HABAKUG 3 - Tupuri Bible

Tosge mani Habakug no

¹ Tosge mani Habakug je ndar nen wããren go no. Á tos de gẽẽge roo.

² Manwuri, ndi hay laa mbi fen maga ndo hay wããn mbi we. Manwuri, hẽẽne go de caa ndi doo fen maga ndo joŋn mono. Baa mbo jag ɓe go nen kiŋgin wo so! Naa mbo nen ɓe go nen kiŋgin wo so! Ane nen bagge põõ ɓon mono, fer ɗig ti ti koge decoo jar ɓo no.

³ Baa le de age le ɓi leege Teman. Je ma bay ɗagn le de age le ti húulì ma Paran no. Iggi. Kluu ɓen baa ngel ma ciŋ go, togoɗge ɓen baa tamsir go.

⁴ Á doo ngel maga go de lerge doo poɗag nono. Doo ɓe bel wùu, sen mokay diŋ egre ɓe ma de yoŋren so!

⁵ Bulfũŋ de seege pel ɓe caw, a men hérgeɓe ti blam ɓe.

⁶ Á oo deŋ, raw ngaɓ tamsiri. Á ko nene day wer jar ɗad wo. Húulì ma ɓaaɓaa dwas wo go day húulì ma lublub ma kiŋgi pur ngroɓ wo go, Faage ma ɓaaɓaa yeɗ wo nen go lay.

⁷ Ndi ko tiŋ mani Kusan wo go nen lawge, Duuli ma ɓil sir Madiyaŋ wo de semayge.

⁸ Manwur go de caa jiili ne maarog ma de pããgen wo ti lay yawla? De maga ndo de ɗiigi ti piiri ɓon wo de pus durgi blum ɓon wo mono, Ɓil ɓo cee mo nà ti maarog ma de pããgen wo yaw, Noga bagge põõ ɓon nà ne maarogn ti yawla?

⁹ Ndo go de naa toŋwa ɓon siigi no, Day waa ɓon wo nà diŋ wããre maga ndo hãʼ go de ɓaara mono. Iggi. Ndo mun tuu ti tamsir de pyewre wo.

¹⁰ Húulì ko wo ndo mokay saara daɗe, Bii horge ciŋ giɓliŋ giɓliŋ, tuu ma kuɗum ngar jage. Á hoo doo ɓe wo ciŋ.

¹¹ Wur wo de few od wo ti ngel ɓaara deŋ deŋ doo sagge waa ɓo maga raw wo wo go mono, Doo carge wùu maga manjaw ɓon carn jag mono.

¹² Ndo raŋ tamsir go de sõõge ɓil ɓo no, Ndo ndreɗ wer jar wo go de bagge põõ ɓo no.

¹³ Ndo kal le go nà ma yãã jar ɓon wo go, ma yãã Mesi ɓon go. Ndo njud ti tiŋ mani je ɓlaggen go, ndo hragn go ti kẽẽ krus krusi. Iggi.

¹⁴ Waŋre ɓe maga giŋ wo le ne ndi ti, Doo degurleege ma hrag mege go de war de fruygi jag deŋ Doo ga saara hay lor je ma nen coocoo po go freŋ no mono. Ndo cloʼ ti ɓaara go de waa ma doo ɓaaran doo ga.

¹⁵ Ndo hay buŋ faage ne piiri ɓon wo nen maaroge, nen kaŋngaw bii ma kluuri wo.

¹⁶ Ndi hay laa ne, day ɓiiri raw hoo ndi. De maga ndi laa ngarge jag sen mono, này jag ɓi daɗ wo, hm ɓi hrag wo go. Ndi hay mbi ti ngel yeʼ daɗge, De gor wur re maga je taw wùr gon cwaage mbe ne jarn ti mo so no.

¹⁷ Werga hõõ fuɗ gi ge gà lay, À hãã ge mopo ge ɓil pay tlalumn wo gà lay, Leʼge koo olifiyen car ge jiili jar go lay. À daʼ ge rege le ɓil payren wo gà Fǐirin caa ge wo wer go ɓil glaŋren wo lay. Dày po joŋ ge ɓil kaw gà so lay.

¹⁸ Ama ma ɓin ɓil ɓi joŋ ge go feh nà wer Manwuri. Ndi daʼ ge fruygi ɓin yaŋ nà see Baa ma pẽẽ mege no.

¹⁹ Manwuri, Waŋkluu ɓin diŋ egre ɓi no. Á kol ɓaale ɓi wo go gefeŋ doo ma meene wo nono, day se see go de ɓi ciŋ ti ngel ma de gẽẽren wo. Ne waŋ jar ʼwad siŋn wo. Diŋ de dilna ɓin wo.