ESEKIYEL 48 - Tupuri Bible

Ngel ma jar ma ti ɓĩĩni ma nen gloŋhwede wo no

¹ Ɗúu ɓĩĩni mani Israyeln wo mokay no : Tĩĩ wer le gloŋhwede jag cwede, maŋ faage ma Hetton leʼ Hamade, Hatsar-Enon, ti haagu ma Damasn nen gloŋhwede nen Hamade, le wer kaʼ hãã go nen pele. Ɓĩĩni mani Daŋn joŋ ge wo ni.

² Wo ti jeŋ ngel mani Daŋn kara mono, le nen wer kaʼ raw wo nen pel mono, joŋ ge ni diŋ ngel ma Asere.

Ngel ma Waŋkluu no

³ Ti jeŋ haagu mani Asern mono, le wer kaʼ wo kaŋge go nen pel mono, joŋ ge ni diŋ ɓĩĩni mani Neftali no.

⁴ Ti haagu mani Neftalin mono, le wer kaʼ wo kaŋge go nen pel mono, joŋ ge ni diŋ ɓĩĩni mani Manase no.

⁵ Ti haagu mani Manasen le wer kaʼ wo go kaŋge go nen pel mono, joŋ ge ni diŋ ɓĩĩni mani Efrayim no.

⁶ Ti haagu mani Efrayimn le wer kaʼ wo go nen pel mono, joŋ ge ni diŋ ɓĩĩni mani Ruben no.

⁷ Ti haagu mani Ruben mono, le wer kaʼ wo go kaŋge nen pel mono, joŋ ge ni diŋ ɓĩĩni mani Juda no.

⁸ Ti haagu mani Judan mono, le wer kaʼ wo go kaŋge nen pel mono, sen joŋ ge diŋ ngel maga de mege ti holaŋ ni de ngaɓge doo maga de mege ne ɓĩĩni mani weere Israyel wo no taɗ taɗ lay, maga pããge ɓe joŋ ge nen ngaɓ kilomeder doo ɓaaran no lay, diy ɓe joŋ ge nen ngaɓ kilomeder hwal ti ɓog de nusi. Tiŋ ma bay ɗagn joŋ ge de coʼge diŋ ti gisiɗgi ɓe.

⁹ Ngel maga nday men ge sen ne Manwur mono, pããge ɓe joŋ ge nen ngaɓ kilomeder hwal ti ɓog de nusi, diy ɓen nen ngaɓ kilomeder hwal de nusi.

¹⁰ Ngel maga de caage see ɓe ni ga joŋ ge diŋ ma jar siɗ jagn wo mono, pããge ɓe joŋge nen ngaɓ kilomeder hwal ti ɓoge, le wer kaʼ wo kaŋge go nen pele, diy ɓen joŋ ge nen ngaɓ kilomeder dwee, le gloŋhwede kaʼ wo kaŋge go nen ɓaŋ ni wãybane. Tiŋ ma bay ɗag mani Manwurn joŋ ge ti gisiɗgi ɓe.

¹¹ Ngel ma sen joŋ ge diŋ ma jar siɗ jag jar ni Sadog wo, maga wo go de hooge ti joŋre sen mono, maga hay wo ko de el joŋre ɓi no, day hay men wo see ɓaara go welge ti wur maga Israyel hay wel go mo gà doo maga jar Lefid wel wo wo go no mo gà mono.

¹² Ngel ma sen joŋ ge diŋ ma ɓaara doo ngel ma bay ɗag has debaŋ nono, maga à de mege ɓe see te sir no, see ngel ma jar Lefid wo no.

¹³ Jar Lefid daʼ ge wo ngel ma ɓaaran ti jeŋ haagu mani ɓaaran ni kara lay. Ngel ma ɓaaran joŋ ge doo ma jar siɗ jagn wo no lay, pããge ɓaara ɓog ɓuy joŋ ge nen ngaɓ kilomeder hwal ti ɓog de nusi, diy ɓaaran nen ngaɓ kilomeder dwee.

¹⁴ Á kãã ge wo ma yeege ɓe go gà hase. Á hãn ge go ne jobo gà men ge go see te ngel sen mo hãʼ meʼ gà werga á diŋ ngel maga go de mege diŋ ne Manwuri.

Ngel ma ɓi leegen wo de ngel ma waŋ no

¹⁵ Ti sir se maga de caage mo tiʼ no, ngel joŋ ge yaŋ ni maga pããge ɓe ngaɓ kilomeder hwal ti ɓog de nusi, day diy ɓen ngaɓ kilomeder ɓoge. Ngel ma sen joŋ ge diŋ ngel maga go de demge ma ɓi leege no, de jar ma ɓil ɓen wo no, de jar maga wo nen doo ɓe mono. Day ɓi leegen joŋ ge diŋ ti gisiɗgi ngel no.

¹⁶ Ngaɓge ɓen wo mokay no : Cõõ ɓen wo naa ɓuy joŋ ge wo degaʼ degaʼa. Á ngaɓge wo meeder 2.250 ɓaŋla lay ɓaŋla lay.

¹⁷ Go ti cõõ ɓi leegen naa ɓuy mono, ngel maga go de gwaʼge de koɗ joŋ ge yaŋ ni, maga ngaɓ meeder ti diy ɓen 125,

¹⁸ ti jeŋ ngel maga de mege ne Manwur mo karra no. Ngel ma tigriŋ joŋ ge yaŋ de gwaʼge nen ngaɓ kilomeder dwee ti pããge ɓe pa, see ɓi leegen nen wer no kay no, ma tigriŋ de maŋ sen taw taw pa, see ɓi leegen nen pele. Fẽẽre maga à daɗ ge ti ngel sen ni mo ɓuy joŋ ge diŋ ma hã rege ne jar maga joŋ ge wo ti joŋre ne ɓi leegen mono.

¹⁹ Jar maga joŋ ge wo joŋre ɓi leegen wo ni mono, á mo hay nduu bà wo le diŋ ti ɓĩĩni ma honla laybla no, kããge wo ma joŋ joŋre ti ngel sen ni.

²⁰ Ngel maga à joŋ ge de mege ɓe ne Manwuri, tay de ngel ma ɓi leegen ɓuy mono joŋ ge diŋ ngel maga ngaɓ kilomeder ɓaŋla hwal ti ɓog de nus lay, ɓaŋla hwal ti ɓog de nus lay.

²¹ Maga sen gwaʼ mono, joŋ ge diŋ ma waŋ no. Ɓaŋ ngel ma ɓen joŋ ge diŋ ngel maga go ti ɓi leegen ɓaŋla lay ɓaŋla lay ti sir mani Manwurn mono. Á joŋ ge wo de mbeɗge ti jeŋ ngel ma de carge ma lan wo no, ga diy ɓen joŋ ge nen ngaɓ kilomeder hwal ti ɓog de nusi, le nen wer kaʼ hãã wo go ti haagu ma nen wern tem, ma lan wo nen pele, hãã go ti haagu ma jag maarog no. Sir maga de caage ne Manwur mono, de tiŋ ma bay ɗag no, joŋ ge wo ti gisiɗgi ngel maga go de caage mo sar taʼ no.

²² Ti jeŋ ngel ma jar Lefidn wo no, de ngel maga diŋ ma ɓi leegen mono, ngel maga sen diŋ ma waŋ mono, joŋ ge ti gisiɗgi, ti holaŋ haagu mani Judan wo de haagu mani Benjame no. Ngel ma se ti holaŋn ni joŋ ge diŋ ma waŋ no.

Ngel ma ɓĩĩni ma ɓaŋ ni wãyban wo no

²³ Mokay diŋ te ɓĩĩni maga gwaʼ wo mono. Le wer kaʼ wo go kaŋge nen pele, sen joŋ ge diŋ ɓĩĩni mani Benjame no.

²⁴ Ti haagu mani Benjame no, le wer kaʼ wo go kaŋge nen pele, diŋ ɓĩĩni mani Simeyoŋ no.

²⁵ Ti haagu mani Simeyoŋ mono, le wer kaʼ wo go kaŋge nen pele, diŋ ɓĩĩni mani Isakar no.

²⁶ Ti haagu mani Isakarn mono, le wer kaʼ wo go kaŋge nen pele, diŋ ɓĩĩni mani Sabulon no.

²⁷ Ti haagu mani Sabulon no, le wer kaʼ wo go kaŋge nen pele, diŋ ɓĩĩni mani Gad no.

²⁸ Ti haagu mani Gad no, wo nen ɓaŋ Negef, wo ɓaŋ ni wãyban no kay mono, haagun seege le hãã Tamar, hãã wo go kaŋge jag bii ma Meriban wo Kades, hãã go jag bii yuuri no, nen jag maarog ma kluu no.

²⁹ Mo taʼ so no diŋ sir maga nday carge ɓil ɓe go tabul ma horge de naage wãywáale ti holaŋ ɓĩĩni mani Israyeln wo mo so no, day mo taʼ diŋ ngel ɓaaran wo so, Kay diŋ jag Waŋkluu, Manwuri.

Jag tiŋ ma hwal ti ɓog ma Jerusalem wo no

^30-31 Mokay wo diŋ blam faage ma hwal ti ɓog maga laa ge wo le ɓi leege Jerusalem mono, day faage ma honla ɓuy joŋ ge de ɗúu weere Israyel ma hwal ti ɓog wo no. Wo nen ɓaŋ gloŋhwede ti ngel kor maga ngaɓ meeder 2.250 mono, jag tiŋ mani Ruben no, mani Judan wo de ma Lefidn joŋ ge wo ni.

³² Wo nen wer mono, see kor maga ngaɓ meeder 2.250 mono, naa daʼ ge ni diŋ jag faage mani Josef no, de mani Benjame no, de mani Daŋ no.

³³ Wo nen ɓaŋ ni wãyban mono, pããge kor ɓen tiŋ sen boŋ lay, jag faage ni swaʼ lay. Diŋ jag faage mani Simeyoŋ no, mani Isakarn wo de mani Sabulon no.

³⁴ Wo nen pel no kay mo pa no, korn diŋ sen boŋ pa, de jag faage swaʼ pa, diŋ jag faage mani Gad no, mani Aser no, de mani Neftali no.

³⁵ Pããge korn ɓuy maga joŋ ge de yiŋ ti ɓi leegen mono, joŋ ge nen ngaɓ meeder 9.000. Day so, tĩĩ wer ti wursen mono, ɗúu ɓi leegen joŋ ge gà.