KEFDER MAGA JAG YER NE MONO 5 - Tupuri Bible

Riŋ gi jar horog wo go pel bole

¹ Nday jar horog no, coʼ we sug ɓay. Rag we, ʼwad we ware, werga bon daɗ we ge yaŋ.

² Horogre ɓayn bud wo we go, gogo ɗug wo õõbe ɓayn wo we go.

³ Solayere ɓayn fiŋ wo way we go, fiŋ gi way ɓaaran kol yaŋ diŋ fen ʼwad war ne nday ti wurpo, ndar wo see ɓay yaŋ go doo ga á roɗn diŋ de wùun no, werga nday patala diŋ nen naw maga go de leʼ jage, day nday raw ɓoʼ ɗee tay horog debaŋ yaw mono.

⁴ Nday hay joŋ nen jar ma joŋ joŋre we ɓi pay ɓay wo, poɗ ra gà. Coʼ we sug roo ɓaara wo mo kloŋ kloŋ deŋ ɗa, jar wer coore ɓayn wo de rag ge ne nday ti pel Baa mo deŋ no, Waŋkluu ma de egren ɓuy laa roo ɓaaran we.

⁵ Nday de daʼ see ɓay ti tamsir la, nday de rege tiwer ga yeɗ yeɗe, re nàyre, goɓ debaŋ ma woge ngaɗ ge lay.

⁶ Je maga joŋ re ga mo yaw, nday raw ɓoʼ wããre ne hẽn ti, ʼwarn je sen go, je sen ngiŋ we mbe ga lay.

Ɗaw we see ɓay desãy, tos ge

⁷ Hẽẽre ɓi no, ɗaw we see ɓay mbay desãy gor ge hãã Waŋkluu mo wo le ferge ɗa. Ko we see je maga joŋre ɓe diŋ jee ge pay mono. Je jee ge hay gor ge hãã hãã jag top wo a ge, á raw kap ge, hay gor rug gi ɓe hãã wo go see ancoo, á raw wer fẽẽre wo go so.

⁸ Joŋ we doosen no lay. Ɗaw we see ɓay mbay desãy gor ge, gay we wa, werga naw fer ge Waŋkluu le kos we go.

⁹ Hẽẽre ɓi no, sõɗ we ɓil dum gi ne kããra ti nen maga kiida Baa mo baa we wa. Je maga cag ge wããren ɓuy yaʼ we le go jag tiŋ la mbaŋ yaw.

¹⁰ Hẽẽre ɓi no, ɗig we ti jar ndar nen wããre Baa go wo ga hay wo le siɗ wããre ti ɗúu Waŋkluu le ɓaa ne jar mono. Á hay wo ɗaw see ɓaara mbe desãy nen bone, joŋ we doosen no lay.

¹¹ Naa de koge ga jar se taʼ wo Baa woo ra werga á ɗaw wo see ɓaara desãy mono. Nday yaŋ de laa wããre Job pa ga á ɗaw see ɓe mbe joŋ bon debaŋ, blam sen Waŋkluu fer woo ge ɓe daŋ ge so, werga Waŋkluu diŋ je ma ko decoo jar debaŋ, woo ra debaŋ lay.

¹² Daŋge ɓuy, hẽẽre ɓi no, nday leɗ we wãɗ ge ga nday joŋ no kay no mono, haɗ we ti re sen wo haɗ ge wa, haɗ we de ngel ma ciŋ wa, haɗ we de sirn la wa, haɗ we de ɗúu mopo ma tigriŋ wa has lay, nday yiŋ jag we ga ãã no, ni á mo hay diŋ ãã se no, nday yiŋ jag we ga bay wa no, ni á mo hay diŋ bay wa se no, wãɗ we doosen no tawa no, ni kiida Baa leʼ we ti ga so.

¹³ Hayga jobo yaŋ joŋ bon yoo ɓay no, ni je sen mo wii Baa wo ga á mokay se le. Hayga ɓil jobo yaŋ go feh yoo ɓay no, ni je sen mo ʼwad siŋ togoɗ Baa.

¹⁴ Hayga jobo yaŋ de cege yoo ɓay no, ni je sen mo ɗe jar kluuri ma pel Tayge jar ma wer Kris wo le see ɓe, ni á mo wiɗ wo Baa ti je cege no, mo grud wo noo ne hẽn ti de ɗúu Waŋkluu.

¹⁵ Á mo hay wo de hã ɓil ɓaara go ne Kris paha, mo wiɗ wo Baa, ni Waŋkluu pẽẽ je cegèn yaŋ go de ele, urn yaŋ go ciŋ holaŋ holaŋ, je cegèn hay yaŋ de joŋ re po de ɓlagge, Baa raw yaŋ men ɗig re ɓlagge ɓen wo go ne hẽn ti ɗig ɓlagge sen ga so.

¹⁶ Wersen ɓoɗ we jag go ti ɓlagge ɓayn wo nen kããra tinoo poɗage, wiɗ we Baa wo ti kããra ga Baa mo pẽɗ we go. Wiɗgi maga je ma de deele wiɗ Baa wo ti jar, á de egre debaŋ, á maŋ mopo ne jare.

¹⁷ Ko we see Eli le ɓaa ɗa, á diŋ je tabay doo naa no lay, á wii Baa wo, wiin wo go de ɓil ɓe sog ga Baa mo ra wa, de sen ni, kiŋgi raw joŋge go swaʼ de doŋ, Baa leʼ ɓi sir sen la gà.

¹⁸ Blam sen á raw ferge wii Baa wo ga Baa mo fer mbe rage so, Baa raw ɓoʼ jag bii le gesiŋ gibi, fẽẽre rege fer wo tĩɗ gi debaŋ pa so.

¹⁹ Hẽẽre ɓin wo, hayga jobo yoo ɓay men faage cwãy we go tiʼ, cel we go no, ni jobo mo raw kay ge ɓe maga á mo fer le.

²⁰ Ko we go de el ga jobo fer je ɓlagge maga men faage cwãyn go le ti faagen tigriŋ mo caw lay no, ni á yãã je sen go jag húulí nà yãã ge so, ɓlagge je sen la mo hay bo wo debaŋ yaw, Baa raw men ɗig re ɓlagge sen wo go ne hẽn ti ɓuy tuu.