ESEKIYEL 3 - Tupuri Bible

¹ Á wii me ga : Wel je táabay, re mo maga ndo daʼn mono, re kefder se ma de kaagen go, ni ndo wo fer wããre ne jar ni Israyel wo.

² Ndi kal hãʼ jag ɓi go, á kal joŋ ge ga ndi mo re kefder seno.

³ Á wii me ga : Wel je táabay, hã rege ne ɓil ɓo, day ni ndo wùu ɓiiri ɓo go de kefder se ma de kaage maga ndi hãn mo mono! Ndi kal rege ɓe go, á kal joŋge jag ɓi telem doo noo yõõre nono.

⁴ Á wii me ga : Wel je táabay, see ɓiŋ jar ni Israyel wo, day ni ndo fer ge wããre ɓin wo ne hara!

⁵ Werga ndi ɓoʼ ndo wo bay ɓiŋ jar maga wãɗ wo jag dehãy maga laa de gaali wa, ga day ndo laa ge wããre ɓaara gà bagla nà bay no wa, ama diŋ ɓiŋ jar ni Israyel wo.

⁶ Ndi ɓoʼ ndo wo bay ɓiŋ jar po wo ngaɓa maga wãɗ wo diŋ jag dehãy maga de gaali ma laage ga day ndo laa ge wããre ɓaaran gà nà bay wa. Ti faage ɓe hayga ndi de ɓoʼ mo we wo nà diŋ ɓiŋ jar ma sen wo no, á de hay laa ge wo wããre ɓon yaw.

⁷ Ama jar ni Israyel day ge wo coʼ sug ɓo gà werga á bay wo dayge coʼ sug ɓi wa. Werga jar ni Israyel wo ɓuy wo go de hig nen ɓaara, wo go de hig jiili ɓaara.

⁸ Ko nen ɓo, patala ndi nger nen ɓo go lay, maga ndo mo giŋ ma ɓaaran de ɓe lay. Ndi hig pel ɓo go, maga ndo mo giŋ ma ɓaaran de ɓe lay.

⁹ Ndi kol ge pel ɓo yaŋ graŋ doo húulì diyamaŋ nono, graŋ dedaŋ húulì ma graŋ. Joŋ hẽẽne ɓaara wa, daɗ pel ɓaara wa, werga á wo diŋ jar ti graŋ.

¹⁰ Á wii me ga : Wel je táabay, yããn jag jiili ɓo, day ni ndo laa wããre maga ndi wãã ge ra ne ndo ɓuy de sug ɓo!

¹¹ See wo daʼ jar maga wo le go de hooge daŋgay mono, weere jar ɓon wo no, ndo fer ge wããre ne hara. Á mo laa bà wo wããre ɓo no, noga mo lag bà wo ni gà ndo wii gi ra ga : Wãã doo kay diŋ Waŋkluu, Manwuri.

¹² Nenterse kal maŋ mege, ndi kal laa ngarge jag ma debaŋ le faale ɓi ngarge ga : Daga Manwur mo hay de togoɗge ti ngel hayle ɓe no.

¹³ Ndi kal laa ngarge jag graŋ nàyren wo de grid rage see kããra, ngarge jag ɓaalen wo ti jeŋ ɓaara ni lay, de ngarge jag po de ngarge ni debaŋ.

¹⁴ Day nenterse po kal maŋ mege, kal rawge de ɓi. Ndi kal rawge go car jag jiili, go de sõõ ɓili, day doo Manwuri, Baa hay joŋ joŋre de ɓi de egre debaŋ.

¹⁵ Ndi kal dayge Tel-Afif ni jar maga á hoo ra le go daŋgay mono, ga hay wo de lagge jag maarog Kebare, day ti ngel maga á hay wo de lagge ni mono. Ndi kal hayge ti ngel yoo ɓaara ni go de gayre yeʼ nen naw renam.

Esekiyel joŋ ge diŋ je gor ti jar Israyel wora

¹⁶ Ti tawge ti naw ma renamn mono, Manwur kal fer wããre me doo kay ga :

¹⁷ Wel je táabay, ndi kaŋ mo diŋ je gor ti tiŋ mani jar ni Israyeln wo no. Ndo laa ge wããre maga kal wo go jag ɓi mono, day ndo wii gi ra go de ɓe pel bol ga wãã doosen ne no diŋ ndi.

¹⁸ De maga ndi wãã ge we ne je ɓlaggen ga : Kidolgi ndo huu gi go! Hayga ndo wiin we go pel bol gà hayga ndo fer wããre we go ma wii je ɓlaggen go pel bol gà nen maga á mo ngiɗ faale go ne ɓlagge ɓen we gà nen maga tenen ɓen mo yãã go we gà no, je ɓlagge sen huu gi go ti faage ɓe ma de ɓlagge no day ndi wii gi cíi ɓe diŋ doo ɓo.

¹⁹ Ama hayga ndo, ndo wii je ɓlaggen we go pel bole, day se ngiɗ faale we go ne ɓlagge ɓen gà men faage ɓe ma de ɓlaggen we gà no, á huu gi go ti faage ɓe ma de ɓlagge no, day ma ɓon ndo yãã ge tenen ɓon yaŋ go.

²⁰ Hayga je ma de deele men joŋre ɓe ma de deelen we go day raw we joŋ joŋre ma de ɓlagge no, ndi kaŋ ge giniɗ ne hẽn pele, day á huu gi go. Hayga ndo bay we go de wiigi ɓe pel bol wa no, á huu gi nen ɓlagge ɓe no. Á ferge ɗig ti ti joŋre ma de deele maga á hay joŋ ra go mo gà so, day ndi wii gi cíi ɓe doo ɓo.

²¹ Ama hayga ndo, ndo wii je ma de deelen we go pel bole, nen maga je ma de deelen mo joŋ ɓlagge wa, day á joŋ ɓlagge we gà no, kidolgi, á joŋ ge tenen caw diŋ wer maga à hay wiin go pel bole. Day ma ɓon ndo yãã ge tenen ɓon yaŋ go.

Baa wii Esekiyel ga á mo hay go de ngar ngel po taʼ baʼ baʼa

²² Ti ngel la ni pa mono, doo Manwur kal joŋge de ɓi pa, day á kal wii mege ga : Ur go ciŋ, ni ndo kal go, see wo go ɓi loge ni ndi wãã ge wããre yaŋ wo ne ndo ni.

²³ Ndi kal urgi go ciŋ, ndi kal rawge ɓi loge kona diŋ maga togoɗge mani Manwurn de oole ni, doo maga ndi hay kon le jag maarog Kebar nono. Doo kay nono, ndi raw leʼge de jel nen ɓi gesiŋ.

²⁴ Nenterse kal kalge me ɓili, kal oo mege go ti deele. Manwur kal fer wããre me day ga : See tẽg jag tiŋ ɓon, ti ɓo.

²⁵ Day so, ndo, wel je táabay, á laa ge wo saale yaŋ mo ti, day saʼge wo ndo yaŋ de ɓe. Ndo kal ge go yoo ɓaara ni gà.

²⁶ Ndi halag ge trum ɓo go tagrum ɓo, nen maga ndo mo hay go mbululum, day ndo mo joŋ nen joŋ dekwãy ne hara wa, werga á wo diŋ jar ti graŋ.

²⁷ Ama de maga ndi wãã ge wããre we mono, ndi bul gi jag ɓo yaŋ go, maga ndo mo wii ra ga : Wãã doo kay ne no diŋ Waŋkluu Manwuri. Daga je maga yaŋ nen laage no, mo laa lay, day je maga wãã we ga se oo ni gà lay no, mo oo mbe ni wa lay, werga á wo diŋ jar ti graŋ.