ESEKIYEL 43 - Tupuri Bible

Baa fer le ɓi tiŋ Baa no

¹ Á kal rawge de ɓi jagjiŋ no, jagjiŋ maga wo de ngiɗ nen nen wer mono.

² Kona diŋ maga togoɗge Baa mani Israyeln hay le seege nen were. Gẽẽge ɓe hay doo ngarge jag kaŋngaw bii ma kluuri wo nono, day sir hay sagge wer togoɗge ɓe no.

³ Naage nen maga hay joŋ me mono hay de maŋ naage nen maga hay joŋ me de wur maga ndi hay nduu ɓlag ɓi leegen go mono. Day ndarge nen sen hay wo de maŋ maga hay joŋ wo me le jag bii Kebar mono. Ndi kal leʼge gesiŋ de jel nen ɓi gesiŋ.

⁴ Togoɗge mani Manwurn kal seege le nen see tiŋ Baa no, ti faage jagjiŋ maga glig ɓen hay wo de ngiɗ nen nen wer mono.

⁵ Doo kay nono, Nenterse kal maŋ mege, kal rawge de ɓi ɓi feele ma nen ɓil no. Kona diŋ maga togoɗge mani Manwurn kal baa ɓil tiŋ Baan go.

⁶ Ndi kal laage mono jobo le de wãã wããre le me ɓi tiŋ Baa no, day jobo de oole ti jeŋ ɓi la deŋ.

⁷ Á kal wii mege ga : Wel je táabay, mo taʼ la diŋ ngel paale waŋ ɓi no, ngel maga ndi kaŋ ge ɓi coo ɓaale ɓi ni mono. Ndi hay ge yaŋ ti holaŋ jar Israyel wo ni ma tum. Tiŋ mani Israyeln wo de waŋre ɓaaran kãã ge wo ma dem ɗúu ɓi ma bay ɗagn de wããre figliw ɓaaran wo de húulí waŋre ɓaaran wo ti ngel siɗ jag ɓaara ma de farge ciŋn wo gà so.

⁸ Waŋren hay joŋ wo ngel ɗiigi jag tiŋ ɓaaran wo maŋ see ngel ɗiigi jag tiŋ ma ɓi no, joŋ wo koore jag tiŋ ɓaaran wo maŋ tuu ti jeŋ koore jag tiŋ ma ɓi no. Go ti holaŋ tiŋ ma ɓin wo de tiŋ ma ɓaaran diŋ glig tiʼ tawa. Diŋ doo kay no so no ga á joŋ wo nen dem ɗúu ɓi ma bay ɗagn go de fẽẽre horgese ɓaara maga á joŋ wo ra mono. Diŋ wersen so ga ndi hay roɗ ra go de ɓil sõõge ɓin mono.

⁹ Patalam no, á yaʼ ge wo joŋre figliw ɓaaran yaŋ wo wo go see ɓi hãã, de húulí waŋre ɓaaran wo no, day ndi hay ge yaŋ ti holaŋ ɓaara ma tum.

¹⁰ Ndo, wel je táabay joŋ nen car nen ma ɓi tiŋ Baan go ne jar Israyel wo pel taɗ taɗe. Daga á mo ko wo ɓlagge ɓaara no, day sõõre mo joŋ ra, day á mo ngaɓ wo ngel ɓe go taʼa.

¹¹ Hayga sõõre joŋ ra we ti fẽẽre maga á joŋ wo ra mo deŋ ɓuy we no, ni ndo kaŋ nen ɓaara ti kaʼ tiŋ Baa no. Ngaɓ booge ɓe kaʼn ne hara, jag faage ɓe wo no, de fodo fẽẽre maga wo de joŋge see ɓe mono, de jag liŋgi ɓe ma ɓod faage seelen wo, de jag liŋgi ɓen wo ɓuy. Ngaɓn go ne hara de car nen de nen ɓaara hãʼã. Á ko ge wo fodo fẽẽre ɓen wo yaŋ go de ele, de jag liŋgi ɓe ma ɓod faage seelen wo no, á joŋ ge wo yaŋ doo sen nono. Jag liŋgi tiŋ Baan nà diŋ doo kay nono.

¹² Ciŋ ti pẽẽge húulìn mono, ti ɓen go degarra ɓuy go debay ɗag has debaŋe. Mokay so no, diŋ jag liŋgi ma ti tiŋ Baa no.

Ngel siɗ jagn wo de fẽẽre siɗ jag wo no

¹³ Mokay diŋ ngaɓge maga à ngaɓ ngel siɗ jagn de ɓe mono, ma honla ɓuy hay depããge dedaŋ saŋtimeder maga à ngaɓ fẽẽre mbe de ɓe hãy koɗ nen palme boŋ. Tuu maga hay go ti ɓe degarra mono kuɗum ɓen hay ngaɓ saŋtimeder doo dwee, diy ɓen hay ngaɓ saŋtimeder doo dwee, diŋdiŋ jag ɓen hay ngaɓ saŋtimeder doo ɓog ti dwee ciŋ.

¹⁴ Le ti glog ɓe ma de teege gesiŋn kaʼ hãã nduu go ti kray ɓe ma nen gesiŋn mono sen hay ngaɓ saŋtimeder doo dwee, holaŋ ngel ma pel ɓen hay ngaɓ saŋtimeder go ti jeŋ ni doo dwee. Tĩĩ wer see ma sen ni wo kaŋge see ma lan mono, meeder hay go ti holaŋ ni ɓoge.

¹⁵ Meene swee ngel siɗ jagn hay ngaɓ meeder ɓoge, se hay go de ndar cõõ ciŋ kaɗkaɗ naa.

¹⁶ Meene swee ɓen hay go degaʼ degaʼa, á hay ngaɓ meeder ɓaŋla hiiraʼ ɓaŋla hiiraʼ lay.

¹⁷ Kray ɓen hay go degaʼ degaʼ ɓuy lay, á hay ngaɓ meeder renam ɓaŋla lay ɓaŋla lay. Go ti diŋdiŋ ɓen degarra ɓuy mono, sen hay ngaɓ saŋtimeder doo ɓog ti dwee ciŋ. Jeŋ ɓen go degarra ɓuy hay ngaɓ saŋtimeder doo dwee. Á hay ɗiigi wo ni diŋ de ngel kaŋ ɓaale maga wo nen wer no kay no.

¹⁸ Á kal wii mege ga : Wel je táabay wãã doo kay diŋ Waŋkluu, Manwuri : Ga mokay diŋ wããre maga wo de yerge ti wããre ngel siɗ jagn mono, ti wur maga à boon ge ma joŋ siigi jag maga à roɗ mo ɓen go ɓuy ni, de ma jwed cíi ni mono.

¹⁹ Ndo hã ge bloo dày ne jar siɗ jag jar Lefid wo. Jar ma ti cẽw mani Sadogn wo, maga Manwur de hoo rage ti joŋre ne hẽn ga yaʼge see ɓe diŋ saara mono : Kay diŋ jag Waŋkluu, Manwuri. Á baa ge wo wedày twar ma joŋ siigi jag go ti ɓlagge.

²⁰ Ndo ɗaa ge cíi ɓe no, day ndo jwedn ge ti cõõ ngel siɗ jag ma naa no, day ti hulug cõõ kray ɓe ma naa no, go ti ngel maga go ti ɓe degarra ɓuy mono. Diŋ doo kay ga ndo maŋ ge ɓlagge ma ti ngel siɗ jagn go, day ndo por ge go ti ɓe.

²¹ Ndo baa ge bloo dày ma joŋ siigi jag go ti ɓlagge, day à roɗn ge go ti ngel maga go de ngaɓge taʼ ɓi tiŋ mani Baan ni, go faale ngel ma bay ɗag no.

²² Wur naw ma de ɓogn mono, ndo nduu gi de togloŋ ma bay ɗarge see ma joŋ siigi jag go ti ɓlagge, day à maŋ ge ɓlagge ma ti ngel siɗ jagn go doo maga à hay maŋn go de bloo dàyn no pa no.

²³ De maga ndo taw siigi jag ma ti ɓlaggen we go no, ndo baa ge wedày ma bay ɗarge see, de gamla ma bay ɗarge see, maga ndo baan le yoo fǐiri wo.

²⁴ Ndo nduu gi de ɓaara pel Manwuri, jar siɗ jagn joŋ ge wo cuu ti ɓaara, day joŋ ge wo siigi jag maga à roɗ mo ɓen go ɓuy de ɓaara ne Manwuri.

²⁵ Nen naw renam, ndo joŋ ge siigi jag ti naw tum de togloŋ ti ɓlagge. Ndo joŋ ge siigi jag go ti naw tum de wedày, de gamla maga à baan le yoo fǐiri wo, ma honla yoo ɓaara ɓuy bay ɗarge see.

²⁶ Nen naw renam, á joŋ ge porge go ti ngel siɗ jag no. Á fããn ge go, day à joŋn ge go bay ɗage.

²⁷ De maga naw sen mokay leʼ wo jag we go no, tĩĩ wer wur naw ma de nenmaʼ no, day blam ɓe mono, jar siɗ jagn joŋ ge wo fẽẽre siɗ jag ɓay maga à roɗ mo ɓen go ɓuy mono ti ngel siɗ jag no, de siɗgi jag tayge ɓay wo no, day ndi yãã ge doo ɓay yaŋ go de ɓaara, Kay diŋ jag Waŋkluu, Manwuri.