ESEKIYEL 46 - Tupuri Bible

Wããre ma ti faage fen maga diŋ ma waŋ tawa

¹ Wãã doo kay diŋ Waŋkluu, Manwuri : Ga Jagjiŋ ma ti feele ma nen ɓil no, maga wo de ngiɗ nen nen wer mono, joŋ ge go de tẽg jag nen naw ma hiiraʼ maga à ti joŋre mono, ama á joŋ ge go de bulgi wur naw Saba, day joŋ ge go de bulgi wur naw kolge few ma defay ciŋ lay.

² Waŋn kal ge le diŋ ti faage ma jagjiŋ jewlere ma nen siigi no, day joŋ ge nen ooge ti jag tiŋ ma de gaɗ ti no. Jar siɗ jagn joŋ ge wo siigi jag ɓe maga à roɗ mo ɓen go ɓuy go, wo de siigi jag tayge ɓe no. Á leʼge monɗra ti jag ngel ɗiigi jagjiŋ no, blam ɓe á kal ge go, day à tẽg ge jagjiŋn go taŋgu wur coŋge gà.

³ Jar ma ɓi sirn leʼge wo monɗra pel Manwur jagjiŋ sen wur saba wo, de wur kolge few ciŋ defay wo.

⁴ Siigi jag maga à roɗ mo ɓen go ɓuy ga waŋn nduu gi de ɓe ne Manwur wur saba mono, joŋ ge diŋ weere sããre hiiraʼ maga wo bay ɗarge see, de gamla ma bay ɗarge see wo.

⁵ Á hã ge coore ble wer gamlan nen maŋ kelew hwal ti dwee, de fen hãge maga á nen hãge ɓe wer weere sããren wo mono. Noo maga á hãn ge mono joŋ ge lidir swaʼ de nus wer coore ble ma maŋ kelew hwal ti dwee no.

⁶ Wur naw kolge few ciŋ ma defayn mono, á siigi jag de wedày ma bay ɗarge see, de weere sããre renam de gamla ni boŋ maga joŋ ge wo bay ɗarge see.

⁷ Á joŋ ge nen hã coore ble wer bloo dàyn ni nen maŋ kelew hwal ti dwee, wer gamlan doosen no lay, ma wer weere sããren wo mono, diŋ see maga se daʼ sen doo ɓe mono. Blam ɓe se hã lidir noo ni swaʼ de nus wer kelew coore ble hwal ti dwee ɓuy.

⁸ De maga waŋn kal le mono, á kal le diŋ ti jagjiŋ jewlere no, day se fer kalge le go diŋ ti faage sen pa.

⁹ De maga jar ma ɓi sirn nduu wo we pel Manwur ma joŋ few ma kluurin wo no, je maga kal we le ma leʼ monɗra ti faage jagjiŋ ma nen gloŋhweden no, kal ge wo go diŋ ti faage jagjiŋ ma nen ni wãyban no. Day je maga kal we le ti faage jewlere ma nen ni wãybann no, kal ge wo go diŋ ti faage jajiŋ ma nen ɓaŋ gloŋhwede no. Á joŋ ge nen ferge go kalge ti jag faage jagjiŋ maga se hay kal le ni mo gà ama á kal ge wo go diŋ ti faage maga le de ngafge de ɓe ɓaŋla mono.

¹⁰ Waŋn kal ge le yoo ɓaara de maga á laa wo le mono, day fer go kal ge de maga á fer wo go laage mono.

¹¹ Ti few wo de few ma kluuri wo mono, coore ble maga à hãn ge wer bloo dày wo de gamlan mono joŋ ge nen maŋ kelew hwal ti dwee. Ma wer weere sããren wo mono sen diŋ see maga se daga se hãn mono. Day wer coore ble maga maŋ kelew hwal ti dwee mo ɓuy, à hã lidir noo wer ɓe ni swaʼ de nusi.

¹² Hayga waŋn joŋ siigi jag maga à roɗ mo ɓen go ɓuy we de dage ɓe, noga siigi jag tayge we de dage ɓe ne Manwur no, à bul gi jagjiŋ maga wo de ngiɗgi nen wer ne hẽne, day á joŋ ge siigi jag ɓe maga à roɗ mo ɓen go ɓuy, de siigi jag tayge ɓen doo maga se joŋn wur saba nono. Blam ɓe á kal ge go, day à tẽg ge jagjiŋ le blam ɓe, de maga se kal we go mono.

¹³ Nen naw tum mono ndo joŋ ge siigi jag maga à roɗ mo ɓen go ɓuy de wesam ma kiŋgi boŋ ma bay ɗarge see ne Manwuri. Á joŋ ge siigi jag sen de jag toŋ ɓuy tum.

¹⁴ Tum de jag toŋ mono ndo hã ge coo ma legeɗ ni de waŋ ge go de noo de el nen maŋ kelew ɓog de nusi. Sen diŋ hã ge ma Manwuri. Wããre sen wo de yerge diŋ ma tum wo pel hãã.

¹⁵ Tum de jag toŋ mono à joŋ ge siigi jag de wesam, coo wo de noo, á diŋ siigi jag maga à roɗ mo ɓen go ɓuy tum.

Tabul ma horge ma jar ni waŋ wo

¹⁶ Wãã doo kay diŋ Waŋkluu, Manwuri : Ga hayga waŋ hã kado we ne mbarga ɓe po yoo weere ɓe wo no, sen joŋ ge see jar ni je sen wo diŋ tabul ma hooge. Sen joŋ ge diŋ nen mo ɓaara ma horge ti wer mani ɓaara no.

¹⁷ Day hayga á hã mopo we ne wel gebee ɓe po maga se maŋn le yoo fẽẽre ɓe ma horge ti tabuln wo no, fen se maga à hãn ne hẽn mono joŋ ge diŋ ma ɓe hãã nduu go nen kiŋgi maga à laa ge jar wo go de budgi ti see ɓaara de ɓe mono. Blam ɓe á fer ge diŋ ma waŋ. Tabul ɓe ma horgen joŋ ge diŋ ma jar ni ɓe wo tawa.

¹⁸ Waŋ kãã ma baa doo ti tabul ma horge ma jar ngaɓan gà. Á joŋ ge nen hãy rage ti tabul ma horge maga diŋ nen mo ma ɓaara mo gà. Fen maga á hãn ge ne jar ni ɓe wo mono, á daʼn ge diŋ yoo fẽẽre maga wo diŋ ma ɓe mono, nen maga jobo mo gwaʼ go de koɗ yoo jar ɓin wo bay nen mo ma ɓe wa.

Bargiŋ tiŋ Baa wo no

¹⁹ Blam sen mono, bloon raw kalge de ɓi ti ngel kalge maga wo ɓil jagjiŋ ɓil tiŋ ma bay ɗag maga wo diŋ ma jar siɗ jagn wo, maga de ngiɗgi wo nen gloŋhwede mono. Day kona diŋ maga ngel po hay wo de kneʼge wo wer taʼa, wo nen pel no kay.

²⁰ Á kal wii mege ga : Á diŋ ngel ma de kneʼge maga jar siɗ jagn kar ge wo fẽẽre siɗgi jag ma far re go ne jar ti no, de siigi jag go ti ɓlagge no, de ngel maga à kar ge fẽẽre hãgen wo ni mono. Sen diŋ ma dig faage maga á mo laa wo wo go de ɓe ɓi feele ma jon siigin wa, day jar mo fãã wo go wa.

²¹ Á raw kalge go de ɓi ɓi feele ma nen faale no, á raw cegaɗge de ɓi ti cõõ feele ma naa wo no. Day kona diŋ maga ti cõõ feelen wo ɓuy jag siigi po hay yaŋ wo ni.

²² Jag siigi sen hay wo kleere naa ɓuy, day hay wo ngaɓge degaʼ degaʼ ɓuy. Pããge ɓaaran hay ngaɓ meeder doo ɓoge, diy ɓaaran hay ngaɓ meeder hwal ti dwee.

²³ Á hay wo go de ɓod kor ti naa ɓuy, day bargiŋ hay wo de kneʼge ni, hay wo de gisgi faale kor no, go ti ɓe cwẽẽ ɓuy.

²⁴ Á kal wii mege ga : Á diŋ tiŋ ma jar joŋ joŋre bargiŋn wo, ngel maga jar kay jar joŋre ma ɓi tiŋ Baan kar wo này siigi jag ma jar ngaɓan wo ni mono.