JERMI 1 - Tupuri Bible

¹ Wããre mani Jermi je ni Hilkiyahu no. Á hay diŋ jobo yoo jar siɗ jag ma ɓi leege Anatodn wo ti sir Benjame.

² Manwur raw wãã wããre ne hẽn ti wur mani Josiyas je ni Amoŋ waŋ Judan nen kiŋgi ma de hwal ti swaʼ de maga Josiyas ti waŋ mono.

³ A wãã wããre ne hẽn ti kal mani Yehoyakim je ni Josiyas waŋ Judan hãã wo ti tawge kiŋgi ma de hwal ti boŋ maga Sedesiyas je ni Josiyas waŋ Judan ti waŋ mono, hãã wo go ti wur maga à hoo jar Jerusalem wo wo go ti daŋgay nen few ma de dween mono.

Manwur ɗe Jermi

⁴ Manwur raw wãã wããre ne ndi doo kay nono ga :

⁵ Taŋgu maga ndi bay ʼwũy ndo le ɓil man ɓo ɗa, ndi hay go de ko moge. Taŋgu maga ndo bay kalge le go ɓil man ɓo ɗa, ndi hay go de baa ndo sagsag ma ɓi, ndi hay go de kaŋ ndo diŋ je ndar nen wããre ɓin go ne wer jar wo ra.

⁶ Ndi kal yiŋ jag ga : Hi! Waŋkluu Manwuri! Ndi bay de ko wããre wa werga ndi diŋ wel ma klee.

⁷ Manwur day riŋ me ga : Wãã ga ndo diŋ wel ma klee wa. Werga ndo wo yaŋ see wosela ɓuy maga ndi ɓoʼ ge ndo wo ne hẽn ti mono day ndo wãã ge fen maga ndi fern ge ne ndo yaŋ go ɓuy.

⁸ Joŋ hẽẽne doo ɓaara wa werga ndi yaŋ de ɓo ma yãã moge go. Kay diŋ jag Manwuri.

⁹ Blam ɓe Manwur kal coŋ doo ɓe, raw duʼ jag ɓi. Manwur day riŋ me ga : Ko so, ndi hã wããre ɓin mo jage.

¹⁰ Ko ga ndi de kaŋ ndo wara ti wer jar wo, ndi ɓoʼ mo ne sir waŋre wo ti maga ndo mo ndar ra go, ndo mo car ra go, ndo mo taw jar go, ndo mo ɓlag jar go, ndo mo boo day ndo mo peɗe.

¹¹ Manwur kal wãã wããre ne ndi doo kay nono ga : Jermi, nen ɓo de ko mayla? Ndi raw ferge ga : Nen ɓi de ko jag doo koo Amaŋdiye, koo ma deparday no.

¹² Manwur day riŋ ndi ga : Nen ɓo ko mbe we de ele werga ndi go de urgi ciŋ ma bag jag wããre ɓin go deparday.

¹³ Manwur kal wãã wããre ne ndi ma de ɓog doo kay nono ga : Nen ɓo de ko mayla? Ndi raw ferge ga : Nen ɓi de ko toɓoole go de urgi taʼ nen ɓaŋ gloŋhwede.

¹⁴ Manwur day riŋ me ga : Re maga ɓug gi jar ma ɓil sirn wo go ɓuy a ge le nà nen ɓaŋ gloŋhwede.

¹⁵ Werga, ko ga ndi ɗee ge jar ma ɓil sir waŋre ma nen ɓaŋ gloŋhweden wo yaŋ le ɓuy. Kay diŋ jag Manwuri. Á a ge wo yaŋ le, wosela ɓuy kaŋ ge yaŋ jag faage ma Jerusalemn wo, go faale kor ɓen go de yiŋ ti ɓe cwẽẽ ɓuy, kaŋ ge wo yaŋ jag ɓi leege ma ti sir Judan wo ɓuy.

¹⁶ Ndi joŋ ge ra yaŋ go de fen maga ndi wããn go ti ɓe mono, wer ɓlagge ɓaaran no. Sen nà wer maga á tob wo ndi go, raw wo roɗ fen fõõre ne baa ma tigriŋ wo day raw wo leɗ monɗra pel fen maga saara joŋ de doo ɓaara mono.

¹⁷ Day ndo ma ɓon mono, saʼ yoo ɓo go de mblaaga, ur go ciŋ day ni ndo wo wii rage de fen maga ndi fern ge ne ndo mo ɓuy no. Daɗ pel ɓaara wa hase. Ndo joŋ we no gà no, ndi kol mo yaŋ go daɗge pel ɓaara.

¹⁸ Ko ga ndi de kaŋ ndo wara ti sirn ɓuy doo ɓi leege ma de egre nono, doo dog tiŋ maga diŋ boo nono, doo glig ma de booge de boo dob nono, ndi ɓoʼ mo ne waŋre ma Judan wo ti, ne minisdir ɓen wo ti, ne jar siɗ jag ɓen wo ti, ne jar ma ti sirn wo ɓuy ti.

¹⁹ A dur gi wo ndo yaŋ, ama saara raw ge egre ɓo gà werga ndi yaŋ de ɓo ma yãã moge go. Kay diŋ jag Manwuri.