ESAYI 7 - Tupuri Bible

Esay wo see waŋ Akase

¹ Ti kal mani Akas je ni Yotam, je ni Osiyas waŋ Judan mono, Retsin waŋ Siri raw wo hooge de Peka je ni Remaliyahu waŋ Israyeln ma leʼ Jerusalem durgi, ama saara kãã ma leʼge ɓe gà.

² À raw age fer wããre ne tiŋ mani Dafid ti re sen ga : Jar Siri yaŋ wo go de kaŋge ti sir Efrayim. Jiili Akas wo de jar sir ɓen leʼ wo mbar rage doo koore ma yooway maga fid doo leege no mono.

³ Mo so no Manwur raw riŋ Esay ga : Kal go caa pel Akase, nday de wel ɓo Seyar-Yakub wo ti waale blam bii maga a le ti gloŋ ma nen ciŋn wo ti faage maga leʼ wo ɓil pay mani jar bag law õõben wo mono.

⁴ Ndo day wiin ge ga : Coɓ mbo, joŋ hẽẽne mopo wa. Jiili ɓo mo caa bii go doo Gerdem hããre se ɓog ma ɗur cug jagn wo mo wa, Doo sõõge ɓil mani Retsin wo de jar Sirin wo wa lay, Doo bagge põõ mani je ni Remaliyahun wa lay.

⁵ Wer maga jar Siri wo le de ɗig ɓlagge ti ɓo, wo de tay Doo bagge põõ jag de jar Efrayim wo de je ni Remaliyahu no day wãɗ wo ga :

⁶ Naa hoo wo leʼ sir Juda ni naa caa ge hẽẽne Jerusalem yaŋ go, Naa kaŋ cee ne hẽn ti hãã nen maga á mo hã see Ɓe go ne naa day ni naa kaŋ je ni Tabeel ti ɓe waŋ ɓaara mono,

⁷ Waŋkluu, Manwur wãã so ga : Re sen joŋ ge gà A ɓoʼ ge jag go gà.

⁸ Werga Damas diŋ ti sir Siri day Retsiŋ diŋ ti Damas lay. Kiŋgi gwaʼ doo hiiraʼ ti dwee, à ndreɗ ge Efrayim Go, se joŋ ge diŋ sir jar po taʼ gà so hase.

⁹ Ɓi leege Samari diŋ ti Efrayim Day je ni Remaliyahun diŋ ti Samari lay. Hayga nday lag we ngiŋ ti hãge ɓil ɓayn gà no, Nday kãã ge ma lagge de egre pel ɓaara gà.

Biŋgi Emmanuwel no

¹⁰ Manwur raw wãã wããre ne Akas tigriŋ day riŋn ga :

¹¹ Wii mbo fen ma kaŋ nen ga Manwur de kayge wer ɓo doo Manwuri, Baa ɓo no. Wiin mbo doo ga ɓil da nono, gesiŋ la noga nen ngel ma ciŋ.

¹² Akas raw ferge gana : Ndi wii gi mopo gà hase, ndi lam Manwur gà.

¹³ Esay day so ga : Laa we so nday jar ni Dafid no! Nday ko nen ɓay nà ga gayge maga nday gay jar téebeere wo Mo nà bay diŋ mopo wa, Nday yaʼ nà gayge diŋ Baa ɓin lay so yawla?

¹⁴ Diŋ wersen so Waŋkluu de see ɓe tuu Joŋ ge fen kaŋ nen ɓay yaŋ ne nday. Ko we, maytigli yaŋ de maŋ ɓili, A biŋ gi wel yaŋ day se kaŋ ge ɗúu yaŋ ne hẽn ga Emanuwele.

¹⁵ Wel sen re ge noo-pãã wo yaŋ de noo-yõõre Hãã wo go ti wur maga se ko tob fen ma de ɓlaggen go, Day maŋ diŋ mo ma de eln mono.

¹⁶ Ane taŋgu maga mbargan ko tob mo ma de ɓlaggen go, Day maŋ diŋ mo ma de eln mono, Sir mani waŋre ma ɓog maga caa wo hẽẽne ɓo go Gwaʼ ge wo yaŋ go ɓil koɗe.

¹⁷ Manwur a ge yaŋ de naw po wo ne nday ti De jar sir ɓon wo de tiŋ mani pan ɓo no, diŋ waŋ Asiri. Te naw sen hay joŋ ti boŋ gà Hãã le ti wur maga Efrayim maŋ ɓil go see Juda mono.

Jar Asiri ɓug gi wo sirn go

¹⁸ Wo ge dayge ti wur sen mono, Manwur ʼwaa ge flew yaŋ Le ne kwãyre ma ti ɓrewge bii Nil ma Ejipten wo De yõõre maga wo le ɓil sir Asiri mono.

¹⁹ Á a ge wo yaŋ le day lag ge wo yaŋ go ɓuy ɓil log ma kuɗumn wo, Go ɓil rum húulìn wo, go yoo gusuŋ-gusuŋ wo ɓuy, Go ɓil ngel koɗ horogn wo ɓuy lay.

²⁰ Ti wur sen mono, Waŋkluu cẽẽ ge ti Juda yaŋ go De mocẽẽti maga se yããn le yããge mono, Hãã cegaɗ maarog ma de pããgen wo go, Á cẽẽn ge diŋ de waŋ Asiri. Á cẽẽ ge riŋ ma tin go de fuy ma pel no, Horog ge piŋ ma jag jarn go lay.

²¹ Ti wur sen ni mono, wosela ɓuy gẽẽ ge, Day tigli yaŋ boŋ de fǐiri de ɓaale ɓaara ɓoge.

²² Pãã joŋ ge debaŋ kol go nen maga À re diŋ noo-pãã, Werga je maga gwaʼ ge ɓil sir ni re ge Diŋ noo-pãã wo de noo-yõõre.

²³ Ti wur sen ni mono, ngel po ɓuy maga À daʼge koore tlalum de peɗge ni ndar ga yee go solay boo ndar lay mono, À men ge ɗewseŋ wo de hõõre wo go kaŋ cee ne hara ti.

²⁴ À laa ge wo ni de waa wo de toŋwaa doo werga sirn ɓuy yãã ge go de ɗewseŋ wo de hõõre wo.

²⁵ Ti húulìn wo ɓuy maga à jeɗ ra de soŋ mono, jobo kal ge wo ni gà so has doo hẽẽne ɗewseŋ wo de hõõren wo. Á laa ge deeren wo wo go ni de sããren wo.