ESDRAS 8 - Tupuri Bible

Jar maga wo wo wer Esdras mono

¹ Lam no diŋ waŋre ma ti feele maga à kee ra day raw wo le wer ɓi Babilon ti kal maga waŋ Artagserses hay ti waŋ mono :

² Pel jar ni Fineyas wo diŋ Gerkom, pel jar ni Itamar wo diŋ Danyele, pel jar ni Dafid wo diŋ Hatusi.

³ Pel jar ni Sekaniya wo de jar ni Pareos wo diŋ Sakari de werpiiri wer kis ti ɓe doo dwee wo go de keege ɓuy.

⁴ Pel jar ni Pahat-Mohab wo diŋ Eljoenay je ni Serahiya no, werpiiri wer ɓe kiskis ɓoge.

⁵ Pel jar ni Sekaniya wo diŋ je ni Mahasiyel no, werpiiri wo wer ɓe kiskis swaʼa.

⁶ Pel jar ni Adin wo diŋ Ebed je ni Jonataŋ no, werpiiri wer ɓe doo dwee.

⁷ Pel jar ni Elam wo diŋ Esay je ni Ataliya no, werpiiri wo wer ɓe doo rename.

⁸ Pel jar ni Sefatiya wo diŋ Sebadiya je ni Makiyel no, werpiiri wo wer ɓe doo nenmaʼa.

⁹ Pel jar ni Jowab wo diŋ Abdiyas je ni Yehiyel no, werpiiri wo wer ɓe kiskis ɓog ti ɓe hwal ti nenmaʼa.

¹⁰ Pel jar ni Selomid wo diŋ je ni Yosifiya no, werpiiri wo wer ɓe kis ti ɓe doo hiiraʼa.

¹¹ Pel jar ni Bebay wo diŋ Sakari, werpiiri wo wer ɓe doo ɓog ti nenmaʼa.

¹² Pel jar ni Asgad wo diŋ Yohanan je ni Hakataŋ no, werpiiri wo wer ɓe kis ti ɓe hwale.

¹³ Pel jar ni Adonikam wo diŋ weere maga biŋ wo le blam mono, ɗúu ɓaara ga : Elifeled, Yeiyel wo de Semaeya, werpiiri wo wer ɓaara doo hiiraʼa.

¹⁴ Pel jar ni Bigfay wo diŋ Utay wo de Sabudi, werpiiri wo wer ɓaara doo rename.

Esdras wo de jar ma wer ɓen grag wo go ma seele

¹⁵ Ndi raw tay rage go ti jag maarog ma de pããge maga yuu wo nen Ahafa mono day wùr lag ni naw swaʼa. Ndi raw raŋ nen ɓi ti ngaɓan wo de jar siɗ jagn wo go de ele, ama ndi daʼ jobo yoo jar ni Lefi wo ni boŋ gà.

¹⁶ Mo so no ndi raw de Eliyeser, Ariyele, Semaeya, Elnatan, Natan, Sakari wo de Mesulam waŋren wo le de Yoyarib wo de Elnatan jar had jarn wo.

¹⁷ Ndi raw fer jag ɓi ne hara ti Ido je ma pel jar maga wo de tiŋ Kosifiya mono, day ndi kal hã wããre maga á wo nen wããge ɓe ne Ido wo de hẽẽre ɓe jar Netiniyẽẽ wo ne hara jage, nen maga á mo á wo de jar kayge ti tiŋ mani Baa wùr ne wùri.

¹⁸ Day wer maga doo ma de el mani Baa wùrn hay kayge wer wùr mono, saara raw wo baa Serebiya je maga ɗiggi ɓe de eln le ne wùr yoo jar ni Mahli je ni Lefi je ni Israyel le ne wùri. Saara de weere ɓe wo de hẽẽre ɓen wo ɓuy hwal ti nenmaʼa,

¹⁹ hoo wo Hasabiya wo le ne wùr de Esay yoo jar ni Merarin wo de hẽẽre ɓen wo de weere ɓaaran wo. Saara ɓuy doo ɓoge,

²⁰ hoo wo jar Netiniyẽẽ wo le ne wùr kiskis ɓog ti ɓe doo ɓog yoo jar Netiniyẽẽ maga Dafid wo de waŋren hay lag wo ra ti joŋre kay jar Lefidn wo mono. Saara ɓuy go de kaŋ ɗúu.

²¹ Ti jeŋ maarog ma de pããge ma Ahafan ni mono, ndi raw wããge ga wùr mo hẽẽ bii ma fer ti wùr gesiŋ pel Baa wùr no, ma wiigi ɓe nen maga seele wùr mo joŋ de el see wùr de weere wùr wo de horog wùrn wo ɓuy.

²² Sõõre de hay joŋ ndi hayga ndi de wii waŋ we ga á mo laa jar gor ti wùr wo de jar piiri wo ne wùr wer ma gor ti wùr doo je hee ma ti faagen mono. Wùr hay wii waŋ ga doo Baa wùrn kay yaŋ mbe de el wer jar maga wo de sãy ɓe ti mono, day egre ɓen wo de baage põõ ɓen hã wo pũũri ne jar maga tobn wo go mono.

²³ Diŋ wersen wùr raw hẽẽ bii, wùr kiɗ Baa wùr no day se raw laa tosge wùr no.

²⁴ Ndi raw lag jar po wo go ti nen hwal ti ɓog yoo jar ma pel jar siɗ jagn wo, jar sen wo diŋ Serebiya wo de Hasabiya wo de hẽẽre ɓaara wo ni hwale.

²⁵ Ndi kee solay no, boo biŋni wo de fẽẽre maga waŋ wo de jar bag yaŋ ne hẽn wo, jar kluuri ɓen wo de jar Israyel maga hay wo ni hã wo ra ma tiŋ mani Baa wùrn mono.

²⁶ Ndi raw kee boo solay ne hara doo nen klew ndar doo ɓoge, fẽẽre ma de joŋge wo de boo solay klew ndar swaʼa, boo biŋni klew ndar swaʼa,

²⁷ kob ma de joŋge de boo biŋni ga yoo ɓaara nen solay boo biŋni ndar ne hara doo ni doo ɓoge, tasa boo dob ma de woore wo doo boo biŋni nono ni ɓog lay.

²⁸ Blam ɓe ndi kal wii rage ga : Nday go sagsag ma Manwuri, fẽẽre sen wo mo hãʼ diŋ fẽẽre ma bay ɗag wo, solay sen wo de boo biŋni sen wo mo hãʼ diŋ fẽẽre ma bay ɗag wo, solay sen wo de boo biŋni sen wo mo hãʼ diŋ hãge de dage ne Manwuri, Baa mani pããre ɓayn wo.

²⁹ Pũy we go, hoo we fẽẽre sen wo, nen ɓay mo hay ti ɓaara hãã nday wo go kee rage pel jar ma pel jar siɗ jag wo de jar Lefidn wo, pel waŋre ma ti feele ma Israyeln wo Jerusalem ɓil tiŋma ma ɓil tiŋ mani Manwur no.

³⁰ Jar siɗ jagn wo de jar Lefidn raw wo yãã solay no, boo biŋnin wo de fẽẽre maga à hay kee ra go mono, ma woge de ɓaara Jerusalem ɓi tiŋ mani Baa wùr no.

Esdras á wo go Jerusalem

³¹ Wùr men jag bii ma Ahafan go ti naw hwal ti ɓog nen few ma taŋgu no ma woge Jerusalem. Doo Baa wùr hay kayge wer wùri, maŋ jag je hee go ga á mo leʼ wùr wa lay, re po mo caa wùr ti faage wa lay.

³² Wùr a go Jerusalem mokay wùr raw iggi naw swaʼa.

³³ Ti naw ma de naan mokay à raw kee solay no, boo biŋni wo de fẽẽren wo ɓil tiŋ mani Baa wùr ne Meremod je ni Uri je siɗ jagn ɓi coo doo. Eleyasar je ni Fineyas hay wo see ɓe ni de Yosabad je ni Josuwe no, de Noadiya je ni Binuyi jar Lefidn wo.

³⁴ À kee ra go ɓuy, à maŋ klew ɓaara go day à raw yer klew ɓaara ɓuy go taʼa.

³⁵ Jar maga hay wo le go ti daŋgay ga day fer wo le, raw wo sii jag maga à roɗ mo ɓen go ɓuy ne Baa ma Israyeln de bloore deere hwal ti ɓog go ti jar Israyel wo ɓuy, de gamlaare doo kaawaʼ ti hiiraʼa, de weere sããre doo renam ti rename, de togloŋre ma por ɓlagge hwal ti ɓoge. Fẽẽre sen wo ɓuy saara joŋ siigi jag maga à roɗ mo ɓen go ɓuy de ɓaara ne Manwuri.

³⁶ Saara raw wo fer jag waŋ ne satrap ɓen wo de jar wãã wããre prog maga wo go faale maarog ma de pããgen ma ɓaŋ lan la mono. Saara raw kay jarn wo, kay wo tiŋ mani Baa no.