ESEKIYEL 47 - Tupuri Bible

Kããge bii tiŋ Baa no

¹ Á kal ferge le de ɓi nen jag tiŋ Baa no. Day kona diŋ maga bii hay le go yuugi wer ngel ɗiigi ma jag tiŋ Baa no, wo nen were, werga tiŋ Baan hay wo de ngiɗ nen nen were. Biin hay le cwaage wer ngel ma nen ti ɓaŋ war tiŋ Baa no, nen ɓaŋ ni wãyban ngel siɗ jag no.

² Á raw kalge go de ɓi, raw de ɓi nen ti faage ma jagjiŋ ma ɓaŋ gloŋhwede no, day á kal raŋ faale ɓen de ɓi, go ti ɓe degarra ɓuy, hãã go de siigi jagjiŋ maga wo de ngiɗgi nen wer mono. Kona diŋ maga bii le de yuugi ti ɓaŋ war ɓe no.

³ De maga bloon kal wo go nen wer mono, saale hay doo ɓe, se kal ngaɓ ngel wo de ɓe nen meeder kiskis dwee. Á kal cegaɗ biin de ɓi, day biin hay caa me kerjew.

⁴ Á kal ngaɓ ngel nen meeder kiskis dwee pa, kal cegaɗ bii de ɓi, bii ma sen hay caa me go kõyõgre. Á kal ngaɓ ngel nen meeder kiskis dwee pa, kal cegaɗ bii de ɓi, bii ma sen kal caa mege go sage.

⁵ Á kal ngaɓ ngel nen meeder kiskis dwee pa, bii ma sen hay diŋ bii yuuri maga ndi hay bay de kããge ma cegaɗge ɓe wa so, biin hay kuɗum debaŋ nen maga à ʼwẽẽ ni ʼwẽẽge. Á hay diŋ bii yuuri maga à bay de kããge ma cegaɗge ɓe go wa.

⁶ Bloon raw wii mege ga : Ndo ko we ga yawla, wel je táabay? Á kal ferge le de ɓi jag bii yuuri no.

⁷ De maga á wo le ferge de ɓi jag bii yuurin mono, kona diŋ maga koore wo ni debaŋ deŋ jag ɓe ɓaŋla lay ɓaŋla lay.

⁸ Á raw wii mege ga : Bii sen mo hãʼ cegaɗge wo go ti cõõ ngel ma nen wer no, á cwaa ge wo go ɓil Araba day kal ge wo go nen maaroge. De maga á kal we go nen maarogn no, bii maarogn kol ge wo yaŋ go de ele.

⁹ Maysela ɓuy maga tenen caw fĩɗgi mono, joŋ ge yaŋ tenen caw ti ngel maga bii yuurin wo ge ni mo ɓuy no. Day cẽẽ joŋ ge wo yaŋ ngaɓa pur debaŋ, werga bii sen mokay day ge yaŋ go ni, day bii kol ge wo yaŋ go de ele, day tenen joŋ ge yaŋ go ti ngel ɓuy, ti ngel maga bii yuurin wo ge ni mono.

¹⁰ Doo kay nono, jar bag cẽẽ joŋ ge wo yaŋ ni. Le En-Gedi kaʼ hãã nduu go En-Eglayim, à ɓod ge bày yaŋ ni. Cẽẽ sen joŋ ge wo de maŋ cẽẽ ma nen maarog ma kluuri wo, á joŋ ge wo yaŋ ngaɓa debaŋ.

¹¹ Weere gloŋre ɓen wo de gloŋre ma de car nen ti jeŋ ɓen joŋ ge wo go de fãã nen de el gà à men ge ra kaɗ kaɗ ma joŋ manda.

¹² Ti bii yuuri no, ti jeŋ ɓen wo, ti jeŋ ɓe ɓaŋla lay ɓaŋla lay mono, wer koore ma leɗge ma honla ɓuy tĩɗ gi wo yaŋ ni. Sug ɓaara lwaɗ gà leʼge ɓaara taw gà nen few tum mono saara leɗ leɗge ma defay, diŋ wer maga bii ɓaaran kal le go ɓi tiŋ ma bay ɗagn mono. Leʼge ɓaara joŋ ge diŋ ma rege, day sug ɓaara diŋ saŋgu lay.

Waŋkluu ɓod haagu sir Israyel go

¹³ Wãã doo kay diŋ Waŋkluu, Manwuri : Ga mokay diŋ haagu sir maga nday ɓes ge tabul ɓe ma horge ne ɓĩĩni mani Israyel ma hwal ti ɓogn wo mono. Josef daʼ ge ngel ɓoge.

¹⁴ Wosela daʼge ngel doo je ma lan no lay, sen diŋ doo maga ndi hay hãʼ go de maŋ doo ciŋ ga ndi hãn yaŋ ne pããre ɓay wo nono. Sir sen mo joŋ nen joŋge diŋ ma ɓay maga nday mo hay horge tabul ɓe.

¹⁵ Haagu sirn mokay no. Wo nen ɓaŋ gloŋhwede no kay mono, le jag maarog ma kluun kaʼa, ti faage ma Hetton no, hãã nduu go ti faage maga kal wo Sedade.

¹⁶ Hamade, Betora, Sibrayim, ti holaŋ haagu ma Damas wo de haagu ma Hamad, Hatser-Hattikon wo nen ti haagu ma Hafran.

¹⁷ Ti ngel sen haagun joŋ le kaʼ jag maaroge, hãã nduu go Hatsar-Enon, ti haagu ma Damas no, Safon go nen ɓaŋ gloŋhwede, ti haagu ma Hamade : Sen joŋ ge diŋ haagu ma ɓaŋ gloŋhwede no.

¹⁸ Ma nen wern joŋ ge diŋ bii Jurdẽẽ, ti holaŋ Hafran, Damas, de Galaad, de sir Israyele. Nday ngaɓn ge mono tĩĩ wer le ti haagu ma gloŋhweden kaʼa, hãã nduu go jag maarog ma nen wer no : Sen joŋ ge diŋ ɓaŋ ma nen wer no.

¹⁹ Ngel ma ɓaŋ Negef wo nen ɓaŋ ni wãybane, sen seege mokay tĩĩ wer Tamas, hãã nduu go jag bii ma Menba Kades, hãã go jag bii yuuri, nen jag maarog ma kluu no : Sen joŋ ge diŋ ɓaŋ Negef, nen ɓaŋ ni wãyban lay.

²⁰ Ma nen peln joŋ ge diŋ maarog ma kluu no, le ti haagun kaʼ hãã nduu go ti faage maga kal le Hamad mono : Sen joŋ ge diŋ ma nen pel no.

²¹ Nday ɓes ge sir sen ti holaŋ ɓay diŋ see ɓĩĩni mani Israyel wo no.

²² Nday ɓesn ge go ti holaŋ ɓay ma horge de naage wãywáale ma ɓay, de waare maga joŋ ge wo ti holaŋ ɓay. Á joŋ ge wo ti holaŋ ɓay doo jar maga hay wo go liŋ yoo jar Israyel wo ni no lay no. Á ɓes ge ngel tabul ma horgen de wãywáale yoo ɓay ti holaŋ ɓay ɓĩĩni mani Israyel no.

²³ Day doosen no mono, diŋ ti ɓĩĩni maga waaren joŋ ge yoo ɓaara mono, ga nday hã ge ngel tabul ma hooge ne hẽne, Kay diŋ jag Waŋkluu, Manwuri.