ESDRAS 10 - Tupuri Bible

Jar Jwif nii wo mayre dehãyn wo no

¹ De maga Esdras ti roo de laa kõyõgre gesiŋ jag tiŋ Baa no, de tos tosge seno, de wii fuggi ɓil sen lay mono, jar Israyel wo ngaɓa : Werpiiri, naare de weere kleere raw wo tayge see ɓe day jar hay wo rage debaŋ.

² Mo so no Sekaniya je ni Yahiyel yoo jar ni Elamn wo raw wãã wããre day riŋ Esdras ga : Wùr hay see de deele see Baa wùrn gà wùr da naare ni jar dehãy maga wo diŋ jar sirn wo lam no. Patala gorge ti mo ma de el yaŋ mbe ti sir Israyel ɗa, hayba ga reen de joŋge mo ɓuy no.

³ Patala tuu naa tay jag de Baa naan ga naa nii naare sen wo yaŋ de weere ɓaara wo ɓuy doo maga waŋ ɓin wo de jar maga daɗ wo doo jag liŋgi mani Baa naan wããn wo nono. Daga à mo joŋ doo ga jag liŋgin wãã nono.

⁴ Ur go ciŋ werga re sen diŋ re ɓo. Wùr joŋ ge yaŋ wer ɓo. Coɓ see ɓo day ni ndo joŋ mopo.

⁵ Esdras raw urgi go ciŋ, raw joŋge ga jar ma pel jar siɗ jagn wo, ma pel jar Lefidn wo, ma pel jar Israyel wo ɓuy mo haʼ wo go ga saara joŋ yaŋ doo maga à hay wããn la nono. Saara raw haʼge go ne hẽn doosen nono.

⁶ Blam ɓe Esdras raw naa see ɓe go jag tiŋ Baa no, raw woge tiŋma ni Yohanan je ni Eliyakib no. De maga se kal wo ni mono, se re hoole gà lay, jo bii gà lay werga á hay lawge ti re ma de ɓlagge maga jar maga hay wo le ɓaa ti daŋgay joŋn wo mono.

⁷ À raw wããge wo go ti sir Juda wo de Jerusalem ga jar maga hay wo le ti daŋgay mo tay wo le go ɓuy Jerusalem.

⁸ Doo maga waŋren hay wãã wo go nono, je maga a ge we ti naw se swaʼn wo gà no, à yãã fẽẽre ɓen wo day à caan go de jar maga hay wo le ɓaa ti daŋgay mono.

⁹ Jar Juda wo de jar Benjame raw wo tayge le go ɓuy Jerusalem ti naw swaʼa, nen naw ma doo ɓog nen few ma de kaawaʼ no. Jar ɓuy hay wo de lagge ti ngel tiŋ mani Baa no, wo de daɗge deŋ deŋ doo ngel no werga baa hay rage.

¹⁰ Esdras je siɗ jagn raw urgi ciŋ day ga : Nday see de deele gà ti maga nday da mayre dehãyn wo mono, day nday kaŋ re go ne Israyel bà ti has ɓuy pa yaw.

¹¹ Patala hã we togoɗge ne Manwuri, Baa mani pããre ɓayn wo, joŋ we dage ɓe so! Caa we see ɓay go de jar ma ɓil sirn wo de mayre dehãyn wo.

¹² Taygen ɓuy kal wo yiŋ jag go jag ciŋ kloŋ ga : Ã, sen diŋ re wùr mbe ga wùr joŋ doo maga ndo hay wãã nono.

¹³ Ane jarn raw ngaɓa, ngel de yaale bay maga jobo hay go siigi wa lay. Day pa se bay diŋ re maga taw go ti naw boŋ noga ɓog wa werga jar debaŋ wo de joŋ ɓlagge ti re seno.

¹⁴ Daga jar ma pel wùrn mo gwaʼ wo ti sel ngaɓa no day jar maga wo le ɓi leege wùrn wo ga hay da wo mayre dehãyn wo mono, a ge wo yaŋ ti wur maga wo go de ngaɓge taʼ de jar kluuri wo de jar car kiida ma ɓi leege ma honla wo were, hãã baage põõ ma de hãã mani Baa naan ga leʼ ne naa ti wer re sen mo hãʼ taw go ne naa ti ɗa.

¹⁵ Jar maga yãã wo ga á joŋ doosen no gà diŋ Jonataŋ je ni Asayeln wo de Yahsiya je ni Tikfa no, dog ɓaara hay diŋ Mesulam wo de Sabtay je Lefid no.

¹⁶ Ama jar maga hay wo le ti daŋgay ɓaa joŋ wo doo maga à hay wãã no an no. À raw lag Esdras je siɗ jagn wo go ti nen de waŋre ma ti feelen wo, wosela ti tiŋ mani pan ɓe day go de kaŋ ɗúu see ɓe. Saara raw lagge ti naw ma taŋgu nen few ma de hwal no ma ko wããre se no.

¹⁷ Ti naw ma taŋgu nen few ma taŋgun mokay saara maŋ jag re go de jar maga hay da wo naare dehãy wo mo ɓuy!

Ɗúu jar maga da wo mayre dehãy wo mono

¹⁸ Yoo jar siɗ jagn wo mono jar ma po da wo mayre dehãy wo, jar sen wo diŋ Maaseya, Eliyeser, Yerib wo de Gedaliya jar ni Josuwe je ni Yotsadagn wo de hẽẽre ɓe wo.

¹⁹ Saara raw wo hoo doo ɓaara go ciŋ ma nii naare ɓaaran wo, ma sii jag de gamla ma por ɓlagge ɓaara no.

²⁰ Yoo jar ni Imer wo diŋ Hanani wo de Sebadiya.

²¹ Yoo jar ni Harim wo diŋ Maaseya, Semaeya, Yehiyel wo de Osiyase.

²² Yoo jar ni Pashur wo diŋ Eljoenay, Maaseya, Ismayel, Netaneel, Yosabad wo de Eleasa.

²³ Yoo jar Lefidn wo diŋ Yosabad, Simeyi, Kelaya maga à ɗen ga Kelita mono, Petahiya, Juda wo de Eliyesere.

²⁴ Yoo jar ʼwad siŋn wo diŋ Eliyakib. Yoo jar gor jag tiŋ wo diŋ Salum, Telem wo de Uri.

²⁵ Yoo jar Israyel mono diŋ Ramiya, Yisiya, Malkiya, Miyamin, Eleyasar, Malkiya wo de Benaya jar ni Pareos wo.

²⁶ Yoo jar ni Elam wo diŋ Mataniya, Sakari, Yehiyel, Abdi, Yeremod wo de Eli,

²⁷ diŋ Elyoenay, Eliyakib, Mataniya, Yeremod, Sabad wo de Asisa yoo jar ni Satu wo,

²⁸ diŋ Yohanan, Hananiya, Sabay wo de Atlay yoo jar ni Bebay wo,

²⁹ diŋ Mesulam, Malug, Adaya, Yakub, Seal wo de Ramod yoo jar ni Bani wo,

³⁰ diŋ Adna, Kaelal, Benaya, Maaseya, Mataniya, Betsalel, Binuyi wo de Manase yoo jar ni Pahat-Mohab wo,

³¹ diŋ Eliyeser, Yisiya, Malkiya, Semaeya, Simeyoŋ,

³² Benjame, Malug wo de Semariya yoo jar ni Harim wo,

³³ diŋ Madnay, Matata, Sabad, Elifeled, Yeremay, Manase wo de Simeyi yoo jar ni Hasum wo.

³⁴ Yoo jar ni Bani wo diŋ : Maaday, Amram, Uwel,

³⁵ Benaya, Bediya, Keluhu,

³⁶ Faniya, Meremod, Eliyakib,

³⁷ Mataniya, Madnay, Yaasay,

³⁸ Bani, Binuyi, Simeyi,

³⁹ Selemiya, Natan, Adaya,

⁴⁰ Maknadbay, Sasay, Saray,

⁴¹ Asareel, Selemiya, Semariya,

⁴² Salum, Amariya wo de Josefe.

⁴³ Yoo jar ni Nebo wo diŋ : Yeiyel, Matitiya, Sabad, Sebina, Yaday, Jowel wo de Benaya.

⁴⁴ Jar sen wo mo ɓuy hay da wo mayre dehãyn wo, debaŋ yoo ɓaara hay biŋ wo weere go de ɓaara.