ESAYI 8 - Tupuri Bible

Jar Asiri frum gi wo sirn go

¹ Manwur kal riŋ mege ga : Maŋ húulì ma de ceɗge ma kluu, ni ndo krig yerge ti ɓe go diŋ yerge ma de eln tuu ga : Frum deparday, trom deparday.

² Ndi raw hoo jar sedewa ɓi wo diŋ jar po ma de deele wo, diŋ Uri je siɗ jagn wo de Sakari je ni Yeberekiyahu no.

³ Ndi hay wo see wãy ma ndar nen wããre Baan go no, se raw maŋ ɓili, kal biŋ wele. Manwur day wii me ga : Kaŋ ɗúu ne hẽn ga Maher-Salal-Has-Bas.

⁴ Werga, taŋgu maga weln ko ɗe pan ɓe noga man ɓe go mono, à hoo ge horog ma Damasn wo de fẽẽre maga jar Samari horge ra wo jag jaw wo yaŋ wo go pel waŋ Asiri.

Jar Asiri yãã ge wo sirn go

⁵ Manwur raw wãã wããre ne ndi pa, day riŋ me ga :

⁶ Wer maga wer jar sen la ɓoʼ wo foo Bii ma Silowe maga yuu sededed go, Day raw wo joŋ fruygi ti Retsin Wo de je ni Remaliyahun mono,

⁷ Waŋkluu maŋ ge bii ma giɓliŋ-giɓliŋ kluuri ma ɓil Maarog ma de pããge wo le go ne hara ti mono, diŋ waŋ Asiri de jar kluuri ma ti ɓen wo. Bii sen maŋ ge yaŋ Go debaŋ de daŋ ngel suuli ɓe no, day dug gi yaŋ go Nen maga raw see diŋdiŋ ɓen wo go ɓuy ciŋ.

⁸ Á ngiɗ gi nen yaŋ de Juda, Maŋ ge yaŋ go ɓil ɓe, Raw ti ɓe yaŋ go day caan yaŋ go soole yeʼe. Jag graŋ ɓe ma de mbeɗgen ɗee doo wo go ne sir ɓon ti ɓuy so, Emanuwele!

À ngaɓ fẽẽre wo pel de koɗkoɗe

⁹ Nday wer jar no, hrag we mbay war so, À caa ge hẽẽne ɓay go! Coʼ we sugi, Nday ɓuy maga nday wo go hãã hãã ti tamsir mono! ʼWũy we see ɓay go ma durgi, À caa ge hẽẽne ɓay go!

¹⁰ Kaŋ we mbay fẽẽre pel ma joŋge day à ɓlag ge ra mbe go! Wãã we mbay wããre po, Day á ɓoʼ ge jag go gà! Werga Baa de wùri!

Húulì ma mbar ɓaale jar no

¹¹ Werga de maga doo Manwur hay ɗaw me day se hay riŋ Me go ga ndi mo see ti faage mani jar sen wo wa mono, Se hay riŋ me doo kay nono ga :

¹² Ɗe we fen po ɓuy maga jar sen ɗen wo ga ti graŋ diŋ ti graŋ wa. Joŋ we hẽẽne doo fen maga á joŋ wo hẽẽne doo ɓe mo wa, caa we bii go ɓil doo ɓe wa lay.

¹³ Nday nen hoo sug nà diŋ ti Manwur Pantway no, Nday nen hẽẽge nà diŋ se, Nday nen joŋ hẽẽne nà doo ɓe.

¹⁴ Mo so no ni se joŋ ge yaŋ diŋ ngel ma bay ɗage ama diŋ húulì re lay, Diŋ húulì ma mbar ɓaale jar ma ti tiŋ ma ɓog mani Israyeln wo, Diŋ bay wo de bày see jar ma de tiŋ Jerusalemn wo.

¹⁵ Jar debaŋ mbar ge wo ɓaale yaŋ ti ɓe, Leɗ ge wo yaŋ day hrag ge wo yaŋ go. Á bag ge wo yaŋ go ti rew, à hoo ge ra.

À nen ferge ti jag liŋgi no

¹⁶ Ɗaw jag ti sedewa seno, yoŋ jag liŋgi sen ti holaŋ jar seege wer ɓin wo.

¹⁷ Ndi de gorge diŋ doo Manwuri, Maga yoŋ see ɓe go ne tiŋ mani Jakobn mono, Ndi de kaŋ ɗiggi ɓi nà ti ɓe.

¹⁸ Wùr de weere maga Manwur hã ra me mono, Wùr kol diŋ fẽẽre kaŋ nen jare, Fẽẽre ma riŋ jar go pel bole ti sir Israyele. Kol wùr go nono nà diŋ Manwur Pantway Maga de hayle ti húulì Siyoŋ mono.

¹⁹ Hayga à wii nday we ga : Wo we wiɗ jag jar maga wãɗ wo wããre de jar húulí wo, Jar maga siɗ wo re ma pel go ne jar wo, Jar se maga sweg wo wããre day ngrum wo jage, Jar maga wãɗ wo ga wer jar ma hon wo la ɓuy Bay wo nen wii baa ɓaaran wo de jar ma de húulín wo Ti jar ma tenen wo wa yawla no,

²⁰ Ni nday fer ne hara ga : À nen ferge ti jag liŋgin wo de wããre sedewa no. Day hayga à wãã we doo kay no gà no, Ngel maŋ le go ma teege ne jar sen wo ti gà.

Suŋgu ma tigiɗ no

²¹ Á caa ge wo ɓil sirn go de sealge, wo koŋne lay. Day de maga koŋne cee ge ra we no, Saara car ge jiili yaŋ go, ɗar ge wo waŋ ɓaaran wo yaŋ de Baa ɓaara no. Á hoo ge wo nen ɓaara yaŋ ciŋ.

²² Blam ɓe saara fer nen ɓaara yaŋ le ko tamsiri, Day saara ko ge nà diŋ lawge, diŋ suŋgu, diŋ re de ɓoʼ suŋgu ne jar ti. Saara joŋ ge nà nen suŋgu ma ɗiligligi.

Suŋgun joŋ ge wo tum gà

²³ Ama suŋgu sen joŋ ge wo tum ti tamsir maga lawge patala ni mo gà. Hayga naw ma taŋgun hay kol wo sir Sabulon wo de sir Neftali Wo go nen maga à hoo sug ti ɓaara gà so no, Wur ma peln a ge yaŋ de togoɗge ti faage maga leʼ wo jag Maarog maga cegaɗ wo go faale Jurdẽẽ Hãã wo go ti sir mani jar dehãyn wo mono.