ESDRAS 4 - Tupuri Bible

Jar hee jar Jwif wo de hun ti booge tiŋ Baa no

¹ Jar hee Judan wo de Benjamen raw wo laage ga jar maga hay wo le go ti daŋgay wo de boo tiŋ ne Manwuri, Baa ma Israyel no.

² Saara raw yaʼge le see Sorobabel wo de waŋre ma ti feelen wo day riŋ wo ra ga : Wùr da kay nday ti booge tiŋn lay, werga wùr de tos Baa ɓayn doo nday no lay, day wùr de joŋ siɗgi jag wo ne hẽn lay hãã le ti wur maga Esar-Hadon waŋ Asiri hoo wùr le go ti ngeln mo taʼ la mono.

³ Ama Sorobabel, Josuwe wo de waŋre ma ti feele ma Israyel kal wo ferge ne hara ga : Á bay ga nday lay, wùr lay naa boo tiŋ ne Baa wùrn wa, wùr boo mbe tiŋ yaŋ de see wùr tawa ne Manwuri, Baa ma Israyeln doo maga Sirus waŋ Perse hay wããn le ne wùr nono.

⁴ Mo so no jar ma ɓil sir ni raw wo woo doo jar Juda wo go, car wo hẽẽne ɓaara go nen maga á mo men wo booge no.

⁵ Saara raw hã solay ne jar bag yaŋ po wo nen maga joŋren mo ɓoʼ jag go wa. Re sen joŋ doo kay nono nen Sirus waŋ Perse hãã wo go ti kal mani Dariyus waŋ Perse no.

À laa húulí ne jar Jwif wo ti

⁶ Ti kal mani Asuwerus ti tĩĩgi wer waŋ ɓen mono, saara raw yer leeder ma laa húulí ne jar Juda wo de jar Jerusalem wo ti.

⁷ Day wo ti kal mani Artagserses mono, Bislam, Mitredad, Tabeel wo de Kããre ɓaara ma lan raw wo yer leeder ne Artagserses waŋ Perse. Leedern de yerge de faage yerge mani jar Arameyẽẽn wo, go de kolge de jag Arameyẽẽ lay.

⁸ Rehum je wãã wããre progn wo de Simsay je yergen raw wo yer leeder wo ne waŋ Artagserses ti Jerusalem ga :

⁹ Rehum je wãã wããre prog no, Simsay je yergen wo de kããre ɓaaran ma lan wo de jar ma Din wo, ma Arfarsatagn wo, ma Tarpeln wo, ma Afarasn wo, ma Eregn wo, ma Babilon wo, ma Susen wo, ma Dehan wo, ma Elamn wo de

¹⁰ jar ma lan maga Osnapar ma kluu ma de togoɗgen hay hoo ra le day lag ra go ɓi leege Samari wo de ngel maga wo le go faale maarog ma de pããgen ɓaŋla lam no.

¹¹ Mokay la diŋ leeder maga saara ɓoʼn wo wo ne waŋ Artagserses mono : Weere jõõre ɓon wo, jar maga wo wo go faale maarog ma de pããgen ɓaŋla la yer wo wo ne ndo waŋ.

¹² Daga waŋ mo ko ga jar Jwif maga raw wo le see ɓo day á wo go yoo wùr Jerusalem la wo de ferge boo ɓi leege ma ti graŋ ma de hãã no, wo de ferge ʼwũy kor ma ti ɓe no, wo de ɓod wer tiŋn wo.

¹³ Daga waŋ mo ko so ga hayga ɓi leegen la fer we booge day à fer we ʼwũy korn no, á poɗ ge targen gà lay, poɗ ge lombo gà lay, hayba solay ma cegaɗgen draʼa, day sen mo hãʼ nà ɓoʼge coo waŋ go.

¹⁴ Day wùr maga wùr daɗ manda wùrn le doo waŋ la wùr wo koge ga á bay de el maga à mbuɗ foo waŋ wa. Wùr yer wo ne waŋ nà ma riŋ waŋ de fẽẽre sen wo

¹⁵ nen maga à mo kiɗ wer re sen wo ɓil kefder ma nen pããre ɓen wo ɗa. Ndo daʼn ge yaŋ ɓi kefder ma ɓaan wo day ndo koge yaŋ ga ɓi leege sen diŋ ɓi leege ma ti graŋ, ɓi leege maga ɓoɗ coo waŋre wo go de progren wo, ɓi leege maga bay yãã jag wa hãã le ti wur ma ɓaan wo le, day à hay ɓlag ɓi leege sen go diŋ werseno.

¹⁶ Wùr wããn wo go ne waŋ an ɗa ga hayga ɓi leege sen la fer we booge, à fer we ʼwũy kor ɓen wo no, ni ndo ko mbo go tuu so ga nen fen ɓo po joŋ ge wo faale maarog ma de pããge ma se ɓaŋ lan la gà so.

Waŋ Artagserses dig booge tiŋ no

¹⁷ Waŋ raw fer wããre le ti sen ga : Ndi yer wo ne Rehum, je wãã wããre prog no, ne Simsay je yergen wo de kããre ɓaara maga wo wo Samari wo de ngel maga wo wo faale maarog ma de pããge ma ɓaŋ lan wo mono. Daga jam mo hay see ɓay.

¹⁸ Leeder maga nday yern le ne wùr mono, à keen go doo maga á nono go pel ɓi.

¹⁹ Ndi day ga à mo kiɗ wer fẽẽren wo day à wo daʼge ga hãã le ti wur ma ɓaan wo le mono, ɓi leege sen la hay giŋ waŋre wo, gifid tum lay, joŋ ti graŋ lay.

²⁰ Waŋre ma de egre hay joŋ wo we Jerusalem, hay wo wãã wããre sir maga wo go faale maarog ma de pããge ma ɓaŋ lan wo lam ɓuy no, day à hay hã targe ne hara, poɗ lombo wo de solay cegaɗgen ne hara lay.

²¹ Doo kay no so mono, laa we jar nen maga á mo wo wo dig joŋre jar sen wo day ɓi leege sen la mo fer go booge taŋgu maga ndi hã faage ɓe gà ɗa wa.

²² Joŋ we see ɓay de ele, yõõ we ti go nen maga ɓlagge mo yaʼ ciŋ ma ɓoʼ coo waŋre wo go wa.

²³ Doo ni tuu de maga à kee leeder go pel Rehum wo de Simsay je yergen wo de kããre ɓaara ma lan wo no kay mono, saara kal rawge deparday Jerusalem see jar Jwifn wo, kal wo dig joŋre de waŋ girgir.

Joŋre booge tiŋ fer tĩĩ wer tigriŋ

²⁴ Mo so no joŋre tiŋ Baa ma Jerusalem raw ooge. A oo, hãã wo go ti kiŋgi ma de ɓog mani Dariyus waŋ Perse no.