ESAYI 65 - Tupuri Bible

Jar Israyel jãɗ wo Manwuri

¹ Ndi hay men see ɓi go wiɗ jag ne jar maga bay wo wiɗ mopo wa hase. Ndi hay men see ɓi go daʼge ne jar maga hay bay wo kiɗ ndi wa. Ndi hay wãã ne wer jar po maga hay bay wo ɗe ɗúu ɓi wa ga : Ndi la, ndi la!

² Ndi hay mbi tum nen naw coŋ doo ɓi ne jar po ma de teeɓee maga see wo ti faage ma de ɓlagge, ti ɗiggi ɓaara wo,

³ ne jar po maga joŋ wo fẽẽre ma car jiili ɓi go poɗag poɗag tum, ne jar po maga siɗ wo jag ne sõõre wo wer koore wo, roɗ wo fen fõõre ti brig ma de ɗegalge ti kããra wo,

⁴ ne jar po maga wo wo yoo tipaale wo ma wiɗ jag jar húulí wo day nà wo wo go ɓi rum húulì wo mono. Á re wo này gaduuru day lag wo fẽẽre ɗag wo ɓil hããre ɓaaran wo.

⁵ Á wãɗ wo ne jar gana : Yaʼ see ɓo le de ngar ɓi wa, maŋ ɓil see ɓo wo go day la de bay ɗag ɓin taw mo go! Sen mo deŋ ɓuy diŋ mo ma kaŋ wer ɓi ɓod hũy doo waŋ, diŋ mo maga roɗ jiili me.

⁶ Joŋre ɓaara se kay go de yerge doo ɓi, ndi joŋ ge baʼ gà ndi ʼwũyn gi mopo see ɓaara. Kidolgi ndi daʼ ge ngar ɓaara yaŋ,

⁷ diŋ ngar ɓlagge ɓayn wo de debaycõõre mani pããre ɓay maga hay roɗ wo fen fõõre ti húulì wo, day ɓoʼ wo foo ɓi go ti ngel ma de farge ciŋn wo mono. Ndi daʼ ngar ɓaara yaŋ go ti ngel ɓe ti ɓlagge ɓaara ma ɓaan wo le ɓuy.

⁸ Manwur wãã ga : Doo maga à daʼ bii we ɓil leʼge tlalum po à raw riŋgi ga bosaʼ yaŋ ni no mono, ndi joŋ ge yaŋ doosen no lay wer weere jõõre ɓin wo nen maga ndi mo ɓlag ra go ɓuy wa.

⁹ Ndi jaw ge jar po wo yaŋ ti wer mani Jakob no, ndi jaw ge je maga wãã ge re húulì ɓin wo yaŋ ti wer mani Juda no. Á kol ge wo yaŋ diŋ ma jar maga doo ɓi leʼ ti ɓaara mono day weere jõõre ɓin laa ge wo tiŋ yaŋ go ti ɓaara.

¹⁰ Ful ma Saron joŋ ge yaŋ diŋ ngel koɗ fǐirin wo day log ma Akorn joŋ ge diŋ ngel yoŋre deeren wo lay, sen diŋ ma jar ɓi maga sen kaŋ ge wo ɗiggi ma kiɗ ndi mono.

¹¹ Ama ma ɓay maga nday tob Manwur go, ga nday yõõ ti go ti húulì ɓi ma bay ɗag no, nday kaŋ tabul go taʼ ne sõõ Gad no, baa kob go de yii par ne sõõ Meni mono,

¹² ndi kaŋ ge nday ne moslam jage. Nday laa ge kõyõgre yaŋ yeʼyeʼ jag mbege. Werga, ndi hay ɗe ɗúu, nday day yiŋ jag gà ndi hay wãã wããre, nday la dayge coʼ sug gà. Nday raw joŋge diŋ fen maga sen bay de el nen ɓi wa mono, nday baa ɓayn diŋ fen maga sen coo jag ɓi gà mono.

¹³ Diŋ wersen Waŋkluu Manwur wãã ga : Ko we ga weere jõõre ɓin re ge wo yaŋ, ama nday ma ɓay koŋne cee ge nday. Á jo ge wo yaŋ ama nday ma ɓayn jwaale kaŋ ge nday yaŋ. Weere jõõre ɓin fruy gi wo yaŋ, ama nday ma ɓayn sõõre baa ge nday ge go.

¹⁴ Ko we ga weere jõõre ɓin ʼwad ge wo war yaŋ de fruygi go de ɓil ɓaara ɓuy, ama nday ma ɓayn nday raage yaŋ doo bon le ɓil ɓay tem day nday law ge yaŋ go de hee ti gesiŋ.

¹⁵ Ɗúu ɓay gwaʼ ge yaŋ jag jar ɓi maga doo ɓi leʼ ti ɓaara wo kay faɗge ga : Daga Waŋkluu Manwur mo ʼwar mo go Ane se kaŋ ge ɗúu ma tigriŋ ge ne weere jõõre ɓen wo.

¹⁶ Je maga da ge we ga se mo hay de bosaʼ ti ɓil sirn la no, haʼ ge yaŋ de ɗúu Baa ma cwãy, haʼ ge diŋ de Baa ma cwãy no. Werga à yõõ ge ti re maga hay caa wo jar le ɓaan go, á yee ge wo nen go pel ɓi.

Tamsir wo de ngel ma ciŋ ma defayn wo

¹⁷ Werga ndi de ma joŋ ngel ma ciŋ ma defay wo de tamsir ma defay. Jobo fer ge ɗig ti ti re maga hay joŋ wo le go ti tĩĩgi wer mo gà so hase, day saara a ge ne jobo ti gà so has lay.

¹⁸ Ɗawa ɓen joŋ we fruygi day ɓil ɓay mo hay go fehfeh tum wer fen maga ndi de ma joŋge ɓe mono. Werga ndi de ʼwũy Jerusalem maga á mo fruy, ndi de tay jar ɓen wo maga á mo hay wo jag ti fege.

¹⁹ Ɓil ɓi de see ɓi joŋ ge yaŋ go feh wer Jerusalem day jag ɓi caa feg yaŋ go wer jar ɓin wo lay. À laa ge sug roo noga war re ni gà so hase.

²⁰ Wel ma ti pãã maga nà mbag day huu go tuu joŋ ge ni gà hase, je tããbe maga baa jag naw ɓen go gà joŋ ge ni gà lay. Werga, je maga huu gi kiŋgi kis diŋ je maga sen go klee has so mono, day je joŋ ɓlagge maga huu we kiŋgi kis mono, à riŋ gi ti ɓe ga á go de faɗge.

²¹ Á bor ge wo tiŋ wo yaŋ day saara lag ge yaŋ ɓil ɓaara. Á peɗ ge wo koore yaŋ day saara re ge leʼge ɓaara yaŋ.

²² Á bor ge wo tiŋ wo maga jobo ma tigriŋ kal go ɓil ɓaara gà so. Á peɗ ge wo koore yaŋ day je tigriŋ re ra go gà so. Jar mani ɓin jaw ge wo yaŋ doo koore wo nono day jar ɓi maga ndi hoo ra go joŋ ge wo fruygi yaŋ ti joŋre ma doo ɓaaran wo.

²³ Á joŋ ge wo coo de koɗ koɗ gà so. Á biŋ gi wo weere maga à taw ra go gà so werga á joŋ ge wo diŋ wer jar maga Manwur de kaŋ bosaʼ ne hara ti mono, weere ɓaaran joŋ ge wo yaŋ see ɓaara.

²⁴ Day ge mo so no, de maga á bay wo ɗe ndi ɗa ndi yiŋ jag ge go ne hara, á wo bay wãã wããre seŋ ndi laa jag ɓaara go tuu.

²⁵ Way-baa wo de wesam koɗ ge wo yaŋ ti ngel po boŋ, mingir re ge fíi yaŋ doo day no lay. Rege cwe joŋ ge yaŋ diŋ ɓurgi. Jobo joŋ ge ɓlagge noga ɓlag ge mopo go ti húulì ɓi ma bay ɗagn gà hase. Manwur wãã nono.