ESEKIYEL 5 - Tupuri Bible

Baa joŋ ge bon Israyele

¹ Ma ɓo, wel je táabay, maŋ mo cẽẽ ti ma de ɓoʼ saŋ, mocẽẽti ma cẽẽ piŋ ni ndo cẽẽ ti ɓo go, cẽẽ piŋ ɓo go lay. Blam ɓe ni ndo maŋ kelew ma ngaɓ fẽẽre ni ndo car ɓil ɓaara go taɗ taɗe.

² Caa ɓil ɓe swaʼ ni ndo roɗ ma de swaʼn ɓen go ti holaŋ ɓi leegen degaʼa. Wur maga naw cirgi ti ɓi leege gon leʼ jag we go no, ni ndo maŋ ma de swaʼ ɓe ma lan pa ni ndo car nen ɓe go de mocẽẽti no, go ti ɓi leegen degarra ɓuy. Ma de swaʼ ɓe ma lan ni ndo ray sen wo go wer leege, day ni ndi ɓoʼ ge durgi yaŋ wo ne hara were.

³ Ndo hoo ge maapo meʼ e, ni ndo saʼ sen jag õõbe ɓo no.

⁴ Ndo hoo ge yaŋ yoo ma sen wo pa ndo rayge sen wo ti wùu, day ndo roɗ ge ra ti wùu. Day wùu kal ge yaŋ le go see tiŋ mani jar ni Israyel wo ɓuy.

⁵ Wãã doo kay ne no diŋ Waŋkluu, Manwuri : Á diŋ Jerusalem. Ndi hay kaŋn ti gisiɗgi wer sir wo, de sir ma ti jeŋn ɓaaran wo ni mo ɓuy no.

⁶ Á giŋ wo jag liŋgi ɓi ma ɓod faage seelen wo de jag liŋgi ɓi ma de yergen wo de hãã debaŋ, de daŋ wer sir wo de sir ma ti jeŋ wo ni, werga á giŋ wo ra, srog wo jag liŋgi ma ɓoɗ faage seelen wo go, day saara see ti jag liŋgi ɓi ma de yergen wo gà.

⁷ Diŋ wersen ga Waŋkluu Manwur kal wããge ga : Diŋ wer maga nday joŋ nen giŋgi dedaŋ wer sir ma de cir ti ɓay ɓuyn wo no. Wer maga nday laa seege wer jag liŋgi ɓi ma de yergen wo gà nday ɓag jag jag liŋgi ɓi ma ɓod faage seelen wo go gà ama nday see diŋ ti tosge wer sir maga ti jeŋ ɓayn wo draʼ gà so lay no,

⁸ Diŋ wersen so, wãã doo kay diŋ Waŋkluu, Manwuri. Ndi mo deŋ de ngiɗ nen de ɓay so no, ãã diŋ mbi lay! Ndi bag ge jag kiida ɓin wo yaŋ go yoo ɓay, de mbèere nen wer sir wo poɗage.

⁹ Ndi nduu gi yiŋ nday mokay la bay de maŋ maga ndi hay joŋn le go ti boŋ gà day ndi joŋ ge wo pel de maŋ sen gà so lay, werga joŋre ɓayn raw wo de horge see.

¹⁰ Diŋ wersen so ga pããrebe re ge wo weere ɓaara wo yaŋ go ti holaŋ ɓay, day weere re ge wo pããre ɓaara yaŋ go ni ɓo ni. Ndi bag ge jag kiida ɓin wo yaŋ go see ɓo, ndi dusgi maga sen gwaʼ ge wo yaŋ wo go wer leege ti cõõ ngel wo ɓuy.

¹¹ Diŋ wersen ndi yaŋ, kay diŋ jag Waŋkluu, Manwuri : Diŋ wer maga ndo dem ngel ma bay ɗagn go de fẽẽre horge see ɓon wo mono. Doosen nono, ndi lay ndi naa ge see ɓi go, nen ɓi ko ge decoo gà so. Ndi joŋ ge ndo mokay la see ɓi ɗaw ge doo ɓi gà so lay.

¹² Yoo jar ɓon wo mo hãʼ à caa ɓil ɓaara we swaʼ, ma boŋ ɓen bulfũŋ taw ge ra yaŋ go day koŋne taw rage yaŋ go yoo ɓay ni. Ma de swaʼ ɓe ma boŋ ma lan sen jaw re ge sen wo go ni ɓo ni, day ma de swaʼ ma boŋ ma lan wo mono ndi dus gi sen wo go wer leege ti cõõ ngel wo ɓuy, day ni ndi ɓoʼ ge durgi yaŋ wo ne hara were.

¹³ Baage põõ ɓin wo ge go hãã ti tawge ti ɓe. Ndi laa ge pũũri ɓin go de ɓaara, ndi joŋ ga wãã wããre diŋ ndi Manwuri de ɓil hun ɓi no. Ndi wo ge go ɓoʼ jag laage pũũri ɓin go ti tawge ti ɓe.

¹⁴ Ndi kol ge ndo yaŋ go de mbuɗ sõõre nen wer sir maga wo ti jeŋ ɓo wo no, de mbèere nen jar maga hee ge wo ni mo ɓuy poɗage.

¹⁵ Ndo kol ge yaŋ diŋ ngel maga go de mbuɗ sõõre, go de ɗarge, fen maga à ko see ɓe, fen joŋ hẽẽne ne wer sir maga wo ti jeŋ ɓo mono, de maga ndi baa jag kiida ɓin wo we go no, de maga ndi laa pũũri sõõge ɓil ɓin wo we go de ma joŋ bon ɓay no. Wãã doosen diŋ ndi Manwuri.

¹⁶ Ndi age yaŋ de koŋne ne nday ti ma taw nday go. Á hã ge cege yaŋ ne nday see doo waa maga de nee lar see jobo nono. Ndi a ge de koŋne ne nday ti ciŋ jag re ɓayn wo ni, werga ndi ɓlag ge geɗem-geɗem hoole pẽẽ ɓay ma de lagge ciŋ wo go.

¹⁷ Ndi laa ge koŋne wo ne nday ti de nàyre ma mbásga wo ma bag weere ɓay wo go. Bulfũŋ wo de girgiri, de durgi tawge wo nday go, wãã ne nday doosen diŋ ndi Manwuri.