ESEKIYEL 2 - Tupuri Bible

Baa ɓoʼ Esekiyel wo ɓiŋ jar Israyel wora

¹ Á kal wii mege ga : Wel je táabay, oo go deele day ni ndi wãã wããre yaŋ ne ndo.

² De maga á wãã wããre sen me mo tuu no, Nenterse raw kalge me ɓil tuu, kal oo mege go deele. Day ndi kal coʼ sug je maga hay ti wããre me mono.

³ Á raw wii mege ga : Wel je táabay, de ɓoʼ moge wo ɓiŋ jar Israyel wo diŋ ndi. Ɓiŋ jar ma bay ko Baa wo, ɓiŋ wer sir maga wo de giŋ mege. Á wo de pããre ɓaara ɓuy wo diŋ jar joŋ re see ɓi hãyhãy hãã nduu go de wur ma wara no.

⁴ Weeren wo go de hig nen ɓaara, wo go de hig jiili ɓaara. Ndi ɓoʼ mo wo see ɓaara. Ndo wii gi ra ga : Wãã doo kay diŋ Waŋkluu, Manwuri.

⁵ Daga á mo laa bà wo ne, noga mo lag bà wo kaŋ ɗiggi ni gà werga á wo diŋ jar ti graŋ so mono, á ko ge wo yaŋ mbaara ga je ndar nen wããre ma jag go Baa yaŋ yoo saara la.

⁶ Ma ɓo, wel je táabay, joŋ hẽẽne ɓaara wa, joŋ hẽẽne doo wããre ɓaaran wa, werga ndo see ɓo diŋ yoo hõõre, yoo kesme, day ndo de hayle diŋ ti mbreŋ boo wora. Joŋ hẽẽne wããre ɓaaran wa, daɗ wer nen ɓaara wa, werga á wo diŋ jar ti graŋ.

⁷ Ndo fer ge wããre ɓin wo ne hara, á mo lag bà wo ni gà mo kaŋ bà wo ɗiggi ni gà werga á wo diŋ jar ti graŋ so mono.

⁸ Ma ɓo, ndo wel je táabay, coʼ sug wããre maga ndi wããn ge mo mono. Joŋ ti graŋ doo jar ti graŋ wo no wa. Hãʼ jag ɓo go, ni ndo re fen maga ndi hãn ge mo mono.

⁹ Ndi raw ko nene, kona doo po hay le de coŋge nen see ɓi de ɗaw kefder ma de kaage kay.

¹⁰ Á kal blarge ɓe go me pele. Á hay de yerge nen ɓil lay nen faale lay. Á hay de yerge ɓil ɓe ni ga : Lawge wo, ʼwadge war wo, ndumgi wora.