ESDRAS 7 - Tupuri Bible

Esdras je siɗ jag no

¹ Blam sen ge mbe go so, ti kal maga Artagserses waŋ Perse ti waŋ mono, Esdras je ni Seraya, je ni Hilkiya,

² je ni Salum, je ni Sadog, je ni Ahitub,

³ je ni Amariya, je ni Asariya, je ni Merayod,

⁴ je ni Serahiya, je ni Usi, je Buki,

⁵ je ni Abisuwa, je ni Fineyas, je ni Eleyasar, je ni Aaron je mooben kal naage.

⁶ Esdras sen la raw urgi le Babilone. Á diŋ je had wããre Baa maga de ko jag liŋgi mani Moyis maga Manwur, Baa ma Israyel hay hãn mono. Day wer maga doo Manwuri, Baa ɓen hay kayge wer ɓe mono, waŋ kal hã fen maga se wiin mo ɓuy ne hẽne.

⁷ Jar Israyel ma po wo, jar siɗ jag wo de jar Lefid ma po wo, jar ʼwad siŋ, jar gor jag tiŋ ma po wo de jar Netiniyẽẽ ma po kal wo hooge, raw wo Jerusalem ti kiŋgi ma de renam maga waŋ Artagserses de joŋ waŋ mono.

⁸ Esdras nduu Jerusalem nen few ma de dwee ti kiŋgi ma de renam mani waŋ no.

⁹ Á hay ur le Babilon ti naw ma taŋgu nen few ma taŋgu no, se wo age Jerusalem ti naw ma taŋgu nen few ma de dwee no, doo ma de el mani Baa ɓen hay kayge wer ɓe.

¹⁰ Esdras hay hã jiili ɓe ma kiɗ wer jag liŋgi mani Manwur no, ma joŋ joŋre de ɓe, ma had wããre ma de yerge wo de fen ma de deele yoo jar Israyel wo.

Leeder maga waŋ yer ne Esdras doo mono

¹¹ Mokay diŋ leeder maga waŋ Artagserses yer ne je siɗ jag Esdras je ko wer wããre Baa maga hay go kol yerge jag liŋgin wo de wããre ma de yerge maga Manwur hay wãã ra ti Israyel go mono :

¹² Artagserses yer so ga : Artagserses waŋ ma waŋren yer ne je siɗ jag Esdras je ko wer wããre Baa maga de ko jag liŋgi mani Baa ma ciŋn no :

¹³ Ndi hay hã faage go ga à mo men jar maga wo diŋ jar Israyele, jar siɗ jagn wo de jar Lefid maga wo ɓil sir ɓin la day wo de dage ga saara fer Jerusalem wo rawge wer ɓo.

¹⁴ Ɓoʼ ndo wo diŋ waŋ de jar bag yaŋ ɓe ma renamn wo ma woge ko wer joŋre ma Juda wo de Jerusalem doo maga jag liŋgi mani Baa ɓon ga doo ɓo de wããge nono.

¹⁵ Ndo raw nà ma woge de solay wo de boo biŋni maga waŋ wo de jar bag yaŋ ɓen hãn wo wo de dage ɓaara ne Baa ma Israyel maga tiŋ ɓen wo Jerusalem mono,

¹⁶ ma woge de solay wo de boo biŋni maga ndo daʼn ge mo ɓuy ti prog ma Babilon mo ɓuy, hãge de dage maga jarn wo de jar siɗ jag hã wo ra ma joŋre ɓi tiŋ Baa ɓaaran mo ɓuy no.

¹⁷ Doo kay nono ndo joŋ ge nen yee bloore deere wo, gamlaare wo, weere sããre wo de fẽẽre ma hãge wer ɓaaran wo de yii ma siɗ jagn wo de solay seno. Ndo siɗ gi jag de ɓaara ti ngel siɗ jag ma ɓil tiŋ Baa ɓay ma Jerusalem no.

¹⁸ Fen maga nday de hẽẽre ɓo nday kon de el ma joŋge de te solayn mono, nday joŋ ge nà ti dage Baa ɓay no.

¹⁹ Wo laa fẽẽre maga à hã ra mo doo ma joŋre ɓil tiŋ Baa ɓon wo pel Baa ma Jerusalem no.

²⁰ Ndo hoo ge solay ɓi tiŋ horog mani waŋ no, ma yee fẽẽre maga ndo joŋ ge nen yee rage ma tiŋ mani Baa ɓon mono.

²¹ Ndi waŋ Artagserses ndi wãã wo ne nday jar ɗaw horog maga nday wo go faale maarog ma de pããge ma ɓaŋ lan wo mo ɓuy ga nday hãge fen maga je siɗ jag Esdras je ma de ko wããre Baa ga de ko jag liŋgi mani Baa ma ciŋn wiin ge doo ɓay mo ɓuy ne hẽne doo maga a no tuu no.

²² Boo solay maga nday hãn ge mo day go klew ndar swaʼa, coore ble klew ndar doo swaʼa, lidir yii ndar naa, lidir noo ndar naa, ma cuu manda à ngaɓ sen go ngaɓge gà.

²³ Daga fen po maga a le jag Baa ma ciŋ ti re tiŋ mani Baa ma ciŋn mo joŋ go ti ngel ɓe nen maga baage põõ ɓen mo leʼ ne sir mani waŋn wo de mani weere ɓen wo ti wa.

²⁴ Diŋ wersen wùr wii nday wo ga nday mo ko ga fen ma de kaŋ ge ne jar ti no, lombo no, poɗge ma cegaɗge no, à wii sen ge doo je siɗ jag po gà doo jar Lefid wo, doo jar ʼwad siŋ wo, jar gor jag faagen wo, jar Netiniyẽẽ de jar joŋre ma ti tiŋ mani Baa sen wo gà.

²⁵ Ma ɓo ndo Esdras, wer koge re maga Baa hãn mo mono, lag jar car kiida wo de jar ma seege de jarn wo nen maga á mo car wo kiida go ne jar maga wo wo go faale maarog ma de pããge ma ɓaŋ lan wo mono, mo car wo kiida ne jar maga wo de ko jag liŋgi mani Baa ɓon wo mo ɓuy no, kaŋ nen jar maga bay wo de ko jag liŋgin wo wa ti ɓaara.

²⁶ Je maga hoo ge sug we ti jag liŋgi mani Baa ɓon wo de jag liŋgi mani waŋn doo maga á no tuu gà no, à ʼwarn go noga à niin go yoo jare, à yãã fẽẽre ɓen wo noga à baan ti daŋgay.

Esdras joŋ suseʼ ne Baa

²⁷ Suseʼ ne Manwuri, Baa mani pããre naan wo ti maga á ʼwũy jiili waŋ go maga á mo kol tiŋ mani Manwur ma Jerusalem go kluu doo kay no mono.

²⁸ Suseʼ ne hẽn ti maga á joŋ dage ti ɓi pel waŋ wo de jar bag yaŋ ne hẽn wo de minisdirn wo ɓuy mono. Ndi daʼ egre wer doo Manwuri, Baa ɓi maga hay kayge wer ɓi mono. Ndi raw tay waŋre ma Israyeln wo nen maga á mo raw wo wer ɓi.