ESEKIYEL 4 - Tupuri Bible

Esekiyel wo de wããre cirgi ti Jerusalem go no

¹ Ma ɓo, wel je táabay, maŋ brig boŋ, ni ndo kaŋn pel ɓo taʼa. Joŋ fodo po de maŋ ɓi leege Jerusalem ciŋ ti ɓe.

² Blam ɓe ni ndo joŋ mo ma kaŋ nen ga à go de cir ti ɓe, horge aale sir de mbar ti taɗ taɗ de yiŋ ti kor no, ni ndo lag jar go ti kaŋ de mbar ti kaʼkaʼa, cir masiŋ ma durgi wo go ti ɓe cwẽẽ deŋ ɓuy lay.

³ Blam ɓe ni ndo maŋ halagle boo po kaŋkaraŋ, ni ndo jagn ti holaŋ ɓay de ɓi leegen doo kor ne no. Ni ndo kaŋ nen ɓo wo ko ɓi leegen ɗeŋrese. Á go de cir ti ɓe, day go de yããge ɓe diŋ ndo. Sen diŋ fen ma kaŋ nene, ma wii jar Israyel wo go mo sen pel bole.

⁴ Day ndo ma ɓo no, suu go ti ɓaŋ gùri, kaŋ põõre ɓlagge jar Israyel wo ni. Naw maga ndo joŋ ge de súuli ti ɓaŋ sen ni mo tiʼ ɓuy no, ndo soɗ ge ɓlagge ɓaara no.

⁵ Ndi kaŋ mo ti diŋ ngaɓa naw maga de ngaɓa degaʼ de kiŋgi ɓlagge ɓaara no, naw kiskis swaʼ ti ɓe doo kaawaʼa. Ndo soɗ ge ɓlagge jar ni Israyel wo diŋ doo kay ne no.

⁶ De maga ndo taw naw sen wo we go no, ni ndo suu ti ɓaŋ ware, day ndo soɗ ge ɓlagge jar ni Juda wo nen naw doo naa. Ndi kaŋ naw mo ti boŋ maga de ngaɓge nen kiŋgi boŋ lay.

⁷ Ndo ngiɗ gi nen wo, day ɗaw ge doo ɓo ma de dekoɗn wo nen Jerusalem maga go de cir ti mono, day ni ndo naa nen wããre ma jag ɓin go ti ɓe.

⁸ Day ndi laa ge saale yaŋ mo ti nen maga ndo mo ngiɗ ɓaŋla ɓaŋla wa, hãã ndo ɓoʼ jag naw maga ndo joŋ ge de súuli eŋ tiʼn wo go ɗa.

⁹ Day ni ndo hoo coore ble wo de coore orje, de fefe, de laŋtiye, de cããre, de pigri. Tay nen ɓaara ɓuy ɓil mopo, ni ndo joŋ hoole pẽẽ de ɓe, nen naw maga ndo joŋn ge de súuli ti ɓaŋ sen ni mono. Ndo reen ge nen naw kiskis swaʼ ti ɓe doo kaawaʼa.

¹⁰ Rege maga ndo reen ge nen naw tum mono joŋ ge nen maŋ klew gram kis ti ɓe doo hiiraʼ no kay. Diŋ rege maga ndo reen ge nen naw sen wo mo taʼ ɓuy no.

¹¹ Bii maga ndo jon mono joŋ ge go de ngaɓge nen lidir boŋ. Sen diŋ bii maga ndo jon ge nen naw sen wo mo taʼ ɓuy no.

¹² Ndo re ge diŋ gato orge, maga ndo karn ge de mbiiri jar téebeere wo de mbèere nen ɓaara.

¹³ Manwur day ga : Diŋ doo kay no so no ga jar Israyel re ge wo hoole pẽẽ ɓaara ma de demgen yoo wer sir maga ndi wo go de nii rage ni mo so no.

¹⁴ Ndi day ga : O! Waŋkluu, Manwuri, le ti klee ɓi hãã ndi go de ɗeege see mo ma de demge hãã. Ndi re mo ma de húulí, noga mopo ʼwarn mo sen go ʼwarge mono ndi re sen ti boŋ gà. Ndi hee này mo ma de demge ti boŋ jag ɓi gà.

¹⁵ Á kal fer wããre me ga : Koɗa, ndi de hã ge ne ndo diŋ mbiiri day, hay nen maga á de hay joŋ diŋ mbiiri je táabay, patala ndo kar ge hoole pẽẽ ɓon diŋ de ɓe.

¹⁶ Á kal wii mege tigriŋ pa ga : Wel je táabay, koɗa ndi geɗeb nen geɗem-geɗem hoole pẽẽ ma Jerusalemn yaŋ go. Jarn re ge wo hoole ɓaaran yaŋ de ɗogge jo ge wo bii ɓaaran yaŋ de lawge debaŋ tuu lay.

¹⁷ Hoole pẽẽ joŋ ge wo de bii gà so, sen diŋ fen maga gay ge wosela yaŋ ɓuy, day jar laɓ ge wo yaŋ go wer ɓlagge ɓaara no.