ESEKIYEL 45 - Tupuri Bible

Sir maga wo de gwaɗge mono

¹ De wur maga nday ɓes sirn we go ma horge tabul ɓen de ndarge wãy waale no, nday maŋ ge ɓaŋ ngel ma bay ɗag po ni ma Manwuri. Baŋ ngel ma bay ɗag maga nen ngaɓ kilomeder hwal ti diy ɓe. Ngel ma sen mo eŋ taʼ ɓuy joŋ ge bay ɗage.

² Wo ɓil ngel se maga de caage mo taʼ no, à caa ge ngel ne tiŋ Baan nen ngaɓ meeder ɓaŋla kiskis ɓog lay ɓaŋla kiskis ɓog ti ɓe doo dwee lay. Day go ti ɓe degarra à men maapo yaŋ go de koɗ ni, maga diy ɓe ngaɓ meeder doo ɓog ti dwee.

³ Ti ngel se maga mo tiʼ ga ngaɓ kilomeder hwal ti ɓog ti pããge ɓe, day ngaɓ kilomeder hwal ti diy ɓe mono, ndo ngaɓ ge ngel yaŋ ni ma joŋ tiŋ ma bay ɗag no, ga diŋ ngel ma de bay ɗag has has no.

⁴ Á diŋ ngel ma debay ɗag maga à maŋn go see te sir no. Á joŋ ge diŋ ma jar siɗ jag maga wo ti joŋre ɓi tiŋ ma bay ɗagn mono, maga yaʼ wo see Manwur ti joŋre ne hẽn mono. Tiŋ ɓaaran joŋ ge diŋ ti ngel sen ni, day sen joŋ ge diŋ ngel maga go diŋ ma bay ɗagn sag sage.

⁵ Ngel ma tigriŋ mo hay ni nen ngaɓ kilomeder hwal ti ɓog de nus ti pããge ɓe, kilomeder dwee ti diy ɓe sen joŋ ge yaŋ de hãge ne jar Lefid wo, maga wo de ko joŋre seele tiŋ Baa de el mono.

⁶ Wo ti jeŋ sir maga go de caage ne Manwur kara mono, à caa ge ngel ma tigriŋ maga ngaɓ kilomeder ti pããge ɓen hwal ti ɓog de nusi, day ngaɓ kilomeder ti diy ɓen ɓog de nus lay, ti jeŋ ngel ma bay ɗag no. Sen joŋ ge diŋ ngel ma ɓi leege no, tiŋ mani Israyeln ɓuy tuu.

⁷ Ma waŋren wo mo lay no, nday men ge ngel go ti jeŋ ngel ma bay ɗag ma ɓog wo no, de ngel maga sen diŋ ma ɓi leegen mono, ti jeŋ ngel ma bay ɗagn karra, ti jeŋ ngel maga sen diŋ ma ɓi leegen wo karra mono. Ma nen peln wo nen pel lay, ma nen wern wo nen wer lay, maga pããge ɓaara wo de laa kããra tĩĩ wer ti haagu maga le nen pel kaʼ hãã wo kaŋge see haagu ma nen wer no.

⁸ Sen joŋ ge diŋ sir ma ɓe, nen mo ma ɓe ɓi sir Israyele. Day waŋre ɓin kãã ge wo ma re ɓil jar ɓin wo go gà so, ama á men ge wo sirn ne tiŋ mani Israyel no, diŋ see ɓĩĩni ɓaaran wo no.

Fẽẽre maga faage ɓaara ti waŋ wo de joŋre waŋ

⁹ Wãã doo kay diŋ Waŋkluu, Manwuri : Ga sen kãã mbe we so waŋre ma Israyel wo no! Joŋ we nen men joŋre girgir ɓayn wo de joŋre frumgi fẽẽre jar ɓay wo go, joŋ we joŋre ma de deele wo de joŋre ma ti ngel ɓe keɗede, bud we jar ɓin wo go jag yãɗge fẽẽre ɓaara maga nday yãɗn go doo ɓaara mono, kay diŋ jag Waŋkluu, Manwuri.

¹⁰ Hay we de fẽẽre ngaɓge ma keɗede, efa ma keɗede, wo de bad ma keɗede.

¹¹ Efa wo de bad mo hay wo ngaɓge diŋ sen boŋ. Homer boŋ ngaɓ bad hwal lay. Faage fen ma ngaɓ rage ti ngel ɓen joŋ ge diŋ homere.

¹² Solay sikle boŋ joŋ ge nen gera doo ɓoge, day solay sikle sen joŋ ge doo hiiraʼa se nen mine boŋ lay.

¹³ Fẽẽre hãge ɓayn wo mono nday joŋ ge nen hãge see ɓaara doo kay nono : Homer boŋ ndo hoo efa go hiiraʼa, ti coore ble ɓo no.

¹⁴ Wããre maga de yerge tinoo mokay lay no, tinoo maga ngaɓ bad boŋ mono. Bad ɓil kor hwal mono maŋ go see ɓe boŋ werga kor boŋ mokay ngaɓ homer maga nen ngaɓ bad hwal boŋ, doo ga homer boŋ ngaɓ bad hwale.

¹⁵ Yoo horog maga wo de koɗge ti ngel koɗ horog ma de el ma ɓi sir Israyeln wo mono, yoo fǐiri wo kiskis ɓog ndo baa ge go boŋ maga joŋ ge diŋ fen hãge go, siigi jag maga à roɗ mo ɓen go ɓuy, siigi jag tayge, maga á mo hay diŋ ma porge go, diŋ jag Waŋkluu, Manwuri.

¹⁶ Jar maga wo ɓi sirn ɓuy mono, wo nen far fẽẽre sen wo mokay ma hãge ne waŋ ma ɓi sir Israyel no.

¹⁷ Waŋ joŋ ge diŋ je maga joŋ siigi jag maga à roɗ mo ɓen go ɓuy mono, de fẽẽre hãgen wo, de siigi jag de yii wo, ti few wo, ti kolge few ciŋ defay wo, ti wur saban wo, ti few ma kluuri ma ti feele mani Israyeln wo ɓuy. Á joŋ ge siigi jag go ti ɓlagge, joŋ hãge go, joŋ siigi jag maga à roɗ mo ɓen go ɓuy, de siigi jag tayge wo ma porge go ti tiŋ mani Israyel no.

¹⁸ Wãã doo kay diŋ Waŋkluu, Manwuri : Ga naw ma taŋgu ɓil few mono, ndo baa ge wedày ma bay ɗarge see, ndo maŋ ge ɓlagge ma ti tiŋ ma bay ɗagn go.

¹⁹ Je siɗ jagn ɗaa ge cíi mo maga á joŋ sii jag go de ɓe ti ɓlagge mono, day á joŋn ge go ti jeŋ jag tiŋ Baa no, go ti cõõ kray ngel siɗ jagn naa ɓuy, ti jagjiŋ ma ti feele ma nen ɓil no.

²⁰ Ndo joŋ ge de maŋ sen doo sen no taw wur naw ma de renam nen few no. Ti je maga joŋ ɓlagge ma doo debay koge we, noga doo debay daʼ faage. Nday joŋ ge porge ti tiŋ Baa no.

²¹ Wur naw ma de hwal ti naa ɓil few ma taŋgun mono, sen joŋ ge diŋ few Pag ma ɓay. Á diŋ few maga joŋ naw renam. Á re ge diŋ hoole pẽẽ ma bay defõõre.

²² Ti wursen mono waŋn joŋ ge siigi jag go ti see ɓe de see ɓe, day go ti ngaɓa ma ti sirn ɓuy de bloo dày ma joŋ siigi jag go ti ɓlagge.

²³ Nen naw ma renam maga fewn de ma joŋge mono, á joŋ ge siigi jag maga à roɗ mo ɓen go ɓuy de bloore deere renam, de gamlare ma bay ɗarge see renam de togloŋ ma joŋ siigi jag go ti ɓlagge nen naw tum boŋ.

²⁴ Blam ɓe á hã coore ble ni nen maŋ kelew doo swaʼ wer bloo dày ma honla ɓuy, day hã noo ni nen lidir hiiraʼ wer bloo dày ma honla ɓuy, de gamla maga á joŋ sii jag go de ɓaara mono.

²⁵ Wur naw ma de hwal ti dwee ɓil few ma de renamn mono, á joŋ ge te siigi jag go ti ɓlagge nen naw renam, de te siigi jag maga à roɗ mo ɓen go ɓuy mono, de hãge coore blen wo de noo no.