HABAKUG 1 - Tupuri Bible

¹ Mokay diŋ re põõre maga à naa nen ɓe ne Habakug je ndar nen wããre Baa gon mono.

Habakug wii Baa

² Manwuri, sen nà hãã hun ga ndi ɗe ndo, ndo laa yiŋ jag gà lay. Ndi ʼwaa war ga hun raw doo, ndo bay le caa war ɓi wa lay la?

³ Wer mayse ga ndo joŋ ga nen ɓi mo ko ɓlagge, Ndo mbo de ko bon maga à de ma joŋ jar de ɓe mo la? Frumgi fẽẽre jar wo de hun wo mbaara de joŋge nen ɓi, Wǔy wo de leɗge kããra wo mbaara de joŋge.

⁴ À sog jag liŋgin go were, Jobo bay ooge ti fen ma de deelen wa so! Werga je ɓlaggen kol go joŋ bon je ma keɗed no, Day à kol go carge diŋ kiida ma de geteʼe.

Manwur raw yiŋ jag nene

⁵ Ko we nen ɓay, raŋ we nen ɓay yoo wer jar wo, Day re sen mo ngris we, mo caa hẽẽne ɓay go. Werga jobo yaŋ joŋ joŋre po ti kal mani ɓayn la, Day se diŋ fen po maga nday hãge ɓil ti ɓe gà hayga à mo siin baa we yaw.

⁶ Ko we, ndi laa ge jar sir Kalde wo yaŋ le we ti, Jar ma girgir ga ko wo decoo jobo gà mono. Á cegaɗ ge wo sir yaŋ le kluuri buy buy ma age yãɗ ngel maga hay bay wo diŋ ɓaara wa mono.

⁷ Á wo de tuu day joŋ wo hẽẽne ne jare. A joŋ wo mbaara diŋ fen ma nen ɓaaran tuu, Ɓod wo mbaara jag liŋgi ɓaaran de see ɓaara tuu.

⁸ Piiri ɓaaran ɗee wo de daŋ jwarga wo, Lor wo jar de daŋ way-baa ma de lawn wo. Jar yaʼ piirin wo go de bud see ɓaara, Jar yaʼ piirin wo le de seege le hãã tiʼ i. A pud wo doo gebeg maga de cwaage ne này ɓe ti nono.

⁹ Jar sen wo ɓuy á wo nà ma frum fẽẽre. Nen ɓaara wo go de kaŋge pel ɓaara sog boŋ. Á tay wo daŋgay wo le see kããra doo duguɗgi nono.

¹⁰ Jar maga feg wo ti waŋre wo nà diŋ saara, Joŋ wo hragge go de weere waŋre wo nà diŋ saara. Ɓoʼ foo ɓi leege ma de kor ma de egre kiŋkiŋ tin wo go nà diŋ saara : Á horge wo sir ciŋ de ɓaale ɓaara day saara yããn de waŋ.

¹¹ Day ge mo so no, saara coo ge ɗiggi yaŋ. Á raw ge wo wùu ɓe, day kaŋ ge wo re yaŋ ne see ɓaara ti. Baa ɓaaran diŋ egre ɓaaran tuu.

Habakug wii Baa pa

¹² Ndo le hãã tum tuu nà diŋ Manwuri, Baa ɓi no, Je ma bay ɗag ɓin gà yawla? Wùr huɗ gi go gà! Manwuri, ndo hay lag ra ga á mo car wo kiida. Húulì ɓi no, ndo hay ʼwũy ra go ma liŋ jare.

¹³ Nen ɓo raw wo go de fããge debaŋ ma daʼ wer go ne ɓlagge, Ndo kãã ma kaŋ nen ne joŋge bon kããran ti gà. Day wer mayse so ga ndo mbo de kaŋ nen ne jar lag cogobn wo ti, Day ndo mbo baʼ de maga je ɓlagge mbe go de kaŋ cee ne je ma de daŋge ɓe keɗedn ti la?

¹⁴ Ndo kol jar tabay wo go doo cẽẽ ma nen maarog wo nono, Go doo fẽẽre maga kir wo de jiili ti tamsir ga je ɓaara bay wa nono.

¹⁵ Go jag taʼ boŋ je Kalden hoo ra ti tiɗebe, Kog ra le go de bày ɓe no, day caa ra le go ɓil gidig ɓe no. Day ge je Kalden raw joŋ ge de fruygi, ɓil ɓe raw joŋ ge go feh lay.

¹⁶ Mo so no, se raw joŋ siigi jag ne bày ɓe no, Roɗ fen fõõre ne gidig ɓe no. Werga á daʼ mo ma de noon wo de rege ma debaŋ nà nen doo ɓaara.

¹⁷ Day á mbe tum slom wer jar wo de bày ɓe no, Mbe tum ngaɗ wer jar wo go bay ngar so yawla?