ESEKIYEL 44 - Tupuri Bible

Jag tiŋ ma nen wern de mege diŋ ne waŋre wo

¹ Á kal ferge de ɓi jagjiŋ ma nen faale ngel ma bay ɗag no, maga wo de ngiɗ nen nen wer mono. Á hay go de tẽg jage.

² Manwur kal wii mege ga : Jagjiŋ sen mo kaʼ à tẽg ge jag ɓe go, à day bul gi go gà day jobo hee ge ni gà werga Manwuri, Baa mani Israyeln kal le ti ɓaŋ sen ni.

³ Ama, ma waŋn mono, á joŋ ge mbe nen hayge ni, ma re hoole pẽẽ pel Manwuri. Á kal ge wo diŋ ti faage jewlere ma jagjiŋ no, day á fer ge go kalge diŋ ti faage sen pa.

Waare kãã ge wo ma laage ɓi tiŋ Baan gà

⁴ Á kal rawge de ɓi jagjiŋ ma nen ɓaŋ gloŋhwede no, jag tiŋ Baa no. Ndi kal ko nene, kona diŋ maga togoɗge mani Manwur hay go de baa ɓil tiŋ mani Manwur no.

⁵ Ndi kal leʼge de jel nen ɓi gesiŋ. Manwur kal wii mege ga : Wel je táabay, kaŋ ɗiggi ɓo de ele, day ni ndo ko de nen ɓo, laa de sug ɓo, wããre maga ndi wãã ge ra ti jag liŋgi ma ɓod faage seele ma ɓi tiŋ Baan wo mo ɓuy no, de jag liŋgi ɓen wo no. Ko ngel ma woge ɓi tiŋ Baan de ele, de ngel ma see ngel ma bay ɗagn wo ɓuy.

⁶ Ndo wãã ge ne jar ni Israyel ma ti de hegn wo ga : Wãã doo kay nono, diŋ Waŋkluu, Manwuri : Ga joŋre ɓay ma horgesen kãã wo mbaara we maʼ so jar ni Israyel wo!

⁷ Nday hay laa waare ma bay car ɓĩĩni jag jiili ɓaara wo de ma bay car ɓĩĩni ti hõõgese ɓaara wo ma dem tiŋ Baan go. De maga à de woge hãã hoole pẽẽ ɓin wo me, noo fẽẽre wo de cíi fẽẽren wo mono, nday hay blaw tayge jag ɓin go wer joŋre horgese sen wo mo deŋ no.

⁸ Nday joŋ nen ko ngar fẽẽre joŋre ɓi ma bay ɗagn wo gà day nday hay lag jar sen wo, maga á mo ko wo ngar joŋre ɓin ti ngel ɓay ɓi tiŋ ɓi ma bay ɗag no.

⁹ Wãã doo kay diŋ Waŋkluu, Manwuri : Ga waare po maga bay go de caa ɓĩĩni jag jiili ɓe wa, bay go de caa ɓĩĩni ti hõõgese ɓe wa, joŋ ge nen kalge ɓi tiŋ ɓi ma bay ɗagn gà. Waare po maga yoo jar Israyel wo kal ge ni gà.

Faage wããre ma jar Lefid wo

¹⁰ Ma jar Lefid maga hay ɗee wo go see ɓi ti wur maga Israyel hay wel go, hay ngiɗ faale go me ma rawge wer sõõre ɓen wo mono, á soɗ ge wo põõre ɓlagge ɓaara no.

¹¹ Ɓi tiŋ ɓi ma bay ɗagn mono, á joŋ ge wo diŋ jar kayge koɗe, maga joŋ ge wo ɓi jagjiŋ tiŋ Baa no, ti joŋre ne tiŋ Baa no. Á joŋ ge wo diŋ jar ngaɗ horog maga jar nduɗ wo de ɓaara ma joŋ siigi jag maga à roɗ mo ɓen go ɓuy mono, de siigi jag ma tigriŋ wo, day á lag ge wo pel ngaɓan ma joŋ peele ne hara.

¹² Ndi hãʼ go ti ɓaara de maŋ doo war ɓi ciŋ, wãã doo kay diŋ Waŋkluu, Manwuri. Diŋ wer maga á hay kay wo ngaɓan ti joŋge fẽẽre sõõre ɓaaran wo no, day srog wo wer tayge jar Israyel wo joŋ ɓlagge, á soɗ ge wo põõre ɓlagge ɓaara no.

¹³ Á joŋ ge wo nen yaʼge wo see ɓi maŋ, nen maga saara mo hay ti joŋre ɓin gà á day ge wo doo go ti tiŋ ɓi ma bay ɗagn wo gà see ngel ɓi ma bay ɗag has debaŋn wo gà. Á soɗ ge wo põõre glub glub ɓaaran wo de põõre fẽẽre horgese ɓaara maga á hay joŋn wo mono.

¹⁴ Ndi hã ge koge joŋre tiŋ Baan yaŋ ne hara, day á joŋ ge wo joŋre ma ɓil ɓen yaŋ ɓuy, de fẽẽre maga wo nen joŋge ni mo ɓuy no.

Faage wããre ma jar siɗ jag wo

¹⁵ Ama, ma jar ni Sadog jar siɗ jag ma ti wer ma Lefid maga hay wo de lagge ti joŋre me de maga jar Israyel hay wel wo go see ɓi hãã mo tiʼ no, jar ma sen la yaʼge wo mbaara yaŋ see ɓi ti joŋre me, day lag ge wo mbaara yaŋ pel ɓi ma hã noo fẽẽre wo de cíi fẽẽre me, Kay diŋ jag Waŋkluu, Manwuri.

¹⁶ Jar ma sen wo mokay laa ge wo mbaara ɓi tiŋ ɓi ma bay ɗag no, jar ma sen wo mokay yaʼ ge wo mbaara jag table ɓin ti joŋre me, day á ko ge wo joŋre ɓi no.

¹⁷ De maga á nduu gi wo we jag jagjiŋ feele ma nen ɓiln no, á laa ge wo õõbe lẽẽ ti ɓaara. Á laa ge wo õõbe fũy fǐiri wo ti ɓaara gà de maga á yaŋ wo ti joŋren wo go diŋ faale jagjiŋ feele ma nen ɓiln wo de tiŋ Baan no.

¹⁸ Á joŋ ge wo de kaŋ jugu moobe ti ɓaara, day her ge wo cirla lẽẽ wer ɓaara, day á saɗ ge wo diŋ mblaaga maga ɓod gibigri ɓaara gà.

¹⁹ De maga á laa wo we go siigi ma woge ti feele ma nen faalen, ti feele ma nen faalen see ngaɓan wo no, á naa ge wo õõbe ma ti ɓaara maga á joŋ wo joŋre de ɓe mono, day laa wo ra go ɓil tiŋ wo, ti ngel ma bay ɗage. Á laa wo õõbe ma tigriŋ ti ɓaara nen maga saara mo fãã ngaɓan go de õõbe ɓaaran wo wa.

²⁰ Á cẽẽ ge wo ti ɓaara go gà day men ge wo ti ɓaara bagge gà lay, ama daga á mo caw wo riŋ ɓaara go :

²¹ Je siɗ jag po jo ge yii gà de maga á kal ge we feele ma nen ɓiln no.

²² Á kãã ge wo ma da wãy dewur gà da ge wãy maga go de busgi gà ama á da ge wo diŋ mayre maga bay wo de woge see jobo wa ɗa ti wer mani Israyel no, noga diŋ wãy dewuri, maga hayga hay we diŋ wãy je siɗ jag no.

²³ Á had ge wo jar ɓin wo yaŋ ma caa ɓil mo ma bay ɗagn wo de mo ma de ɗag no, á joŋ ge wo yaŋ nen kaŋ nen ɓaara ti mo ma de demgen wo de mo ma de fããge go no.

²⁴ Á day we ti ngel kiida po laybla no, wããre caage kiida sen joŋ ge diŋ ma ɓaara. Á joŋ ge wo nen caa kiidan diŋ see wããre maga ndi go de kaŋ rage mo taɗ taɗ no, de jag liŋgi ɓi ma ɓod faage seelen wo no. Á hoo ge wo sug ti jag liŋgi ɓin wo no, de jag liŋgi ɓi ma de yergen wo no, ti few ɓin wo ɓuy, day á fãã ge wo saba ɓin wo yaŋ go.

²⁵ Je siɗ jag wo ge see húulí gà doo hẽẽne maga se mo dem see se go see húulí wa. Á joŋ ge mbe nen dem see ɓe go mono diŋ ti húulí pããbe, maabe, mbarga ma twar noga ma twãy, hẽnbe noga maygemaabe maga bay go de da war wa ɗa.

²⁶ Blam fããge see ɓen go mono, à kee ge naw ne hẽn renam.

²⁷ Wur maga á kal ti ngel ma bay ɗagn mono, á wo ge de siigi jag ma ti ɓlagge ɓe no, diŋ jag Waŋkluu, Manwuri.

²⁸ Mokay diŋ tabul ma horge maga á joŋ ge wo de ɓe mono. Joŋ ge tabul ɓaara ma horge diŋ ndi. Nday hã ge ngel po ne hara maga joŋ ge diŋ ɓaara ɓi sir Israyel lay gà. Ndi joŋ ge diŋ ngel ɓaaran diŋ ndi.

²⁹ Rege ɓaara joŋ ge diŋ fẽẽre hãgen wo de fẽẽre siɗgi jag ma ti ɓlagge wo de siɗgi jag ma far re go ne jar ti no, de fẽẽre maga wo go de diggi ɓi sir Israyel mo ɓuy joŋ ge wo diŋ ɓaara.

³⁰ Jag fẽẽre ma taŋgun wo, fẽẽre maga nday far ra go mo ɓuy, maapo gwaʼ go gà á joŋ ge wo diŋ ma jar siɗ jagn wo. Nday hã ge coo ma de waŋge ɓay ma taŋgun ne je siɗ jag no, nen maga bosaʼ mani Baan mo hay ti tiŋ mani ɓo no.

³¹ Jar siɗ jagn joŋ wo nen re wedwee po noga horog po ma de húulí, noga kẽẽ hay baa ne, noga này po ma de húulí ɓuy mono saara reen ge gà.