ESDRAS 9 - Tupuri Bible

Jar Jwif da wo mayre jar dehãy wo

¹ Blam maga sen maŋ jag go mono, jar ma pel jar po wo mbag raw wo age riŋ mege ga : Jar Israyel bay wo go de caa see ɓaara de jar sirn wo la wa, joŋ wo fẽẽre ma horge see mani jar sen wo ga wo diŋ jar Kanaan wo, jar Hitid wo, jar Feresid wo, jar Yebusid wo, jar Amonid wo, jar Mohabid wo, jar Ejipte wo de jar Amorid wo mono.

² Werga, á hoo wo mayre ɓaara wo naare jag ɓaara lay, ne weere ɓaara wo lay. Saara glub wer ma bay ɗagn go, tay wo nen ɓe go de jar ma ɓil sir sen la wo. Jar ma peln wo de jar ma seege de jarn wo diŋ jar maga wo pel taw ti joŋ ge mo se de ɓlagge no.

³ De maga ndi laa re sen mokay ndi raw ngrag õõbe ma ti ɓin wo go de õõbe ɓi ma kluu no, ndi ndar riŋ ti ɓi wo go de piŋ ma jag ɓi no, day ndi raw hayge go gesiŋ de lawge.

⁴ Jar maga hay wo daɗge doo wããre mani Baa ma Israyel raw wo tayge le see ɓi ti re se de ɓlagge maga jar maga hay wo le go ti daŋgay joŋn wo mono. Ndi ma ɓi ndi raw gwaʼ ge ɓi de hayle gesiŋ ni yeʼ de lawge hãã wo go ti wur siigi jag ma de law no.

Esdras tos ti jar joŋ ɓlaggen wo

⁵ Ti wur siigi jag ma de lawn mono, ndi kal urgi le go ciŋ nen lawge ɓi no, ndi hay de õõbe ɓi ma ti ɓin wo de õõbe ɓi ma kluu maga hay wo go de ngragge ti ɗa. Ndi raw laa kõyõgre gesiŋ, ndi kal hoo doo wo ciŋ ne Manwuri, Baa ɓi no.

⁶ Ndi day ga : Baa ɓi no, ndi hee ti go gesiŋ. Sõõre joŋ me ma maŋ nen ɓi wo ciŋ ko moge, Baa ɓi no. Werga, ɓlagge wùrn raw wo ti wùr go, debaycõõren gẽẽ day raw wo wo go ciŋ hãã.

⁷ Hãã le ti wur mani pããre wùrn wo, hãã go wara wùr de re ti kluu debaŋ pel ɓo. À hay hã wùr de waŋre wùrn wo de jar siɗ jag wùrn wo go ne waŋre mani jar dehãy wo ɓi coo doo. À kaŋ moslam nen wùr ti, à hoo wùr wo go ti daŋgay. À frum wùr go day à kaŋ sõõre ne wùr ti doo ga á wara no hãʼ nà diŋ wer ɓlagge wùrn wo.

⁸ Day mbe de sen ɓuy, patala Manwuri, Baa wùrn fer ko decoo wùri, men jar po wo yoo wùri day fer cor gefay tiŋn ne wùr ti ngel ɓe ma bay ɗagn nen maga ndo Baa wùrn ndo fer go caa nen wùr day wùr mo hay tenen mbe tiʼ jag gebee maga wùr de joŋge ɓe mono.

⁹ Werga wùr diŋ gebeere day Baa wùrn men wùr wo go nen bon ni gà. Á hay joŋ ɓil de el ti wùr pel waŋren wo ma ferge hã tenen ne wùr nen maga wùr mo fer maŋ tiŋ mani Baa wùrn go ciŋ, wùr mo fer boo ngel maga sen leɗ wo go mono. Sen mono maga se hã ngel iggi ne wùr ti sir Juda wo de Jerusalem.

¹⁰ Patala wùr wãã baa mayse blam sen ni mo pa la Baa wùr no?

¹¹ Werga wùr men jag liŋgi ɓo maga ndo hay yer ra ne wùr nen doo weere jõõre ɓo jar ndar nen wããre ma jag ɓon wo go. Ndo hay wãã go ga : Sir maga nday day woge yããge ɓe mono diŋ sir maga de ɗage, wer fẽẽre yeɗe mani jar maga wo ti sir sen wo ni mono, wer fẽẽre horge see maga á baa wo sirn go ɓuy de fẽẽre yeɗe wo.

¹² Hã we mayre ɓay wo ne weere ɓaara wo wa, hoo we mayre ɓaara wo ne weere ɓay wo wa lay. Nday kaŋ ge ɗiggi ga á mo hay wo jam gà lay, ga á mo hay wo tiʼ de el gà lay. Doo kay no so no nday kol ge yaŋ de egre, nday re ge fẽẽre ma de woore maga joŋ wo ɓil sir ni yaŋ wo, day nday men ge sir yaŋ go ne weere ɓay wo ma tum.

¹³ Baa wùr no, ndo joŋ bà bon wùr go ti ɓlagge wùrn wo ɓuy gà yaw. Day blam maga fen sen a go ne wùr ti wer joŋre wùr ma de ɓlaggen wo de re ma kluu ma de baa wùrn mo ɓuy day ndo men jar ne wùr mbag bà yaw so mono,

¹⁴ wùr mbe nen maga wùr fer kaŋ wer cegaɗ jag liŋgi ɓon wo go, raw tayge de jar se maga joŋ wo fen horge sen mo pa yawla? Baage põõ ɓon leʼ ge ne wùr ti hãã kol go maga wùr caa wer go jobo gwaʼ ge boŋ gà so has gà yawla?

¹⁵ Manwuri, Baa ma Israyel no, ndo keɗede werga ndo men mbo wùr wara mbag lag ɗa pa mono. Wùr bà mbe wara pel ɓo lag de ɓlagge wùr ti, ni paga jobo de kãã ma ooge pel ɓo de re ti doosen no gà mono.