, kidolgi à soɗ ra ti wer maga á kãã wo ma kaŋ ɓaale boŋ draʼ gà mono. Joŋ we hẽẽne ɓaara wa werga á kãã wo ma joŋ jobo de ɓlagge meʼ gà doo maga saara bay de kããge ma joŋ de el po meʼ wa no lay no.

⁶ Manwuri, jobo ma doo ndo nono bay wa hase! Ndo kluu, day kluu ɗúu ɓon go de daŋge.

⁷ Wose joŋ ge bà hẽẽne ɓo gà la, waŋ jar no? À joŋ hẽẽne nà diŋ doo ɓo werga yoo jar ma de ko re ma ti wer jarn wo ɓuy noga ti sir waŋre ɓaaran wo ɓuy jobo ma doo ndo nono bay wa hase.

⁸ Á wo go ɓuy diŋ jar ma bay ti wo, bay wo de ko re wa, fen kaŋ nen go ti loɗge ɓaaran diŋ koo maga á goŋn wo mono!

⁹ À a le de boo solay ma kemrem kemrem wo le Tarsisi, à hoo boo biŋnin le Ufase, mo ɓuy nà diŋ joŋre je yor fẽẽre no. À hee õõbe ma de sẽẽ cuuwa wo de ma de sẽẽ ne baa sen wo ti, mo ɓuy nà diŋ joŋre je ma de ko joŋre ɓe no.

¹⁰ Ama Manwur diŋ Baa kidolgi, á diŋ Baa ma tenen no, waŋ ma tum no. Tamsir daɗ doo bagge põõ ɓe no, wer jar po kãã wo ma lagge lag pel sõõge ɓil ɓen gà.

¹¹ Nday wãã ge wããre ne hara doo kay nono ga : Baa maga hay joŋ wo ngel ma ciŋ wo de tamsir gà yee ge wo nen yaŋ go gesiŋ ti tamsir la.

¹² Manwur hay joŋ ngel ma gesiŋ diŋ de egre ɓe no, Á hay ɓoʼ wer tamsir diŋ de koge re ɓe no, Á hay joŋ ngel ma ciŋ diŋ de ɗeŋ ɓe no.

¹³ De maga á caa põõ mono, bii raw wo tayge go nen ngel ma ciŋ. Á tay swaare wo le ti jag sir tawge day ngel raw sagge ma ra baa á ur leege le ti ngel maga a le de tay ti ni mono.

¹⁴ Je táabay ma honla ɓuy kol go diŋ je bay ti wer koge mani Manwur no, fodo mo ma de yorgen joŋ sõõre go ne je yorge ɓe no. Werga fẽẽre ɓe maga á yor ra bay wo diŋ baa cwãy wa, ɓodge egre po bay le ɓil ɓaara meʼ wa hase.

¹⁵ Á wo diŋ ngel de koɗe, wo diŋ joŋre ma kaŋ sõõre ne jar ti. A yee ge wo nen go de maga à ur gi we ti re ɓaara mono.

¹⁶ Baa maga diŋ nen fen mani Jakob bay doo saara no wa, werga ʼwũy fẽẽren wo mo ɓuy nà diŋ se day Israyel wo diŋ ɓĩĩni jar ma ti nen ɓen wo. Ɗúu ɓe ga Manwur Pantway.

Re de daʼ jar Jerusalem wo

¹⁷ Hoo fẽẽre ɓo maga wo go gesiŋ mo so no, ndo Jerusalem maga re go de cir ti ɓo mono!

¹⁸ Werga, Manwur wãã ga : Ko we ga de sen lam ndi ɓod ge jar ma ɓil sirn la wo yaŋ wo go doo maga à jwag garfũyda nono. Ndi kaŋ ge yaŋ ne hara nene nen maga á mo daŋ wo go jag reen wa.

¹⁹ Maga ndi taw we go! À caa wããge we go me see! Wããge ɓin cee me debaŋ! Ndi hay wããge ga : A nà diŋ cege ɓi mbe, ndi soɗn ge mbi so!

²⁰ À ɓlag tiŋ ɓi ma de baggen go lay, à car saale ɓin wo go ɓuy. Weere ɓin men wo ndi go, á bay wo wa so. Je maga fer yaŋ baa tiŋ ɓin ne ndi ti noga fer yaŋ hoo duuli õõbe ɓin wo go me ciŋ bay wa so.

²¹ Werga jar koɗgen hay wo diŋ jar ma bay ti wo, á hay kiɗ wo Manwur gà. Diŋ wersen so ga debay koge re ẽg ra go day horog ɓaaran dus wo go ɓuy mono.

²² Laa we ngarge jag po le mono, diŋ ngarge jag jar ma debaŋ maga á wo le ti sir ma nen gloŋhwede no, á a wo nà ma kol ɓi leege ma Judan wo go diŋ tabuli, go diŋ ngel rege wé wo.

²³ Ndi ko we so Manwuri, ga je táabay bay nen doo see ɓe wa, day de maga á see mono, koɗ ɓaale ɓe bay diŋ se wa.

²⁴ Liŋ mbo ndi Manwuri, ane á mo hay de faage ɓe, bay de bagge põõ ɓon nen maga ndo yee nen ɓi go wa.

²⁵ Sõõge ɓil ɓon mo hay nà ti jar dehãy maga bay wo de ko ndo wa mono, ti jar maga bay wo ɗe ɗúu ɓon wa mono! Werga á re wo sir Juda go, á wo go de rege ɓe. Á wo go de taw rage, á kol wo tway ɓen go diŋ tabuli.