ESDRAS 6 - Tupuri Bible

Wããre maga waŋ Dariyus fern le mono

¹ Dariyus raw wããge ga wo kiɗgi ɓil tiŋ kefder maga à lag fẽẽre ma de yergen wo Babilon ni mono.

² À raw daʼ kefder ma de kaage po wo Ahmeta wo ti prog ma Medi no, à hay de yerge ɓil kefder sen tiʼ go de bag jag ga :

³ Ti kiŋgi ma taŋgu maga Sirus kol ti waŋ mono, waŋ Sirus raw wããge ga : Tiŋ mani Baa ma Jerusalem mono, daga fer boo tiŋ sen maga á mo hay diŋ ngel siɗ jag wo day á mo hay de ɓoʼ wer de egre. Gẽẽre ɓe ciŋ joŋge meeder doo swaʼa, diy ɓe meeder doo swaʼ lay.

⁴ Húulì ma de ceɗge de sraɗge swaʼa, sraʼge koore ma defay wo boŋ lay. Solay ɓen ɓuy ti tiŋ mani waŋ no.

⁵ Ni mo pa no, fẽẽre ma de joŋge wo de boo biŋni wo, boo solay ma ɓil tiŋ Baan ga Nebukadnesar hay hoo ra le go ɓil tiŋ Baa ma Jerusalem no, day raw wo go de ɓaara Babilon mono, à fer ge ra day à wo ge de ɓaara laage ɓil tiŋ Baa ma Jerusalem ti ngel maga á hay wo de laage ɓil tiŋ mani Baan ni mono.

⁶ Patala ndo Tatnay je wãã wããre prog ma faale maarog ma de pããgen ɓaŋ ma lan wo mono, ndo Setar-Bosnay, nday kããre ɓaara maga nday wo Afarsag ga nday wo de tiŋ wo go faale maarog ma de pããge ma ɓaŋ lan mono, yaʼ we see ɓay go hãã.

⁷ Men we joŋre booge tiŋ Baa sen seege. Daga je wãã wããre prog mani jar Jwifn wo de jar kluuri jar Jwifn mo fer wo booge ɓe ti ngel ɓe no.

⁸ Mokay diŋ fen maga ndi wããn wo ga nday mo joŋn see jar kluuri jar Jwif sen wo ti re booge tiŋ mani Baan mono : Fẽẽre mani waŋ maga à daʼ ra le ti targe lombo wo go faale maarog ma de pããgen ɓaŋ lan wo go mono, à poɗ jar sen la wo go de ɓaara doo tuu nen maga joŋren mo oo wa.

⁹ Fen maga de el ma joŋ siɗgi jag maga à roɗ mo ɓen go ɓuy wo ne Baa ma ciŋ mono, nday hãn ne hara : Bloore deere wo, gamlare wo, weere sããre wo, coore wo, cuu manda, yii wo de noon ɓuy nday hã ra go ne jar siɗ jag ma Jerusalem wo tum tum se maga doo ɓaara wii ti sen mono, day nday joŋ hragge ti sen gà has

¹⁰ nen maga á mo joŋ wo siɗgi jag maga fõõ Baa ma ciŋn de woore day mo tos wo ti tenen waŋ wo de jar ni ɓe.

¹¹ Mokay wo diŋ fen maga ndi wããn wo ti je maga cegaɗge jag wããre sen we go mono : À naa ge koo ma ti tiŋ ɓen yaŋ go boŋ day à hagn ge go ti ɓe, à ɓaln ge go ni. À kol ge tiŋ mani ɓen go diŋ tabuli.

¹² Daga Baa maga de ra ɗúu ti ngel ni mo srog waŋ noga jar po maga cegaɗ wo jag liŋgi sen la go day coŋ wo doo ɓaara ma ɓlag tiŋ Baa maga wo Jerusalem go gesiŋ. Ndi Dariyus ndi wããn go! Daga à mo joŋn doo ga á no tuu!

¹³ Doo kay nono Tatnay je wãã wããre prog ma faale maarog ma de pããgen ma ɓaŋ lan le la lay, Setar-Bosnay wo de kããre ɓaaran raw wo lagge ti jag maga waŋ Dariyus fern le ne hara mo dera tuu.

À ɓoʼ jag booge tiŋ Baan go

¹⁴ Jar kluuri jar Jwifn boo wo tiŋ no se yãã doo ɓaara doo maga Aje je ndar nen wããre Baa gon wo de Sakari je ni Idon hay wãã wo nono. Saara raw booge ɓe go, fer wo ʼwũygi ɓe ti jag Baa ma Israyeln lay ti jag Sirusi, ti jag Dariyus wo de Artagserses waŋ Perse no.

¹⁵ Tiŋ ɓoʼ jag go ti naw ma de swaʼ nen few Adar ti kiŋgi ma de hiiraʼ maga waŋ Dariyus ti waŋ mono.

¹⁶ Jar Israyel wo, jar siɗ jagn wo de jar Lefidn wo, jar ma ɓuy maga hay wo le ɓaa ti daŋgay mo ɓuy raw wo joŋ few bulgi jag tiŋ Baa sen de fruygi.

¹⁷ Saara kal sii jag de bloore deere kisi, gamlaare kiskis ɓoge, weere sããre wo kiskis naa ma bul jag tiŋ Baa no. Ti ɓlagge Israyel wo ɓuy mono, saara raw sii jag de togloŋre hwal ti ɓoge, go ti ɓĩĩni ma Israyeln wo boŋ boŋ ɓuy.

¹⁸ Saara raw lag jar siɗ jag wo taʼ taʼ ti carge ɓaara, lag jar Lefid wo go taʼ taʼ ti ɓesge ɓil ɓaara ma joŋ peele ne Baa ɓi leege Jerusalem doo maga á de yerge ɓi kefder mani Moyisn nono.

Jar Jwif joŋ wo few Page

¹⁹ Jar maga hay wo le go ɓaa ti daŋgay raw wo joŋ Pagn ti naw ma de hwal ti naa nen few ma taŋgu no.

²⁰ Jar siɗ jagn wo de jar Lefidn hay fãã wo see ɓaara go jag taʼ boŋ ɓuy, saara hay go ɓuy de fããge. Saara raw wo ngaɗ fẽẽre Pagn go ti jar maga hay wo le go ɓaa ti daŋgay mono, go ti hẽẽre ɓaara jar siɗ jagn wo, go ti see ɓaara lay.

²¹ Jar Israyel maga hay wo le ti daŋgay ga day fer wo le raw wo re Pagn de jar maga hay caa wo see ɓaara go de fen yeeɗe mani jar dehãy wo day tay wo de ɓaara ma kiɗ Manwuri, Baa ma Israyeln mono.

²² Á joŋ wo few pẽẽ ma bay defõõren nen naw renam de fruygi werga Manwur hã fruygi ne hara ɓil ti maga á ʼwũy jiili waŋ Asiri go maga a mokay ra ti joŋre booge tiŋ Baa, Baa ma Israyeln mono.