ESDRAS 5 - Tupuri Bible

¹ Aje je ndar nen wããre Baa gon wo de Sakari je ni Ido, je ma ndar nen wããre Baa gon raw wo naa nen wããre ma jag Baa go ne jar Jwif ma Juda wo de ma Jerusalem wo ti ɗúu Baa ma Israyel no.

² Mo so no Sorobabel je ni Sealtiyeln wo de Josuwe je ni Yotsadagn raw wo hooge go ciŋ, leʼ wo boo tiŋ Baa ma Jerusalem no. Day jar maga hay wo diŋ jar ndar nen wããre Baa gon hay wo coɓ rage.

³ De sen ni mo lay no, Tatnay je wãã wããre prog maga go faale maarog ma de pããge ma ɓaŋ lan la lay, Setar-Bosnay wo de kããre ɓaaran wo lay, raw wo age see ɓaara day riŋ wo ra ga : Wose hã faage ne nday ma boo tiŋ seno, ma ʼwũy kor ɓen wo la?

⁴ Saara day wii ra so ga : Ɗúu jar maga wo de boo tiŋ sen mo kaʼ la wo gahãyla?

⁵ Ama nen Baa hay ti jar kluuri jar jwifn wo. Jobo maŋ jag ɓaara go ti joŋren de maga à ɓoʼ leeder wo ne Dariyus ma naa wer wããren ne hẽne day à de gor leeder maga se ferge le ti ɓe ɗa mo gà.

À laa húulí ne jar Jwif wo ti pel waŋ Dariyusi

⁶ Mokay no diŋ leeder maga Tatnay je wãã wããre prog maga go faale maarog ma de pããre ma se ɓaŋ lan la wo de Setar-Bosnay wo de kããre ɓaara ma Afarsag maga wo le go faale maarog ma de pããge ma se ɓaŋ lan la yer wo wo ne waŋ Dariyus mono.

⁷ Saara raw naa wer wããre wo ne hẽn doo kay nono ga : Wùr yer wo ne ndo waŋ Dariyusi. Waŋ, daga jam mo hay!

⁸ Daga waŋ mo ko ga wùr hay wo we ti prog ma Juda no, hãã wo go ti tiŋ mani Baa ma kluu no. À de booge ɓe de húulì ma de ceɗge wo day á her koo nen glig no. Joŋren go de joŋge ti faage ɓe lay, de yãã doo ɓaara de el lay.

⁹ Wùr wii jag jar kluurin wo day wùr raw wããge ne hara ga : Wose hã faage ne nday maga nday mo boo tiŋ se kaʼ no day nday mo fer ʼwũy korn wo la?

¹⁰ Wùr hay wii ɗúu ɓaara ma kaŋ nen ɓo ti ɓaara lay, day wùr raw yer ɗúu jar maga wo pel ɓaara go yerge.

¹¹ Day mokay diŋ wããre maga saara fern ne wùr mono, á wo ga : Wùr diŋ weere jõõre Baa maga le ciŋ lay go ti tamsir la lay mono. Wùr fer booge nà diŋ tiŋ maga kiŋgi yaŋ wara puri waŋ po ma kluu ma Israyel hay boo ne day ɓoʼ jag ɓe go mono.

¹² Day de maga pããre wùr car wo jiili Baa ma ciŋn go mono, se raw hã rage go ne Nebukadnesar waŋ Babilon je Kalde ɓi coo doo, se kal ɓlag tiŋ sen go day hoo jarn wo wo go Babilon ti daŋgay.

¹³ Ama ti kiŋgi ma taŋgu maga Sirus kol ti waŋ Babilon mono, waŋ Sirus raw hã jag ga fer boo tiŋ Baa seno.

¹⁴ Fẽẽre ma de joŋge de boo biŋni wo de boo solay maga hay wo le ɓil tiŋ mani Baa no day Nebukadnesar hay hoo ra le go ɓil tiŋ Baa ma Jerusalem wo go laa rage ɓil tiŋ baa ma Babilon mono, waŋ Sirus de see ɓe tuu hoo ra le go ɓil tiŋ baa ma Babilon no, raw hã rage ne Sekbasar maga se kaŋ wãã wããre progn doo.

¹⁵ Se raw riŋgi ɓe ga : Hoo fẽẽre sen wo, wo laa rage ɓil tiŋ Baa ma Jerusalem no day daga à mo fer boo tiŋ mani Baa ti ngel ɓe.

¹⁶ Sekbasar sen raw age day ɓoʼ wer tiŋ mani Baan Jerusaleme. Hãã le ti wur sen à de boo tiŋ no ane se bay go de ɓoʼ jag wa ɗa.

¹⁷ Patalam no, hayga á coo we jag waŋ no, daga à mo kiɗ yoo fẽẽre ma de yerge ma ɓaaɓaa mani waŋn wo Babilon ɗa, ma koge go pah ga waŋ Sirus hay hã mbe jag we ga fer boo tiŋ mani Baa se ma Jerusalem yawla bay wa yawla. Blam ɓe mono daga waŋ mo fer ɗiggi ɓe le ne wùr ti se no.