ESEKIYEL 6 - Tupuri Bible

Ne jar cor sõõre wo ti

¹ Manwur kal fer wããre ɓen me doo kay ga :

² Wel je táabay, ngiɗ nen ɓo wo ti húulì ma Israyel wo no, day ni ndo naa nen wããre ma jag ɓin go ne hara.

³ Ndo wãã ge ga : Húulì ma Israyel wo no, Coʼ we sug wããre Waŋkluu, wããre Manwuri. Wãã doo kay diŋ Waŋkluu, Manwuri. Ne húulì wo de húulì ma lablab wo Ne gwuŋri wo de log wo ga : Ndi yaŋ la! Ndi joŋ ge nen age de jaw ne nday ti Day ndi ɓlag ge ngel siɗ jag ɓay ma de farge ciŋn wo yaŋ go,

⁴ Ngel siɗ jag ɓayn gwaɗ ge wo yaŋ go de koɗe. Fẽẽre ma roɗ fẽẽre fõõre no ɓayn mbug gi wo yaŋ go. Day ndi joŋ ge yaŋ nen ɓod húulí ɓayn wo pel sõõre ɓay wo.

⁵ Ndi lag ge húulí jar Israyel wo yaŋ pel sõõre ɓaaran wo Day ndi dus gi hm ɓay wo yaŋ go De cir ti ngel siɗ jag ɓay wo no.

⁶ Ti ngel ma honla ɓuy maga nday joŋ ge de tiŋ ni mono Ɓi leege ɓayn joŋ ge wo go de ɓlagge. Ngel cor sõõre ɓayn gwaɗ ge wo go Hãã nen maga ngel siɗ jag ɓay ma de re tin ɓlag ge wo go, day gwaɗ ge wo go. Sõõre ɓayn harag ge wo yaŋ go day raw ge wo yaŋ Fẽẽre ma roɗ fẽẽre siɗ jag ɓayn mbug gi wo go Day fẽẽre ɓayn tag ge wo yaŋ go.

⁷ Jar leɗ ge wo yaŋ go de húulí yoo ɓay debaŋ, Day nday ko ge yaŋ ga ndi diŋ Manwuri.

⁸ Ama, ndi ɗaw ge te ɓay maga gwaʼ ge wo yaŋ. Jar maga daŋ ge wo le go jag jaw doo wer sir wo mono De maga nday dus gi we wo go ɓi sir wo wer sar sar no.

⁹ Doo kay, wo go yoo wer sir maga á wo wo go ti daŋgay ni, Jar ɓay maga sen daŋ ge wo go mono fer ge wo yaŋ ɗig ti ɓi jar se maga ndi wo ge we go car jiili ɓaara ma de figliw mono, jiili maga hay go de ɗeege see ɓi hãã mono, de slagge nen ɓaara wer sõõre wo mono. A joŋ ge wo nen ko kããra de kaŋ nen ne kããra ti gà so, sen diŋ wer ɓlagge ɓaara maga á joŋn wo go mono. De fẽẽre horge see ɓaaran wo no.

¹⁰ Á ko ge wo yaŋ ga ndi diŋ Manwuri, Day wããre maga ndi hay wããn ne hara hay bay de koɗ wa, ma kaŋ bon sen ne hara ti mono.

¹¹ Wãã doo kay diŋ Waŋkluu Manwuri ga : Mbar de doo, car de ɓaale, day ni ndo wãã ga : Yayaʼ! Ti ɓlagge se ma horge seen wo mo deŋ ti jar ni Israyel wo no, Maga daɗ ge wo húulí jag jaw, doo koŋne wo de bulfũŋ mono.

¹² Je maga yaŋ le go hãã no, laɓge go doo koŋne. Je maga sen la maŋ mono daʼ ge húulí go jag jaw, Je maga gwaʼ ge mono, á yãã ge sirn go de ɓe ɓuy, day se laɓge go doo koŋne. Ndi wo ge go ɓoʼ jag ɓil sõõge ɓin ti tawge ti ɓe see ɓaara.

¹³ Day nday ko ge yaŋ ga ndi diŋ Manwuri De maga húulí ɓaaran joŋ ge wo we yoo sõõre ɓaaran wo deŋ no, Go de cir ti ngel siɗ jag ɓaaran wo no, Go ciŋ ti húulì ma lablab ma de farge ciŋn wo ɓuy wo, Go ti tipẽẽge ti húulìn wo no, Go wer koore ma depãy wo Go wer koore cen ma kluɓ-kluɓ wo Ti ngel maga á hay wo jwed trusa maga fõõ de cõõre ni ɓuy mono, Ne sõõre ɓaaran wo ɓuy mono.

¹⁴ Ndi coŋ ge doo ɓi yaŋ ciŋ see ɓaara. Day ndi kol ge sirn yaŋ go de see ɓe, go de gwaʼge Doo puuli ma Dibla nono, Ti ngel ma honla ɓuy maga á joŋ ge wo de tiŋ ni mono. Day á ko ge wo yaŋ ga ndi diŋ Manwuri.