HABAKUG 2 - Tupuri Bible

¹ Ma ɓi ndi oo ge yaŋ deŋ koge, ndi oo ge yaŋ deele deŋ ti ngel gor ngel no. Ndi hay ge yaŋ go tenen yeʼ ma laa fen maga á wããn ge me De fen maga ndi fern ge ciŋ ti ʼwadge war ɓin ni mono.

Baa fer wããre ne Habakugi

² Manwur raw fer wããre ne ndi doo kay nono ga : Yer mbuɗgi nen po, krign go ti húulì ma de ceɗge wo! Nen maga je maga keen mo keen go de ele.

³ Á diŋ mbuɗgi nen po maga wur ɓe go de ngaɓge, Day se go de nii age ti wur ɓen yaw, se bay diŋ jããge wa lay. Hayga á yõõ ti we no, ni ndo gorn mbo werga á joŋ ge go ɓegdeʼe. Á joŋ ge kidolgi, naw ɓen yaʼ ge gà.

⁴ Ko ga á kol go far ti mayse ɓe ciŋ, á bay de deele wa so. Ama je ma keɗedn joŋ ge tenen caw diŋ wer hãge ɓil ɓe.

⁵ Cwãy kidolgi yii kaŋ taw jare : Bloo ma far ti see ɓe ciŋ hay ge ɗeged gà. Á hãʼ jag ɓe go doo tuu húulí nono, A wùu gà doo húulí nono. A jãã wer jar wo wo go see ɓe ɓuy, Á tay jar wo wo go see ɓe ɓuy.

Faɗge ma dween wo no

⁶ Day jar sen wo mo deŋ ɓuy ɓoʼ ge wo foo ɓe go, Feg ge wo ti ɓe day wãɗ ge wo jag kluu ne hẽn gà yawla? À wãɗ ge ga : Faɗge ti je maga tay ɓen diŋ fen maga bay diŋ ma ɓe wa mono, Ti je maga yaʼ põõre ɓèere ɓen wo ciŋ ni mono.

⁷ Jar maga ɓèere ɓo ti ɓaara naa ge wo ndo doo gà yawla? A pũy gi wo go ma fĩɗ ndo gà yawla? Ndo kol ge go diŋ fen frumgi ɓaara so!

⁸ Wer maga ndo hay frum fẽẽre ma wer jar wo go ngaɓa mo lay no, Jar maga gwaʼ wo ti wer jar wo mo ɓuy frum gi wo ndo ge go wer cíi jarn lay. Wer debaycõõre maga ndo joŋn see sir no, See ɓi leegen wo de jar ma ɓil ɓen wo mo ɓuy no.

⁹ Faɗge ti je maga tay le liŋ ni ɓe diŋ daʼge ma bay blam wo Nen maga se mo kaŋ peŋ ɓen go ciŋ ti ngel ma ciŋ hãã wo, Day re po mo caa se meʼ wa has mono.

¹⁰ Ndo ɗig mo nà diŋ fen ma kaŋ sõõre ne tiŋ ɓo ti yaw, Maga ndo taw wer jar wo go ngaɓa mo deŋ ndo bas go nà diŋ mayse ɓo.

¹¹ Werga, húulì le ti war yoo kor no day koo ma de baa tiŋ yiŋ jag wo ne hẽne.

¹² Faɗge ti je maga boo ɓi leegen nen cíi day ɓoʼ wer kluu sirn de idgi húulí mono.

¹³ Ɓa re maga wãã ga : Jar gay wo see ɓaara nà ne wùu jage, Ngaɓan joŋ wo coo nà diŋ wer fen de koɗn a le nà bay jag Manwur Pantwayn wa yawla?

¹⁴ Werga, tamsir baa ge yaŋ go de koge mani Manwur ma de togoɗgen Doo bii maga yãã ɓil maarog go nono.

¹⁵ Faɗge ti je maga hã mo ma de hãã go ne kan ɓe ma joge, Day kol daŋ ma ɓen go ne hẽn ti ɓen ma taage ɓe go, Ni se ko glog ɓe go mono!

¹⁶ Sõõre wùu ti go ne ndo debaŋ yaw bay ga ndo daʼ togoɗge wa. Ndo de see ɓo jo lay ni ndo gwaʼ go glog koɗ ɗa lay! Kob bagge põõ mani Manwurn pug gi yaŋ ge mo ti, Sõõre baa ge togoɗge ɓon yaŋ go!

¹⁷ Werga debaycõõre maga ndo joŋ see sir Libaŋ fer ge yaŋ mo ti, Frumgi fẽẽre maga horogre ma wer ɓon frum gi wo go, caa ge hẽẽne ɓaara yaŋ go. Sen mono wer cíi jar no, wer debaycõõre maga ndo joŋn see sir no, See ɓi leege wo de jar ma ɓil ɓen wo mono.

¹⁸ Fodo ma de ceɗgen joŋ bà nà mayse ga je ceɗgen ceɗn mo la? Fodo ma de yorgen ma had jar de geteʼn maŋ bà mayse ne jobo Nen maga je yorge maga joŋn kaŋ ɗiggi ɓe ti ɓe, Hãã kol go maga se joŋ baa ma mbululum wo mo la?

¹⁹ Faɗge ti je maga wii koon ga : Ur go ciŋ, ga wii húulì ma baʼ baʼn ga : Pũy go mono! Huulin had mbe jobo yawla? Koɗa, à kor see ɓe go de boo biŋni wo de boo solay ama se ɓoʼ egre po meʼ gà ɓuy.

²⁰ Ama Manwur mbe ɓen ɓil tiŋ ɓe ma bay ɗag no. Daga tamsir ɓuy mo hay go baʼ pel ɓe!